భూపాలపల్లి ఏరియాలోని కేటీకే 6వ గనిలో ఇద్దరు కార్మికులు మృతి చెందడం బాధాకరమని భాజపా రాష్ట్ర అధ్యక్షుడు బండి సంజయ్ అన్నారు. మృతులు కుటుంబాలకు ప్రగాఢ సానుభూతి తెలియజేశారు. పనిచేసే చోట కనీస రక్షణ చర్యలు తీసుకోకపోవడం వల్లే పైకప్పు కూలిందని ఆరోపించారు. అధికారులు అండర్ గ్రౌండ్ మైనింగ్లో భద్రతా నిబంధనలు పాటించలేదని మండిపడ్డారు.
ఈ ఘటనపై పూర్తి విచారణ జరిపి.. నిర్లక్ష్యంగా వ్యవహరించిన వారిపై చర్యలు తీసుకోవాలని డిమాండ్ చేశారు. తరచూ ఇలాంటి ఘటనలు జరుగుతున్నా ప్రభుత్వం పట్టించుకోవడం లేదని ఆవేదన వ్యక్తం చేశారు. కార్మికుల సంఖ్య తగ్గించి, ఉత్పత్తి పెంచి.. శారీరక, మానసిక ఒత్తిడి పెంచుతున్నారని విమర్శించారు. లాభాలే లక్ష్యంగా కాకుండా.. కార్మికుల భద్రతకు పెద్దపీట వేయాలని విజ్ఞప్తి చేశారు.
- ఇదీ చదవండి : 'సింగరేణి మృతుల కుటుంబాలకు రూ.కోటి పరిహారం ఇవ్వాలి'
