ప్రపంచంలోని వివిధ దేశాల నుంచి తొలిదశలో 64 విమానాలను కేంద్ర ప్రభుత్వం ఏర్పాటు చేసింది. విదేశాల్లో చిక్కుకుపోయిన భారతీయులతో కువైట్‌ నుంచి తొలి విమానం హైదరాబాద్కు రానుంది. అమెరికా, బ్రిటన్‌, మలేసియా, కువైట్‌, యూఏఈ, ఫిలిప్పీన్స్‌ నుంచి వారం వ్యవధిలో 8 విమానాల్లో సుమారు 2 వేల మంది వరకు హైదరాబాద్కు రానున్నారు. వాస్తవానికి తొలి విమానం అమెరికా నుంచి రావాల్సి ఉండగా అది రద్దయింది.
విదేశాల నుంచి రాష్ట్రానికి వచ్చే వారిని నేరుగా క్వారంటైన్‌ కేంద్రాలకు తరలించనున్నారు. ఇందుకోసం హోటళ్లు, లాడ్జీల్లో ఏర్పాట్లు చేశారు. రూ.5 వేలు, రూ.15 వేలు, రూ.30 వేలు ప్యాకేజీల చొప్పున వసతి ప్యాకేజీలు నిర్ణయించారు. ఆ ఖర్చులను ప్రయాణికులే భరించాలి. పేదకార్మికులైతే ప్రభుత్వ క్వారంటైన్‌ కేంద్రాలకు పంపిస్తారు. ఇలా వచ్చే వారి విషయంలో తీసుకోవాల్సిన చర్యలపై కేంద్ర ఆరోగ్య కుటుంబ సంక్షేమ శాఖ శుక్రవారం మార్గదర్శకాలు విడుదల చేసింది.
ఏర్పాట్ల పర్యవేక్షణకు ఆరు కమిటీలు
విమానాల్లో వచ్చే వారి ఏర్పాట్లను పర్యవేక్షించేందుకు రాష్ట్ర ప్రభుత్వం ఆరు కమిటీలను నియమించింది. వీటికి సాధారణ పరిపాలనలోని ప్రొటోకాల్‌ విభాగ సంయుక్త కార్యదర్శి ఎస్‌.అర్వింద్‌ సింగ్‌ను నోడల్‌ అధికారిగా ప్రభుత్వం నియమించింది. విదేశీ వ్యవహారాల మంత్రిత్వశాఖ నుంచి ఇమిగ్రేషన్‌, క్వారంటైన్‌ వ్యవహారాల వరకు ఈయన పర్యవేక్షిస్తారు.
వారిని క్వారంటైన్‌ కేంద్రాలకు తీసుకెళ్లడం నుంచి వారి భద్రత వ్యవహారాలను సైబరాబాద్‌ కమిషనర్‌ వీసీ సజ్జనార్‌ పర్యవేక్షిస్తారు. తనిఖీలు, వైద్య పర్యవేక్షణను ప్రభుత్వ ప్రత్యేక ప్రధాన కార్యదర్శి శాంతికుమారి, ప్రజారోగ్య డైరెక్టర్‌ శ్రీనివాసరావు చూస్తారు. రవాణా వ్యవహారాలను ఆ శాఖ ముఖ్యకార్యదర్శి సునీల్‌శర్మ, క్వారంటైన్‌ కేంద్రాలను నీతూప్రసాద్‌, రఘునందన్‌రావు, అమోయ్‌కుమార్‌, విమానాశ్రయంలో ఏర్పాట్ల కోసం జీఎమ్మార్‌ విమానాశ్రయం సీఈవో అరుణ్‌భల్‌ పర్యవేక్షిస్తారు.
విమానాశ్రయంలో ఉండేందుకు అన్ని విభాగాల నుంచి 11 మంది అధికారుల చొప్పున మరో రెండు బృందాలను నియమించింది. ఐఏఎస్‌ అధికారులు శివలింగయ్య, జి.కిషన్‌లు బృంద నాయకులుగా వ్యవహరిస్తారు. విదేశాల నుంచి వచ్చే ప్రయాణికులకు క్వారంటైన్‌ కేంద్రాలకు ఆర్టీసీ బస్సుల ద్వారా తరలిస్తారు. ఇందుకు 20 బస్సులు, సరకు రవాణాకు 15 కార్గో బస్సులను ఏర్పాటు చేసినట్లు ఆర్టీసీ ఇన్‌ఛార్జి మేనేజింగ్‌ డైరెక్టర్‌ సునీల్‌శర్మ చెప్పారు.
ఇదీ చూడండి: 'భారత్ బయోటెక్'కు కరోనా నివారణ బాధ్యతలు
