KTR Basara Tour: నిర్మల్ జిల్లా బాసర ఆర్జీయూకేటీలో గత కొంత కాలంగా నెలకొన్న సమస్యలను పరిష్కరించేందుకుగానూ విద్యార్థులతో నేరుగా మాట్లాడడానికి రాష్ట్ర మంత్రులు కేటీఆర్, సబితా ఇంద్రారెడ్డి, ఇంద్రకరణ్‌ రెడ్డి, శ్రీనివాస్‌ గౌడ్‌ వర్సిటీ విద్యార్థులతో సమావేశమయ్యారు. మధ్యాహ్నం ఆర్జీయూకేటీకి చేరుకున్న మంత్రులు విద్యార్థులను కలిసి వారితో మాట్లాడారు. పూర్తిస్థాయి వీసీ, బోధకులను నియమించాలని, ఇతర డిమాండ్లను పరిష్కరించాలంటూ జూన్‌లో ఆర్జీయూకేటీ విద్యార్థులు నిరసన తెలిపిన విషయం తెలిసిందే. జూన్‌ 20న మంత్రి సబితా హామీ మేరకు విద్యార్థులు ఆందోళన విరమించారు.
గాంధీ సత్యాగ్రహం ఎలా చేశారో.. అలానే శాంతియుతంగా సమ్మె చేశారని ఐటీ, పారిశ్రామిక మంత్రి కేటీఆర్ కొనియాడారు. సమస్యల పరిష్కారం కోసం విద్యార్థులే ఆందోళన చేయడం నచ్చిందని హర్షం వ్యక్తం చేశారు. రాజకీయ పార్టీలకు అవకాశం ఇవ్వకుండా 'మీ అంతట మీరే ఆందోళన' బాగుందని కేటీఆర్ అన్నారు. ప్రజాస్వామికంగా నిరసన తెలిపే హక్కు అందరికీ ఉంటుందని తెలిపారు. ఇవాళ ఆదిలాబాద్ జిల్లా పర్యటనకు వెళ్లిన కేటీఆర్ జోగురామన్న కుటుంబాన్ని పరామర్శించిన అనంతరం నిర్మల్ జిల్లాలోని బాసర ఆర్జీయూకేటీ విద్యార్థుల సమావేశంలో పాల్గొని మాట్లాడారు.
నవంబర్‌లో అందరికీ ల్యాప్‌టాప్‌లు.. '2 నెలల తర్వాత సబితా ఇంద్రారెడ్డిని ఇక్కడికి తీసుకొస్తా. నవంబర్‌లో అందరికీ ల్యాప్‌టాప్‌లు ఇస్తాం. మళ్లీ వచ్చేసరికి ఆర్జీయూకేటీ ఆడిటోరియంలో మార్పులు చేయాలి. మీ ఆందోళనలు పత్రికలు, టీవీల్లో చూస్తునే ఉన్నా. రాజకీయ పార్టీలకు అవకాశం ఇవ్వకుండా మీ అంతట మీరే ఆందోళన చేశారు. విద్యావ్యవస్థను కొవిడ్‌ అతలాకుతలం చేసేసింది. భవన నిర్మాణం చేయడం తేలిక, వసతుల నిర్వహణ సవాల్‌తో కూడుకున్నది' అని కేటీఆర్ వ్యాఖ్యానించారు.
హాస్టల్‌ కష్టాలు ఎలా ఉంటాయో నాకు తెలుసు.. 'సంతృప్తికర స్థాయిలో సౌకర్యాలు, వసతులు కల్పించాలని విద్యార్థులు కోరారు. 70 శాతం నా జీవితం హాస్టల్‌లోనే గడిచింది. హాస్టల్‌ కష్టాలు ఎలా ఉంటాయో నాకు తెలుసు. సమస్యలు అర్థం చేసుకుని పరిష్కరించేందుకు సమయం పడుతుంది. విద్యార్థులకు నాణ్యమైన భోజనం అందించేందుకు చర్యలు తీసుకుంటాం' అని కేటీఆర్ పేర్కొన్నారు.
ఈ సంస్థ మీదే.. మీరే కాపాడుకోవాలి.. క్రీడల కోసం రూ.3 కోట్లతో మినీస్టేడియం ఏర్పాటు చేస్తామని కేటీఆర్ హామీ ఇచ్చారు. 6 నుంచి 8 నెలల్లో మినిస్టేడియం పూర్తి చేస్తామని తెలిపారు. డిజిటల్ ల్యాబ్‌లు ఏర్పాటు చేస్తామని పేర్కొన్నారు. అదనంగా 50 ఆధునీక తరగతి గదులు సమకూరుస్తామన్నారు. 'ఈ సంస్థ మీదే.. మీరే కాపాడుకోవాలని' విద్యార్థులకు కేటీఆర్ సూచించారు. క్యాంపస్‌లో శుభ్రత పాటించడంలో విద్యార్థులకు బాధ్యత ఉంటుందని గుర్తు చేశారు. క్యాంపస్‌లో నెలకోసారి శ్రమదానం నిర్వహిస్తామని కేటీఆర్ తెలిపారు.
విద్యార్థుల నుంచే కొత్త ఆవిష్కరణలు రావాలి.. 'అతి తక్కువ జనాభా ఉన్న అమెరికా నుంచి ఆకర్షించే ఉత్పత్తులు వస్తున్నాయి. అత్యంత జనాభా ఉన్న మన దేశం నుంచి ఉత్పత్తులు రావడం లేదు ఎందుకు. ఉద్యోగం చేయడం కాదు... ఉద్యోగాలు కల్పించే స్థాయిలో ఉండాలి. ఇన్నోవేషన్‌ అంటే ఎవరికీ అర్థం కాని బ్రహ్మపదార్థం కాదు. విద్యార్థుల నుంచే కొత్త ఆవిష్కరణలు రావాలి. ప్రతిసంవత్సరం ఇన్నోవేషన్‌ వారోత్సవాలు ఇక్కడ జరగాలి. ఇక్కడి నుంచే కొత్త ఆవిష్కరణలు రావాలి. ఉత్పత్తిలో సత్తా ఉంటే ప్రపంచవ్యాప్తంగా గుర్తింపు వస్తుంది. ఐటీ, విద్యాశాఖ సంయుక్తంగా ఇన్నోవేషన్‌ ల్యాబ్‌ను ఏర్పాటు చేస్తాం' అని కేటీఆర్ అన్నారు.
ఇవీ చదవండి:
