Pond Accidents in Telangana : నీటితో చెలగాటం ప్రాణాల మీదకు తెస్తోంది. మండే ఎండల నుంచి ఉపశమనం కోసం ఈత కొట్టేందుకు వెళ్లి మునిగి చనిపోతున్న వారి సంఖ్య రాష్ట్రంలో ఏటికేడు పెరుగుతోంది. ఇటీవల ఒక్కరోజే రాష్ట్రంలో ఆరుగురు బాలురు నీళ్లలో పడి చనిపోయారు. గతవారం వరంగల్‌ జిల్లా నర్సంపేట మండలంలో తాత, తండ్రి, కుమారుడు కూడా ఒకరిని కాపాడ్డానికి మరొకరు నీటిలో మునిగిపోయారు. తరచూ రాష్ట్రవ్యాప్తంగా ఇలాంటి ఉదంతాలు నమోదవుతున్నాయి. జలకాలాటలంటే ఎవరికైనా ఇష్టమే. అయితే కనీస జాగ్రత్తలు పాటించకుండా, ఏమాత్రం అవగాహన లేని చెరువులు, కుంటల్లోకి దిగుతుండటం వల్ల ప్రాణాపాయం తలెత్తుతోంది. ముఖ్యంగా ఎండ నుంచి ఉపశమనం కోసం వేసవిలో ఇలాంటి దుర్ఘటనలు ఎక్కువగా నమోదవుతుంటాయి.
ఇవీ కారణాలు
- Pond Accidents Increased in Telangana : గ్రామీణ ప్రాంతాల్లో చెరువులు, కుంటల్లో రకరకాల అవసరాల కోసం విచ్చలవిడిగా మట్టి తవ్వుతున్నారు. దాంతో పెద్దపెద్ద గోతులు ఏర్పడుతున్నాయి. నీళ్లు ఉన్నప్పుడు ఇవి బయటకు కనిపించవు. ఒడ్డునే అనుకుని దిగుతున్న పిల్లలు ఒక్కసారిగా మునిగిపోతున్నారు.
- కాపాడేందుకు వెళ్లి కూడా ఎక్కువమంది చనిపోతున్నారు. నలుగురైదుగురు స్నేహితులు కలిసి ఈతకు వెళ్తుంటారు. వారిలో ఒకరు మునిగిపోతుంటే కాపాడేందుకు మిగతా వారు ప్రయత్నించి, వారూ ప్రాణాల మీదకు తెచ్చుకుంటున్నారు.
- పట్టణాలు, నగర శివార్లలో క్వారీలు ఉంటున్నాయి. వర్షాలు పడ్డప్పుడు ఇవి నిండిపోతాయి. వాటిలో ఈత కొట్టేందుకు వెళ్లి మరికొందరు మృత్యువాతపడుతున్నారు. చెరువులు, కుంటల కంటే ఇవి మరింత ప్రమాదకరం. నిట్ట నిలువుగా, చాలా లోతులో ఉంటాయి. కాబట్టి కాలు పెడితే మునిగిపోయినట్లే. జలపాతాల వద్ద కూడా ఇదే పరిస్థితి.
కాపాడేవారూ జరభద్రం
Accidents in Pond in Telangana : కళ్లముందే ఎవరైనా మునిగిపోతుంటే ఒడ్డున ఉన్నవారికి వెంటనే ఏమీ తోచదు. ముందూ వెనుక ఆలోచించకుండా వారిని కాపాడటం కోసం నీళ్లలోకి దూకేస్తుంటారు. ఇదీ ప్రమాదమే. రక్షించడానికి వెళ్లేవారు తగిన జాగ్రత్తలు పాటించాలి. వీలైతే ఒడ్డుమీది నుంచే తాడు, తువ్వాలు వంటివి అందించి బయటకు లాగాలి. లేకపోతే నీళ్లలో తేలియాడే బెండు, గాలితో నిండిన ప్లాస్టిక్‌ డబ్బాలు, వాహనాల ట్యూబుల్లాంటివి అందుబాటులో ఉంటే వాటి సాయంతో కాపాడేందుకు ప్రయత్నించాలి.
ఈత వస్తేనే నీటిలో దిగాలి. ఒంటి మీద దుస్తులతో నీటిలోకి దిగితే వాటి బరువు ఇబ్బందిగా మారుతుంది. బాధితులను తక్షణం కాపాడాల్సిన పరిస్థితుల్లో 20 సెకన్లలో వారిని చేరడానికి ప్రయత్నించాలి. లోదుస్తులు మాత్రమే ఉంచుకుని, చొక్కా నోట కరచుకుని నీట్లోకి దిగితే.. మునిగిపోతున్నవారికి ఆసరా అందించడానికి వీలుంటుంది.
పెరుగుతున్న మరణాలు
సాగునీటి ప్రాజెక్టులు కొత్తవి రావడం.. వేసవిలోనూ రాష్ట్రవ్యాప్తంగా చెరువులు, కుంటలు నీళ్లతో తొణికిసలాడుతుండటంతో చాలామంది జలకాలకు సరదా పడుతున్నారు. జాతీయ నేరాల నమోదు సంస్థ (ఎన్‌.సి.ఆర్‌.బి.) గణాంకాల ప్రకారం 2019లో రాష్ట్రంలో నీట మునిగి 882 మంది చనిపోతే 2020 నాటికి ఈ సంఖ్య 1,368కి పెరిగింది.
పసివారే అత్యధికం
నీళ్లలో మునిగి చనిపోతున్న వారిలో 12 - 20 ఏళ్లలోపు వారే ఎక్కువగా ఉంటున్నారు. మొత్తం మరణాల్లో దాదాపు సగం వీరే ఉంటారని పోలీసులు చెబుతున్నారు. ఈత రాకున్నా నీళ్లలోకి దిగడమే దీనికి కారణంగా కనిపిస్తోంది.
ఈ జాగ్రత్తలు అవసరం
ఈత రాకుండా నీటిలో దిగవద్దు. ఒకవేళ ఈత నేర్చుకోవాలి అనుకుంటే మునిగిపోకుండా కాపాడే ఉపకరణాల సాయంతో నేర్చుకోవాలి. లోతు లేని జలవనరుల్లో ఈత బాగా తెలిసిన వారి సాయంతో ప్రయత్నించాలి.
ప్రాణాలు నిలిపే ప్రథమ చికిత్స
- మునిగిపోయినవారి ఊపిరితిత్తుల్లోకి నీరు చేరుతుంది కనుక ఎంత త్వరగా బయటకు తీసుకురాగలిగితే అంత మంచిది.
- బాధితుల్ని తలకిందులుగా పట్టుకోవడం లేదా నేలమీద పడుకోబెట్టి ఛాతీ మీద గట్టిగా వత్తడం ద్వారా ఊపిరితిత్తులు, కడుపులో ఉన్న నీళ్లు బయటకు వచ్చేలా చూడాలి.
- నోట్లో నోరు పెట్టి గాలి ఊది కృత్రిమ శ్వాస అందించాలి.
- హృదయ స్పందన లేకపోయినా, ఊపిరితిత్తులు శ్వాస తీసుకోలేని పరిస్థితుల్లో ఉన్నా వెంటనే ఛాతీ మీద నొక్కుతూ చేసే హృదయ, శ్వాసకోశ పునరుజ్జీవన చర్య (కార్డియో పల్మనరీ రెససిటేషన్‌ - సీపీఆర్‌) మొదలుపెట్టాలి.
- వీలైనంత త్వరగా ఆసుపత్రికి తరలించాలి.
