పెట్టుబడి, బీమా, పన్ను మినహాయింపు ఇలా పలు ప్రయోజనాలను కల్పించే యులిప్‌లు ఇప్పుడు కొత్త ప్రయోజనాలనూ జోడిస్తున్నాయి. ఎలాంటి ఫండ్లలో మదుపు చేయాలని నిర్ణయించుకునే స్వేచ్ఛా పాలసీదారుడికి కల్పిస్తున్నాయి. దీనికోసం బీమా సంస్థలు ఉచిత స్విచ్ఛింగ్‌నూ అందిస్తున్నాయి. సరైన పెట్టుబడి వ్యూహం అనుసరిస్తే.. పాలసీ కొనసాగుతున్న వ్యవధిలో సంపదను పెంచుకునేందుకూ వీటి ద్వారా వీలవుతుంది. పాలసీ ముగిసిన తర్వాత వచ్చే ప్రయోజనాలను ఒకేసారి వెనక్కి తీసుకోవచ్చు. లేదా నిర్ణీత కాలంపాటు ఆదాయంగా అందుకోవచ్చు.
క్రమశిక్షణతో..
యులిప్‌లను ఎంచుకున్నప్పుడు క్రమంగా దీనికి ప్రీమియం చెల్లించాల్సి ఉంటుంది. నెలనెలా, మూడు, ఆరు నెలలకోసారి లేదా ఏడాదికోసారి ప్రీమియం చెల్లించే వీలుంటుంది. మీ ఆదాయం, ఇతర ఖర్చులను బట్టి, ప్రీమియం చెల్లింపు వ్యవధిని నిర్ణయించుకోవచ్చు. ఆర్థిక క్రమశిక్షణతో ప్రీమియం చెల్లిస్తూ.. సంపదను పెంచుకునేందుకు వీలు కల్పిస్తుంది.
సగటు ప్రయోజనం..
ఒకేసారి పెట్టుబడి పెట్టినప్పుడు మార్కెట్‌ సూచీలు తక్కువ, ఎక్కువ అనే లెక్క ఉండదు. దీనివల్ల కొన్నిసార్లు ఇబ్బందులు రావచ్చు. దీనికి భిన్నంగా క్రమంగా పెట్టుబడులు పెట్టినప్పుడు మార్కెట్‌ అన్ని దశల్లోనూ పాలు పంచుకునే అవకాశం లభిస్తుంది. ఫలితంగా రూపాయి సగటు ప్రయోజనాన్ని పొందేందుకు యులిప్‌లు వీలు కల్పిస్తాయి. మీ పెట్టుబడి వ్యయం తగ్గి, నికర రాబడి పెరిగేందుకు వీలవుతుంది.
వృద్ధికి అవకాశం..
యులిప్ తీసుకున్నప్పుడు పాలసీ, చెల్లింపు వ్యవధుల ఆధారంగా ప్రీమియాన్ని చెల్లిస్తూ ఉంటాం. పాలసీ గడువు తీరిన తర్వాత ఒకేసారి వెనక్కి తీసుకోకుండా.. అవసరం మేరకే ఉపసంహరించుకునే వీలూ ఉంటుంది. కాబట్టి, పెట్టుబడిని మార్కెట్లో కొనసాగిస్తూనే ఉండొచ్చు. దీనివల్ల మీ పెట్టుబడి వృద్ధికి అవకాశం ఉంటుంది. కాబట్టి, మరింత రాబడిని అందుకోవచ్చు.
దీర్ఘకాలం కొనసాగే వీలు..
పెట్టుబడులను ఎప్పుడూ దీర్ఘకాలం కొనసాగించాలి. యులిప్‌లు సాధారణంగా దీర్ఘకాలిక పథకాలు. కాబట్టి, స్వల్పకాలిక అస్థిరతను తట్టుకునేందుకు ఇవి తోడ్పడతాయి. అదే సమయంలో మార్కెట్‌ హెచ్చుతగ్గులతో సంబంధం లేకుండా పెట్టుబడులు కొనసాగుతుంటాయి. ఫలితంగా నష్టభయం తగ్గేందుకు అవకాశం లభిస్తుంది.
ఆర్థికంగా రక్షణ..
ప్రతి వ్యక్తీ తన కుటుంబానికి ఆర్థిక భరోసా కల్పించేందుకు జీవిత బీమా పాలసీ తీసుకోవాలి. అదే సమయంలో కుటుంబానికి క్రమం తప్పని ఆదాయ వనరును ఏర్పాటు చేసేందుకూ ప్రయత్నించాలి. వారికి ఆర్థిక ప్రణాళికలు సులువుగా అర్థం అయ్యేలా ఉండాలి. దీనికి యులిప్‌లు సరిపోతాయని చెప్పొచ్చు. సరైన బీమా కోసం రక్షణకే పరిమితం అయ్యే పాలసీలను మర్చిపోవద్దు.
ఆదాయపు పన్ను చట్టం 1961, సెక్షన్‌ 80సీ ప్రకారం యూనిట్‌ ఆధారిత పాలసీలకు చెల్లించిన ప్రీమియానికి రూ.1,50,000 పరిమితికి లోబడి పన్ను మినహాయింపు లభిస్తుంది. వచ్చిన ప్రయోజనాలకూ సెక్షన్‌ 10(10డి) ప్రకారం మినహాయింపు ఉంటుంది.
- సమీర్‌ జోషి, చీఫ్‌ ఏజెన్సీ ఆఫీసర్‌, బజాజ్‌ అలియాంజ్‌ లైఫ్‌ ఇన్సూరెన్స్.
ఇవీ చదవండి: పండుగకు బంగారం కొనాలా? అయితే బ్యాడ్ న్యూస్!
ట్విట్టర్ కొనుగోలుకు మస్క్ ఓకే.. డీల్ పునరుద్ధరణ కోసం సంస్థకు లేఖ
