గ్రేటర్​లో పెరుగుతున్న కేసులు.. భయాందోళనలో ప్రజలు

గ్రేటర్​లో కరోనా కలవరపెడుతోంది. రాష్ట్రంలో నమోదవుతున్న కేసులన్నీ జీహెచ్ఎంసీ పరిధిలోనివే కావడం ప్రజలను భయభ్రాంతులకు గురిచేస్తోంది. ప్రతి ఇంటికి వెళ్లి వైద్య పరీక్షలు నిర్వహిస్తున్నారు. ఇక జీహెచ్ఎంసీ లో పనిచేసే స్వీపర్​కు, ఆమె భర్తకు కరోనా సోకగా మిగతా స్వీపర్లు పనులకు వెళ్లేందుకు భయాందోళనకు గురవుతున్నారు.

జీహెచ్​ఎంసీలో కార్మికుల్లో కరోనా కలకలం రేపుతోంది. అంబర్​పేట సర్కిల్​లో ఓ పారిశుద్ధ్య కార్మికులకి కొవిడ్​ సోకగ మిగతా కార్మికులు భయపడుతున్నారు. ఆ వ్యక్తితో పాటు పనిచేసిన ఎనిమిది మందిని ప్రభుత్వ క్వారంటైన్​కు తరలించారు. ఇటీవల రాష్ట్రంలో నమోదవుతున్న కేసులన్నీ హైదరాబాద్​లోనే ఉండగా అధికార యంత్రాంగం కరోనా కట్టడిపై దృష్టి సారిస్తోంది. పాజిటివ్​ వచ్చిన వారికి ఎలా వ్యాధి సోకింది అనే అంశాలను బల్దియా, వైద్యశాఖ అధికారులు తెలుసుకుంటున్నారు.

కంటైన్మెంట్ ప్రాంతాల్లో ప్రత్యేక దృష్టి..

ఖైరతాబాద్​, చార్మినార్ జోన్లలో ఎక్కువ కరోనా కేసులు రాగా.. అధికార యంత్రాంగం ఆయా ప్రాంతాల్లో ప్రత్యేక దృష్టి సారించింది. అక్కడ రోడ్లపైకి వస్తున్న ప్రతి ఒక్కరికి థర్మల్ స్క్రీనింగ్​ చేస్తున్నారు. ఇక వీరితో పాటు నగరంలోని వలస కూలీలు కూడా అత్యధికంగా వ్యాధి బారిన పడుతున్నారు. నిన్న ఒక్కరోజే 14 మంది వలస కూలీలకు సోకగా బల్దియా అధికారులు అనుమానంగా ఉన్న మిగతా వలస కూలీలకు పరీక్షలు నిర్వహిస్తున్నారు.

భాగ్యనగరంలో రోడ్లపైకి యథేచ్ఛగా జనం...

నగరంలో ఎలాంటి సడలింపులు ఇవ్వకపోయినా జనాలు మాత్రం రోడ్లపైకి భారీగా వస్తున్నారు. లాక్​డౌన్​ నిబంధనలు ఏ మాత్రం పాటించకుండా కూరగాయలు, పండ్ల దుకాణాల వద్ద గుంపులు గుంపులుగా తిరుగుతున్నారు. మార్కెట్ల వద్ద శానిటైజర్ల, మాస్కులు కూడా వాడట్లేదు. గ్రేటర్​ పరిధిలోని జీహెచ్​ఎంసీ ఎన్​ఫోర్స్​మెంట్ విభాగం ఆధ్వర్యంలో తనిఖీలు జరిపి లాక్​డౌన్​ నిబంధనలకు విరుద్ధంగా తెరిచిన 14 దుకాణాలను సీజ్​ చేశారు. అయితే నగరంలోని కొన్ని ప్రైవేటు కార్యాలయాలు, కార్యకలాపాలు నిర్వహిస్తున్నా.. రవాణా సౌకర్యం లేక ఉద్యోగులు ఇబ్బందిపడుతున్నారు.

ఇదీ చదవండి: 'మిగులు జలాల వినియోగంపై పూర్తి వివరాలు సమర్పించండి'