కుటుంబ సమస్యలతో తనువు చాలిద్దామని నిర్ణయించుకున్న ఆ యువతి... చివరిసారిగా తన ఆవేదనను తన అభిమాన నటుడు సోనూసూద్తో వెళ్లబోసుకుందామని నిశ్చయించుకుంది. హైదరాబాద్లో ఉన్నాడని తెలియగానే... నాగర్కర్నూల్ నుంచి ఒంటరిగా వచ్చేసింది. ఎలాగైనా తనని కలవాలని... తనతో కాసేపు మాట్లాడలని ఎంతో ఆతృతగా ఎదురుచూస్తోంది. మనిషి రూపంలో ఉన్న దేవుడిగా సోనూసూద్ను అభివర్ణిస్తున్న ఆ అభిమాని... ఆయన్ని కలవనిదే ఇంటికి వెళ్లనంటోంది.
ఈ క్రమంలో ఆమె అభ్యర్థనను అర్థం చేసుకున్న ఈటీవీ భారత్... ఆ అభిమాని ఎవరి చేతుల్లో మోసపోకుండా జాగ్రత్తలు తీసుకుంది. బర్న్ టూ షైన్ స్వచ్ఛంద సంస్థ నిర్వాహకులు, లేక్ వ్యూ పోలీసులకు సమాచారం అందించింది. బర్న్ టూ షైన్ ఫౌండర్ నిహారి ఆ యువతిని చేరదీసి.. అల్పాహారం అందించి తన వివరాలు అడిగి తెలుసుకున్నారు. బాధితురాలు కుటుంబ సమస్యలతో ఆత్మహత్య చేసుకోవాలని నిశ్చయించుకుందని... చివరిసారిగా సోనూసూద్ను కలిసి తన గోడు వెళ్లబోసుకుందామని నిర్ణయం తీసుకొని హైదరాబాద్కు వచ్చిందని తెలుసుకున్నారు. నటుడు సోనూసూద్తో మాట్లాడి ఆమెను కలిపించే ప్రయత్నం చేస్తామని పేర్కొన్నారు.
