ఆంధ్రప్రదేశ్ అభివృద్ధికి కేంద్ర ప్రభుత్వం సహకారం అందిస్తోందని కేంద్ర జలశక్తి శాఖ మంత్రి గజేంద్రసింగ్‌ షెకావత్ అన్నారు. ఏపీ సీఎం జగన్‌తో కలిసి ఆయన పోలవరం పరిసర ప్రాంతాల్లో పర్యటించారు. ఇందుకూరు-1లో ఆర్‌అండ్‌ఆర్‌ పునరావాస కాలనీ, ఏనుగులగూడెంలో పోలవరం నిర్వాసితులతో మాట్లాడి వారి సమస్యలు తెలుసుకున్నారు. నిర్వాసితుల పునరావాస కాలనీని పరిశీలించారు. అనంతరం నిర్వహించిన కార్యక్రమంలో షెకావత్ మాట్లాడారు.
ఈ సందర్భంగా నిర్వాసితుల సమస్యలన్నీ తీర్చాల్సిన అవసరం ఉందని షెకావత్ పేర్కొన్నారు. పునరావాస కాలనీని పరిశీలించానని.. వసతులు బాగున్నాయని అన్నారు. పోలవరం పూర్తి చేసేందుకు కేంద్రం నుంచి సహాయ సహకారాలు అందిస్తామని కేంద్రమంత్రి చెప్పారు.
నిర్వాసితులకు ఇచ్చిన హామీలు నెరవేరుస్తాం: జగన్
ఆంధ్రప్రదేశ్‌కు పోలవరం ప్రాజెక్టు జీవనాడి అని..కేంద్ర ప్రభుత్వం నుంచి సహాయ సహకారాలు తీసుకుని దీన్ని పూర్తి చేయాల్సిన ఆవశ్యకత ఎంతైనా ఉందని ఆ రాష్ట్ర ముఖ్యమంత్రి జగన్ పేర్కొన్నారు. పునరావాస పనులపై అధికారులు మరింత దృష్టి పెట్టాల్సిన అవసరముందని చెప్పారు. పోలవరం ప్రాజెక్టు పూర్తయితేనే.. రాష్ట్రం సస్యశ్యామలం అవుతుందన్నారు. నిర్వాసితులకు గతంలో ఇచ్చిన హామీలను నెరవేరుస్తామని జగన్ స్పష్టం చేశారు. ఇదిలా ఉండగా.. జగన్ అధికారంలోకి వచ్చి నేటికి సరిగ్గా 1000 రోజులు పూర్తవుతోంది.
