వారం రోజులుగా ఇంటి చుట్టూ జలమే. తాగునీరు, నిత్యావసరాలు లేవు. చుట్టూ మురుగు కమ్మేయడంతో లోపల ఉండలేని పరిస్థితి. పండగ సమయంలో సొంతింటిని వదిలి బంధువుల వద్ద తల దాచుకోవాల్సి వస్తోంది.
- బండ్లగూడ చెరువు వరదతో ముంపునకు గురైన మల్లికార్జుననగర్‌ వాసి ఆవేదన ఇది.
తేరుకుంటుందా:
సరిగ్గా ఈనెల 13న భారీ వర్షాలతో వరదలో చిక్కుకున్న అనేక కాలనీలు ఇప్పటికీ తేరుకోలేదు. సికింద్రాబాద్ బోయిన్‌పల్లి పరిధిలోని హస్మత్‌పేట చెరువుకు గండి పడటానికి తోడు ఆగకుండా కురుస్తున్న వానలకు 12 కాలనీలు మునిగాయి. పద్మావతి కాలనీ, రాయల్‌ ఎన్‌క్లేవ్‌, సౌజన్యకాలనీ, ఆరావళి ఎన్‌క్లేవ్‌, అమరావతి ఎన్‌క్లేవ్‌, ఇక్రిశాట్‌ ఫేజ్‌ 1, 2లలో తీవ్ర అవస్థలు నెలకొన్నాయి.
ఫాక్స్‌సాగర్‌ విరుచుకుపడి..
జీడిమెట్ల ఫాక్స్‌సాగర్‌ వరదతో కొంపల్లి మున్సిపాలిటీ పరిధి ఉమామహేశ్వరకాలనీలో 642 ఇళ్లుమునిగి అంతా రోడ్డునపడ్డారు. వారం తర్వాత కూడా ముంపు వీడలేదు. నివాసితులంతా ఇళ్లు వదిలి వెళ్లిపోయారు. మల్లాపూర్‌ డివిజన్‌ జేఎన్‌ఎన్‌యూఆర్‌ఎం కాలనీలో 20కి పైగా ఇళ్లలో కింది అంతస్తులు నీటిలో మునిగే ఉన్నాయి.
హఫీజ్‌బాబానగర్‌లో హాహాకారాలు
తీవ్రంగా నష్టపోయిన ప్రాంతాలు: హఫీజ్‌బాబానగర్‌, లలిత్‌బాగ్‌, ఉప్పుగూడ, గుల్షన్‌కాలనీ, కాంచన్‌బాగ్‌, బీబీనగర్‌
అప్పటివరకూ ప్రశాంతంగా ఉన్న కాలనీలో ఒక్కసారిగా అలజడి. ఆదివారం అర్ధరాత్రి గుర్రంచెరువుకు గండిపడి పోటెత్తిన వరదతో హాఫిజ్‌బాబానగర్‌ అల్లకల్లోలంగా మారింది. నాలుగైదు గంటలు ఉద్ధృతి కొనసాగింది. సోమవారం ఉదయం 6 గంటల సమయానికి నీరు క్రమంగా ఇళ్ల నుంచి బయటకు పోయింది. అప్పటికే నివాసాల్లో 2-3 అడుగుల బురద పేరుకుంది. గృహోపకరణాలు, టీవీలు, ఫ్రిజ్‌లు, వాషింగ్‌మెషీన్లు, నగదు కొట్టుకుపోయాయి.
కదిలిస్తే కన్నీరు
పదుల సంఖ్యలో విద్యుత్‌స్తంభాలు, కార్లు, ఆటోలు, ద్విచక్ర వాహనాలు కొట్టుకుపోయాయి. బురద, గుర్రపుడెక్క కింద కూరుకుపోయిన వాహనాలను ఇప్పుడిప్పుడే తొలగిస్తున్నారు. సుమారు 1000 కుటుంబాలు భారీగా నష్టపోయాయి. సాధారణ స్థితి నెలకొంటే తప్ప ప్రాణ, ఆస్తినష్టాలు అంచనా వేయలేమని స్థానికులు తెలిపారు. యంత్రాంగం సోమవారం మధ్యాహ్నం నుంచి జేసీబీ, ట్రాక్టర్ల ద్వారా చెత్తచెదారాన్ని బయటకు తరలిస్తోంది. కొత్త విద్యుత్తు స్తంభాలు ఏర్పాటుచేస్తున్నారు. బల్దియా, పోలీస్‌, విద్యుత్తు, ఎన్‌డీఆర్‌ఎఫ్‌ బృందాలు సాధారణ పరిస్థితులు నెలకొల్పేందుకు ప్రయత్నిస్తున్నాయి.
ఆహారమైనా అందించలేదు
చిన్నపిల్లలతో వారం రోజులుగా రోడ్డుపై ఉంటున్నాం. గతంలో వరదలకు ప్రభుత్వం ఆహారమైనా అందించింది. ఈసారి కనీసం చూసేవాళ్లు కరవయ్యారు. చెరువు ప్రవాహం నుంచి యువకులే మమ్మల్ని కాపాడారు.
- స్వప్న, ఉమామహేశ్వర కాలనీ
ఇంటికోసం తెచ్చిన రూ.6 లక్షలు నీళ్లపాలు
ఇంట్లో ఏడుగురు సభ్యులం ఉంటాం. వరద విరుచుకుపడటంతో పై అంతస్తులోకి చేరాం. సోమవారం ఉదయం వరకు భయంగా గడిపాం. ఉదయాన్నే మహిళలు, పిల్లలను యాకుత్‌పురలో బంధువుల ఇళ్లకు పంపాం. కొత్తగా నిర్మిస్తున్న ఇంటి కోసం దాచుకున్న రూ.6లక్షల నగదు కొట్టుకుపోయాయి.
- సయ్యద్‌ హమీద్‌, హఫీజ్‌బాబానగర్‌
సామాన్లన్నీ నాశనమయ్యాయి
మా ఇళ్లు కింది ఫ్లోర్‌లో ఉంది. వరదతో అది మునిగింది. పదేళ్లుగా బ్యూటీపార్లర్‌ నడుపుతూ ఉపాధి పొందుతున్నాను. ఇటీవల దుకాణం ఖాళీ చేసి ఆ సామాన్లు ఇంటికి తీసుకురాగా అన్నీ నీటిపాలయ్యాయి.
- మున్వర్‌, జేఎన్‌ఎన్‌యూఆర్‌ఎం, మల్లాపూర్‌
