హైదరాబాద్లోని వేర్వేరు ప్రాంతాల్లో ట్రాఫిక్ నిబంధనల ఉల్లంఘనలకు సంబంధించి 69 పెండింగ్‌ చలానాలు ఉన్న ఓ ద్విచక్రవాహనదారుడు సుల్తాన్‌బజార్‌ ట్రాఫిక్ పోలీసులకు చిక్కాడు. ఇన్‌స్పెక్టర్‌ సుమన్‌కుమార్‌ ఆధ్వర్యంలో సిబ్బంది శుక్రవారం ఉదయం 11.30 గంటల ప్రాంతంలో వాహనాల తనిఖీలు నిర్వహిసున్నారు. ఇంతలో ద్విచక్రవాహనం(టీఎస్‌12ఈజీ- 8524)పై అటుగా వచ్చిన పాతబస్తీ మచలికమాన్‌ ప్రాంతానికి చెందిన రిషబ్‌గుప్తాను నిలిపారు.
వాహనం నంబర్పై 69 చలానాలతో సుమారు రూ.21,270 పెండింగ్‌లో ఉన్నట్లు గుర్తించారు. పోలీసులు వెంటనే వాహనాన్ని స్వాధీనం చేసుకున్నారు. ఆ చలానాలకు సంబంధించి మొత్తం బిల్లును వాహనదారుడు చెల్లించగా... బండిని విడుదల చేసినట్లు ఇన్‌స్పెక్టర్‌ సుమన్‌కుమార్‌ తెలిపారు.
