CM Jagan Inaugurated Oxygen Plants: ఆంధ్రప్రదేశ్లో 144 ఆక్సిజన్ ప్లాంట్లు ఏర్పాటు చేస్తున్నామని సీఎం జగన్ తెలిపారు. 32 ఆక్సిజన్ ప్లాంట్లు జాతికి అంకితం చేశామని పేర్కొన్నారు. ఆక్సిజన్ ప్లాంట్లను ప్రభుత్వం సొంతంగా ఏర్పాటు చేస్తోందని జగన్ స్పష్టం చేశారు. రాష్ట్రంలో 50 పడకలు దాటిన 133 ప్రభుత్వ ఆస్పత్రుల్లో ఆక్సిజన్ తయారీ ప్లాంట్లను సీఎం జగన్ వర్చువల్‌ విధానంలో సీఎం ప్రారంభించారు.
ఆదాయం తగ్గినా.. సంక్షేమం
50 పడకల ఆస్పత్రుల్లోనూ ఆక్సిజన్ ప్లాంట్లు ఏర్పాటు చేశామని సీఎం జగన్ అన్నారు. 100 పడకలకు పైగా ఉన్న 71 ప్రైవేట్ ఆస్పత్రుల్లో ప్లాంట్లకు 30 శాతం రాయితీ ఇచ్చినట్లు తెలిపారు. అన్ని ప్లాంట్లు పూర్తైతే 247 చోట్ల ఆక్సిజన్ తయారీకి అవకాశం ఉంటుందన్నారు. కొవిడ్ వల్ల రాష్ట్ర ప్రభుత్వానికి ఆదాయం తగ్గుతోందని.. ఆదాయం తగ్గినా ప్రజలకు సంక్షేమాన్ని అందిస్తున్నామని సీఎం జగన్ అన్నారు.
రాష్ట్ర వ్యాప్తంగా దాదాపు 144 ఆక్సిజన్ ప్లాంట్లకు ప్రారంభోత్సవం చేస్తున్నాం. ఇటీవల 32 ప్లాంట్లను జాతికి అంకితం చేశాం. ఇందుకోసం రూ. 424 కోట్ల నిధులు వినియోగిస్తున్నాం. మరో 71 చోట్ల ప్రైవేట్ ఆస్పత్రుల్లో సొంతంగా ఆక్సిజన్ ఉత్పత్తి చేసే ప్లాంట్లను నెలకొల్పడానికి 30 శాతం రాయితీ ఇస్తున్నాం. కొవిడ్ మహమ్మారి వల్ల రాష్ట్ర ప్రభుత్వ ఆదాయం తగ్గుతున్నా.. ప్రజా సంక్షేమమే లక్ష్యంగా పనిచేస్తున్నాం. --- జగన్
1000, 500 ఎల్‌పీఎం (లీటర్‌ ఫర్‌ మినిట్‌) సామర్థ్యంతో ఆక్సిజన్ తయారీ ప్లాంట్లను ఏర్పాటు చేశారు. అత్యధికంగా చిత్తూరు జిల్లాలో 21, తూర్పుగోదావరిలో 13, శ్రీకాకుళం, విశాఖ, కృష్ణా జిల్లాల్లో 12 చొప్పున ఈ ప్లాంట్లను నెలకొల్పారు. మరో 11 ప్లాంట్లు నిర్మాణంలో ఉన్నాయి. కొవిడ్ మూడో దశను ఎదుర్కొనే చర్యల్లో భాగంగా ఆక్సిజన్ పైపులైన్లు, నిల్వ కోసం ట్యాంకర్ల ఏర్పాటుతోపాటు ఆక్సిజన్ రవాణాకు 25 ట్యాంకర్లను కొనుగోలు చేసినట్లు ప్రభుత్వం పేర్కొంది.
ఇదీ చదవండి: అక్కడకు వెళ్లడానికి వీల్లేదు.. ఎమ్మెల్సీ జీవన్ రెడ్డిని అరెస్టు చేసిన పోలీసులు
