Twitter Elon Musk: ట్విట్టర్లో భారీ స్థాయిలో పెట్టుబడులు పెట్టి, ఆ సామాజిక మాధ్యమంలో కీలక మార్పులు ఖాయమని సంకేతాలిచ్చిన వ్యాపార దిగ్గజం, టెస్లా అధినేత ఎలాన్ మస్క్.. అనూహ్య నిర్ణయం తీసుకున్నారు. ట్విట్టర్లో 9.2శాతం వాటా కొనుగోలు చేసినా.. ఆ సంస్థ బోర్డ్లో డైరెక్టర్గా చేరేందుకు నిరాకరించారు. ట్విట్టర్ సీఈఓ పరాగ్ అగర్వాల్ సోమవారం ఈ విషయాన్ని వెల్లడించారు.
Twitter Board Musk Parag: "బోర్డ్లో చేరడంపై నేను, ఇతర డైరెక్టర్లు మస్క్తో చాలాసార్లు చర్చించాం. సంస్థ ప్రయోజనాల కోసం అందరూ కలిసి పనిచేయడం, ఇందులో ఉన్న రిస్క్లు.. ఇలా అన్నింటిపైనా సమాలోచనలు జరిపాం. సంబంధిత ప్రక్రియలన్నీ పూర్తయ్యాక మస్క్ బోర్డ్ సభ్యునిగా చేరతారని ఇటీవల ప్రకటించాం. అయితే.. బోర్డ్లో చేరడం లేదని మస్క్ నాకు చెప్పారు. ఇది కూడా మంచికే అనుకుంటున్నా. బోర్డ్లో సభ్యునిగా ఉన్నా లేకపోయినా భాగస్వామ్యపక్షాల సలహాలు, సూచనలు మేము స్వీకరిస్తాం. మస్క్ మన అతిపెద్ద వాటాదారు కాబట్టి ఆయన ఇన్పుట్స్కు ఎప్పుడూ విలువ ఉంటుంది. కొన్ని అవాంతరాలు ఎదురైనా.. మన లక్ష్యాలు, ప్రాథమ్యాలు మారవు. నిర్ణయాలు తీసుకుని, అమలు చేసే అధికారం మన చేతుల్లోనే ఉంటుంది. కాబట్టి ఇవన్నీ మర్చిపోయి మన పనిపైనే దృష్టిపెడదాం" అని ట్విట్టర్ ఉద్యోగులకు జారీ చేసిన నోట్లో పేర్కొన్నారు పరాగ్.
ట్విట్టర్ను మార్చేస్తారా?: ట్విట్టర్లో చాలా యాక్టివ్గా ఉండే మస్క్... ఆ సంస్థలో ఇటీవలే వాటాదారుగా మారారు. ఆ తర్వాత ఆయన చేసిన ట్వీట్ చర్చనీయాంశమైంది. ట్విట్టర్లో ఎడిట్ బటన్ తీసుకురావాలా అన్న ఆయన ప్రశ్నకు నెటిజన్ల నుంచి భారీ స్పందన వచ్చింది. మస్క్ ఇప్పుడు ట్విట్టర్లో భాగస్వామి కాబట్టి.. త్వరలో ఆ ఫీచర్ రావడం ఖాయమని అంతా భావించారు.
ఆదివారం మస్క్ ఇదే తరహాలో మరో ట్వీట్ చేశారు. ఉద్యోగులంతా వర్క్ ఫ్రమ్ హోమ్ చేస్తున్నందున.. ప్రస్తుతం అమెరికాలోని శాన్ఫ్రాన్సిస్కోలో ఖాళీగా ఉన్న ట్విట్టర్ ప్రధాన కార్యాలయాన్ని నిరాశ్రయుల శిబిరంగా మార్చేయాలా అని పోల్ నిర్వహించారు. 19 లక్షల మందికిపైగా ఈ పోల్కు స్పందించారు. 91శాతం మందికిపైగా అవును అని బదులిచ్చారు. మస్క్ ప్రశ్నకు స్పందించిన వారిలో అమెజాన్ అధినేత జెఫ్ బెజోస్ కూడా ఉండడం గమనార్హం. ట్విట్టర్ ఆఫీస్లో కొంత భాగాన్ని హోంలెస్ షెల్టర్గా మార్చాలని, మిగిలిన భాగాన్ని కార్యాలయానికి రావాలనుకునే ఉద్యోగుల కోసం వదిలేయాలని ఆయన సూచించారు.
ఇదీ చదవండి: ట్విట్టర్ బోర్డ్ ఆఫ్ డైరెక్టర్స్లో సభ్యుడిగా మస్క్
