ఏపీలోని అమరావతి ఎస్ఆర్ఎమ్ యూనివర్సిటీ(amaravati srm university) ఇంజినీరింగ్‌ మొదటి బ్యాచ్‌కు చెందిన వారు రాజర్షి మజుందర్, సప్తర్షి మజుందర్. పశ్చిమబెంగాల్‌లోని బుర్ద్వాన్‌లో జన్మించిన వీరిద్దరూ కవలలు. ఇద్దరికీ చిన్ననాటి నుంచే కంప్యూటర్, గేమింగ్‌ పట్ల అమితాసక్తి ఉండేది. గేమింగ్‌పై నైపుణ్యం సాధించి, కొత్త గేమ్‌లను అందుబాటులోకి తెచ్చి... ఆ రంగంలో పారిశ్రామికవేత్తలుగా ఎదగాలని కలలు కన్నారు. వీరిద్దరికీ ఉన్న మరో సారూప్యత... జపాన్‌ దేశం పట్ల మక్కువ. గేమింగ్‌, యానిమేషన్‌లో జపాన్‌ అగ్రగామిగా ఉండటంతో... చిన్ననాటి నుంచి ఆ దేశంపై ఇష్టం పెంచుకున్నారు. అక్కడి ప్రజలు, భాష(language), సంస్కృతి పట్ల ఆకర్షితులయ్యారు. అక్కడి సౌకర్యాలు, ఉద్యోగావకాశాలు, జీవన విధానంపై పదేళ్లుగా పరిశీలన చేశారు.
చదువులోనూ ఎంతో ప్రతిభ కనబరిచే సోదరులు... 12వ తరగతిలో 90 శాతం మార్కులతో అమరావతిలోని ఎస్ఆర్ఎమ్ విశ్వవిద్యాలయంలో ప్రవేశం సాధించారు. స్కాలర్‌షిప్‌తో బీటెక్‌ కంప్యూటర్ సైన్సు పూర్తి చేశారు. ప్రాంగణ ఎంపికల కోసం అనేక సంస్థలు, దేశాలతో ఒప్పందం చేసుకున్న ఎస్ఆర్ఎమ్ వర్సిటీ... జపాన్‌తోనూ మంచి సంబంధాలు నెరపుతోంది. జపనీస్ భాష(japanese language) నేర్చుకునే సౌలభ్యాన్ని విద్యార్థులకు కల్పించింది. 6 నెలల పాటు సోదురులిద్దరూ జపాన్‌ భాషను నేర్చుకుని పట్టు సాధించారు.
కరోనా కారణంగా జపాన్‌... గేమింగ్‌(gaming) రంగంలో ఇతర దేశస్థులకు ఉద్యోగావకాశాలు నిలిపేసింది. నిరాశ చెందని ఆ సోదరులు... కంప్యూటర్ సైన్స్‌(computer science) రంగంలో అవకాశాలు సద్వినియోగం చేసుకోవాలనుకున్నారు. గూగుల్ జపాన్‌ భాగస్వామ్య సంస్థ పి.వి.పి జపనీస్ భాషలో నిర్వహించిన మూడు రౌండ్ల ఇంటర్వూలో పాల్గొని... ఉద్యోగం సాధించారు. రెండేళ్ల పాటు క్లౌడింగ్‌లో పనిచేసేందుకు... ఏడాదికి 50 లక్షల రూపాయల ప్యాకేజీతో సంస్థ ఒప్పందం చేసుకుంది. గూగుల్ సంస్థలో అనుభవాన్ని... గేమింగ్‌ రంగంలో పారిశ్రామికవేత్తలుగా ఎదిగేందుకు ఉపయోగిస్తామని రాజర్షి, సప్తర్షి చెబుతున్నారు.
కవల సోదరుల ప్రతిభను ఎస్ఆర్ఎమ్ యూనివర్సిటీ అధ్యాపకులు ప్రశంసించారు. వారు మరింత ఉన్నత స్థానాలకు చేరుకోవాలని ఆకాంక్షించారు. ఈ ఏడాది సెప్టెంబర్ ఒకటో తేదీన జపాన్‌లో ఉద్యోగంలో చేరనున్న కవల సోదరులు.. దానికి ఏర్పాట్లు చేసుకుంటున్నారు.
ఇదీ చదవండి: KTR: కేటీఆర్‌ చొరవ.. చిన్నారికి పునర్జన్మ
