ఈ నెల 12న ప్రఖ్యాత పక్షిశాస్త్రవేత్త, "బర్డ్ మ్యాన్ ఆఫ్ ఇండియా" గా పేరుగాంచిన సలీం అలీ జయంతిని పురస్కరించుకుని నవంబర్ 5 నుంచి నవంబర్ 12 వరకూ 'సలీం అలీ బర్డ్ కౌంట్ ' పేరిట జాతీయ స్థాయి ఈవెంట్ను నిర్వహించాలని బోంబే నేచురల్ హిస్టరీ సొసైటీ నిర్ణయించింది. మహారాష్ట్రలో ఏటా వారం రోజుల పాటు నిర్వహించే పక్షి సప్తాహ్ను ఇందులో మిళితం చేస్తూ ఈ సారి 8 రోజులు జరిగేలా ఈ జాతీయ స్థాయి కార్యక్రమాన్ని చేపట్టింది. ప్రకృతి, పక్షులంటే ఆసక్తి ఉన్న ప్రతిఒక్కరినీ ఇందులో భాగస్వామ్యం చేసేలా సిటిజన్ సైన్స్ ప్రోగ్రాంగా ఈ కార్యక్రమాన్ని రూపొందించారు.
అందులో భాగంగా.. 8 రోజుల పాటు మనకి వీలయ్యే సమయాల్లో..మన పరిసరాల్లో కనిపించే విభిన్న రకాల పక్షులను వాటిని పరిశీలించటం, లెక్కపెట్టటం, ఫోటోలు తీయటం, వాటి ధ్వనులను వీలైతే రికార్డు చేయగలటం ద్వారా www.eBIRD.org/India అనే వెబ్ సైట్ లాగిన్ అయి నమోదు చేసే అవకాశాన్ని కల్పించింది.
ఎనిమిది రోజుల పాటు కనీసం రోజులో 15నిమిషాల పాటైనా ఉదయం, సాయంత్రం మన పరిసరాల్లో కనిపించే పక్షులను లెక్కపెట్టటం, వాటికి సంబంధించిన డేటాను వెబ్ సైట్ లో నిక్షిప్తం చేయటం ద్వారా వారి పరిశీలించేందుకు అవకాశం ఉంటుంది. ప్రత్యేకించి ఈ శీతాకాలంలో మన ప్రదేశాల్లో ఎలాంటి పక్షులు వస్తున్నాయి.. ఎంత సంఖ్యలో వస్తున్నాయి.. వాటి జీవనశైలి ఎలా ఉంది..ఏమన్నా మార్పులు ఉన్నాయా అనే అంశాలను ఓ అంచనాకి వచ్చేందుకు పక్షి శాస్త్రవేత్తలకు వీలు కలగనుంది.
దీంతో పాటు పక్షుల జీవనశైలిని గమనించటాన్ని మన దైనందిన జీవితంలో భాగస్వామ్యం చేసుకోవటం ద్వారా వాటి ఉపయోగాలు తెలుసుకోవటం, వాటి ఆవశ్యకతను మనంతట మనమే గ్రహించగలటం ఈ కార్యక్రమం ఏర్పాటుకు ముఖ్య కారణంగా నిర్వాహకులు అంటున్నారు. దేశవ్యాప్తంగా ఎక్కడైనా సరే ప్రజలు స్వచ్ఛందంగా ఈ కార్యక్రమంలో పాల్గొనటం ద్వారా తర్వాతి తరాలకు వాటి ఆవశ్యకతను వివరించేందుకు దోహదపడుతుందని బోంబే నేచురల్ హిస్టరి సొసైటీ కోరుతోంది.
