Twitter New CEO : ప్రముఖ సామాజిక మాధ్యమం ట్విట్టర్ సీఈఓ ఎలాన్ మస్క్.. తన పదవి నుంచి వైదొలగనున్నారు. ట్విట్టర్కు కొత్త చీఫ్‌ ఎగ్జిక్యూటివ్‌ ఆఫీసర్‌ను ఎంపిక చేసినట్లు మస్క్ ప్రకటించారు. ఆరు వారాల్లో ట్విట్టర్ నూతన CEO బాధ్యతలు చేపట్టనున్నారని స్పష్టం చేశారు. ట్విట్టర్ నూతన CEOగా ఎంపికచేసిన మహిళ పేరును మాత్రం మస్క్ వెల్లడించలేదు. ట్విట్టర్లో తాను కార్యనిర్వాహక అధ్యక్షుడిగా కొనసాగుతానని వివరించారు. ఉత్పత్తి, సాఫ్ట్‌వేర్‌, సిసోప్స్‌లను పర్యవేక్షిస్తానని పేర్కొన్నారు.
గతేడాది నవంబర్‌లోనే ట్విట్టర్లో తన సమయాన్ని కుదించుకుంటానని మస్క్ తెలిపారు. మస్క్ తాజా నిర్ణయంతో టెస్లా పెట్టుబడిదారుల ఆందోళన తగ్గింది. ఆ సమయాన్ని మస్క్.. టెస్లా కోసం కేటాయిస్తారని వారు ఆశిస్తున్నట్లు సమాచారం. ట్విటర్‌కు కొత్త సీఈఓ నిర్ణయం మస్క్ ప్రకటించగానే.. టెస్లా షేర్లు 2.4 శాతం పెరిగాయి. అంతకుముందు డిసెంబర్లో ట్విట్టర్ సీఈఓగా కొనసాగాలా? లేక వైదొలగాలా? అని ప్రశ్నిస్తూ మస్క్ పోల్ నిర్వహించారు. ఈ పోల్‌లో ఎక్కువ మంది యూజర్లు ఆయనకు వ్యతిరేకంగా ఓటు వేశారు. వారి నిర్ణయానికి అంగీకరించిన ఆయన ఆ పదవి నుంచి తప్పుకుంటున్నట్లు ప్రకటించారు. తన స్థానంలో వేరే వ్యక్తి వచ్చే వరకు ఆ స్థానంలో కొనసాగుతానని తెలిపారు.
వెరిఫైడ్ యూజర్లకు ముందుగానే ఎన్క్రిప్ట్ మసేజ్ సర్వీస్
నూతన CEO విషయాన్ని ప్రకటించకముందే మరో కొత్త అప్డేట్ను అందుబాటులోకి తీసుకువచ్చారు మస్క్. ట్విట్టర్ కొత్తగా తీసుకువస్తున్న ఎన్క్రిప్టిడ్ మెసేజింగ్ సర్వీస్ను వెరిఫైడ్ యూజర్లకు ముందుగానే అందుబాటులోకి వస్తున్నట్లు చెప్పారు. కానీ దీనిని ఇప్పుడే పూర్తిగా నమ్మకండి అని ట్వీట్ చేశారు.
ట్విట్టర్లో వాట్సాప్ తరహా ఫీచర్స్!
అంతకుముందు బుధవారం ట్విట్టర్ కీలక ప్రకటన చేసింది. వాట్సాప్లో ఉన్న వాయిస్, వీడియో కాలింగ్ ఫీచర్లను త్వరలోనే ట్విట్టర్లోనూ తీసుకొస్తున్నట్లు వెల్లడించారు ఆ సంస్థ అధినేత ఎలాన్ మస్క్. "ట్విట్టర్ లేటెస్ట్ వెర్షన్ యాప్తో.. ట్వీట్ థ్రెడ్లోని ఏదైనా మెసేజ్కు మీరు డీఎం (డైరెక్ట్ మెసేజ్) చేయవచ్చు. ఎమోజీ రియాక్షన్స్ ఇవ్వొచ్చు. ఎన్క్రిప్టెడ్ DMs V1.0 గురువారమే అందుబాటులోకి వస్తుంది. తర్వాత మరింత అప్డేట్ అవుతుంది. మీ డైరెక్ట్ మెసేజ్లను నేను కూడా చూడలేనంతగా ఎన్క్రిప్ట్ చేయడమే అసలు పరీక్ష. మీ ట్విట్టర్ హ్యాండిల్ నుంచి ఎవరితోనైనా వాయిస్, వీడియో చాట్ చేసే అవకాశం త్వరలోనే వస్తుంది. అదే జరిగితే.. మీ మొబైల్ నంబర్ ఇవ్వకుండానే ఈ ప్రపంచంలో ఎవరితోనైనా మీరు మాట్లాడవచ్చు." అని బుధవారం ఓ ట్వీట్ చేశారు ఎలాన్ మస్క్.
ఇవీ చదవండి : పిక్సెల్‌ 7ఏ, ఫోల్డ్‌, ట్యాబ్లెట్‌.. AIపై ప్రత్యేక దృష్టి.. గూగుల్‌ నయా అప్డేట్లు ఇవే!
వాట్సాప్ వాడకపోయినా మన మాటలు రికార్డ్!.. ఆధారాలతో బట్టబయలు.. కేంద్రం సీరియస్!
