Twitter engineer video: 'ట్విట్టర్ భావప్రకటన స్వేచ్ఛను నమ్మదు.. ఆ సంస్థలో కొనసాగాలంటే ఉద్యోగులు తమ సిద్ధాంతాలను పక్కన పెట్టి ట్విట్టర్ అనుసరించే కమ్యూనిస్ట్ సిద్ధాంతాలనే నమ్మాలి.. ట్విట్టర్ను మస్క్ కొనుగోలు చేయడం ఉద్యోగులకు నచ్చలేదు'.. ఈ మాటలు ఎవరో నెటిజన్ చేసిన కామెంట్ కాదు.. స్వయంగా ఆ సంస్థలో పనిచేసే ఓ ఉద్యోగి అన్నారు. ప్రస్తుతం ఇందుకు సంబంధించిన వీడియో సోషల్ మీడియాలో వైరల్గా మారింది. అమెరికాకు చెందిన ప్రాజెక్ట్ వెరిటాస్ అనే గ్రూప్ షేర్ చేసిన ఈ వీడియో ట్విట్టర్ను కొత్త చిక్కుల్లో పడేసింది. సిరు మురుగేశన్గా పేర్కొంటున్న ఆ వ్యక్తి మరికొన్ని ఆసక్తికర వ్యాఖ్యలు చేశారు. ఈ వీడియోను సోషల్ మీడియాలో షేర్ చేసింది ప్రాజెక్ట్ వెరిటాస్.
ప్రాజెక్ట్ వెరిటాస్ ప్రకారం.. ట్విట్టర్లో సీనియర్ ఇంజినీర్గా పనిచేస్తున్న సిరు మురుగేశన్.. సంస్థ వైఖరిపై కీలక వ్యాఖ్యలు చేశారు. ఎలాన్ మస్క్ 44 బిలియన్ డాలర్లు పెట్టి సంస్థను కొనుగోలు చేసే డీల్పై ఉద్యోగులు ఆగ్రహం వ్యక్తం చేశారని మురుగేసన్ తెలిపారు. సంస్థ పూర్తిగా వామపక్షవాది అని.. మతతత్వవాదులను అసలు సహించదని పేర్కొన్నారు.
"ట్విట్టర్ సంస్థలో అంతా పూర్తి కమ్యూనిస్టు వాతావరణం ఉంటుంది. అందుకే మస్క్ సంస్థను కొనుగోలు చేసే ప్రతిపాదనను నా సహోద్యోగులు అసలు సహించలేకపోయారు. మస్క్ సంస్థను కొంటానని ప్రతిపాదించిన రోజు నా తోటి ఉద్యోగులంతా 'ఇది నిజమైతే కంపెనీలో ఇదే నా ఆఖరి రోజు' అన్నట్టు స్పందించారు. టిట్టర్ సిద్ధాంతాలకు విరుద్ధంగా మస్క్ సంస్థలు నడవడమే అందుకు కారణం. ఆయన క్యాపిటలిస్ట్.. కానీ మా సంస్థ మాత్రం క్యాపిటలిస్ట్ సిద్ధాంతంలో లేదు. నిజానికి మేమంతా కమ్యూనిస్టులం."
-సిరు మురుగేశన్, సీనియర్ ఇంజినీర్ - ట్విట్టర్
మస్క్ ట్విట్టర్ కొనుగోలు ప్రక్రియను ఆపేందుకు తమ సంస్థ ఉద్యోగులు అన్ని విధాలా ప్రయత్నించారన్నారు మురుగేశన్. సంస్థ బదిలీ ప్రక్రియ మొదలైనప్పటి నుంచి ఉద్యోగాలు పోతాయేమో అని ఉద్యోగులలో ఆందోళన మొదలైందన్నారు.
మస్క్ ట్విస్ట్.. ట్విట్టర్ను 44 బిలియన్ డాలర్లకు కొనుగోలు చేస్తానని భారీ ఆఫర్ ప్రకటించిన ఎలాన్ మస్క్.. ఇప్పుడు అంత భారీ మొత్తం చెల్లించే ఆలోచనను విరమించుకున్నట్లు తెలుస్తోంది. ట్విట్టర్ అంత కన్నా తక్కువకే కొనాలని భావిస్తున్నట్లు మస్క్ హింట్ ఇచ్చారు. 'తక్కువ ధరకే కీలక ఒప్పందాన్ని కుదుర్చుకోవడం అసాధ్యం ఏమీ కాదు' అని మస్క్ సోమవారం జరిగిన మియామీ టెక్నాలజీ కాన్ఫరెన్స్లో పేర్కొన్నారు. ఈ వ్యాఖ్యలు ట్విట్టర్ కొనుగోలును ఉద్దేశించే చేసినవే అని తెలుస్తోంది. ట్విట్టర్లోని ఫేక్ అకౌంట్లు, స్పామ్ ఎక్కువగా ఉండటం వల్ల ఆ సంస్థ కొనుగోలు ప్రక్రియను తాత్కాలికంగా నిలిపివేస్తున్నట్లు మస్క్ ఇప్పటికే ప్రకటించారు.
ట్విట్టర్లోకి ట్రంప్.. ట్విట్టర్లో నిషేధానికి గురై సొంత సోషల్ మీడియా ప్లాట్ఫామ్ ఓపెన్ చేసిన అమెరికా మాజీ అధ్యక్షుడు డొనాల్డ్ ట్రంప్.. ఇప్పుడు మళ్లీ ట్విట్టర్లోకి పరోక్షంగా రీఎంట్రీ ఇచ్చారు. ట్విట్టర్లో సొంత ఖాతాతో పోస్ట్లు షేర్ చేసుకునే అవకాశం లేకపోవడం వల్ల ఆయన స్థాపించిన 'ట్రూత్ సోషల్' నుంచి పోస్ట్లను ట్విట్టర్లో షేర్ చేస్తున్నారు. ఇకపై ట్రంప్ ప్రతి పోస్ట్ను ట్విట్టర్లో షేర్ చేస్తామని ట్రూత్ సోషల్ ప్రకటించింది.
ఇదీ చూడండి : 8 ఏళ్లు.. 30 కొనుగోళ్లు.. 2014 నుంచి అదానీ సామ్రాజ్య విస్తరణ ఇలా..
