ప్రపంచంలో ఎత్తైన మౌంట్ గంగోత్రి, భగీరథ్ పర్వతాలను తెలుగు రాష్ట్రాలకు చెందిన ఇద్దరు దివ్యాంగులు అధిరోహించారు. సాధించాలనే పట్టుదల ఉంటే చాలు అంగవైకల్యం అడ్డురాదని నిరూపించారు. దిల్‌సుఖ్‌నగర్కు చెందిన 17 ఏళ్ల ఆర్యవర్ధన్‌, ఆంధ్రప్రదేశ్కు చెందిన 22 ఏళ్ల అర్షద్ షేక్‌ రోడ్డు ప్రమాదంలో తమ ఎడమ కాళ్లు కోల్పోయారు. అయినా ధైర్యం కోల్పోలేదు. పర్వాతారోహణపై ఆసక్తితో ఆదిత్య మెహతా ఫౌండేషన్‌ ద్వారా పర్వతాలు అధిరోహించడంలో శిక్షణ పొందారు. అర్షద్ జాతీయ స్థాయి సైక్లింగ్‌ పోటీల్లో కూడా పాల్గొన్నాడు.
అడుగడుగునా అవాంతరాలే...
కృత్రిమ అవయవాలు అమర్చుకున్న వీరిద్దరూ జులై 17న గంగోత్రి, మౌంట్ భగీరథ్ శిఖరారోహణకు బయలుదేరారు. ఆగస్టు 29న 18వేల అడుగుల ఎత్తున్న శిఖరాల పై భాగానికి చేరుకున్నారు. అడుగడుగునా అవాంతరాలు ఎదురైనా లక్ష్య సాధన దిశగా ముందుకు సాగారు. అనుకున్నది సాధించారు.
పోలీసుల ఘన స్వాగతం...
మౌంట్ గంగోత్రి, భగీరథ్ పర్వతాలను అధిరోహించిన ఆర్య, అర్షద్లు ఈరోజు హైదరాబాద్కు చేరుకున్నారు. వీరికి సికింద్రాబాద్, గోపాలపురం స్టేషన్ల పోలీస్ అధికారులు సికింద్రాబాద్ రైల్వే స్టేషన్లో ఘన స్వాగతం పలికారు. పూలమాలలతో, శాలువాతో సత్కరించి అభినందించారు.
అంగవైకల్యం లక్ష్య సాధనకు అడ్డుకాదని, భవిష్యత్లో మరిన్ని పర్వతాలు అధిరోహిస్తామంటున్న ఆర్య, అర్షద్లు నేటి తరానికి స్ఫూర్తిగా నిలుస్తున్నారు. వారి తదుపరి లక్ష్యం మౌంట్ ఎవరెస్ట్ త్వరలోనే అధిరోహించాలని కోరుకుందాం.
- ఇదీ చూడండి : భారత్ అమ్ములపొదికి చేరిన అపాచీ హెలికాప్టర్లు
