ఎలాన్ మస్క్కు చెందిన సోషల్ మీడియా సంస్థ ట్విట్టర్లో సాంకేతిక సమస్య తలెత్తినట్లు తెలుస్తోంది. అనేక దేశాల్లో ట్విట్టర్ సేవలకు అంతరాయం ఏర్పడింది. చాలా మంది యూజర్లు ట్విట్టర్ను ఓపెన్ చేయలేక ఇబ్బందులు పడుతున్నారు. బుధవారం మధ్యాహ్నం 3.50 గంటల సమయంలో ఈ సమస్య ఎదురైనట్లు తెలుస్తోంది. ఖాతా ఫీడ్లో ఉండే ట్వీట్లు కనిపించడం లేదని ఫిర్యాదు చేస్తున్నారు. ఇందుకు కారణమేంటని ఇంకా తెలియలేదు. అంతర్జాల సేవల్లో అవాంతరాలను కనిపెట్టే 'డౌన్ డిటెక్టర్' వెబ్సైట్ ప్రకారం.. ట్విట్టర్ క్రాష్కు సంబంధించి వేలాది కంప్లైంట్స్ వచ్చాయి.
ట్విట్టర్ ఓపెన్ చేయగానే.. 'ట్వీట్స్ ఇప్పుడు లోడ్ కావడం లేదు' అనే సందేశం కనిపిస్తోందని కొందరు యూజర్లు చెబుతున్నారు. మరికొందరికి 'వెల్కమ్ టు ట్విట్టర్' అనే మెసేజ్ మాత్రమే కనిపిస్తోందని అంటున్నారు. అయితే, ట్వీట్లు చేయడానికి ఎలాంటి సమస్య లేదని తెలుస్తోంది. ప్రస్తుతం ట్రెండింగ్లో ఉన్న హ్యాష్ట్యాగ్స్ సైతం కనిపిస్తున్నాయి. ఒక్క ఫీడ్కు సంబంధించిన సమస్యే ఇది అని టెక్ నిపుణులు అభిప్రాయపడుతున్నారు.
ఈ దేశాల్లోనే..
అమెరికా, యూకే, జపాన్, భారత్లో ఈ సమస్య తలెత్తినట్లు తెలుస్తోంది. మొబైల్తో పాటు డెస్క్టాప్ వెర్షన్ సైతం క్రాష్ అయినట్లు యూజర్లు చెబుతున్నారు. ఫేస్బుక్, ఇన్స్టాగ్రామ్లలో అనేక మంది ట్విట్టర్ క్రాష్కు సంబంధించిన పోస్టులు చేస్తున్నారు. కొందరు జోకులు పేలుస్తూ మీమ్స్ షేర్ చేసుకుంటున్నారు. మరికొందరు తమ వ్యాపార, వ్యక్తిగత పనులకు ఆటంకం ఏర్పడిందని ఆగ్రహం వ్యక్తం చేస్తున్నారు.
ఇటీవలి కాలంలో ట్విట్టర్లో అనేక సాంకేతిక సమస్యలు తలెత్తుతున్నాయి. సేవలు నిలిచిపోతున్న ఘటనలు అనేకం నమోదవుతున్నాయి. ఇలాంటి సమస్యలను పరిష్కరించేందుకు తాము ప్రయత్నిస్తున్నామని ఎలాన్ మస్క్ ఇటీవల వెల్లడించారు. అయినప్పటికీ మరోసారి సేవల్లో అంతరాయం ఏర్పడింది. ట్విట్టర్లో ఉద్యోగుల సంఖ్య తక్కువగా ఉండటం కూడా ఈ సమస్యలకు కారణమవుతున్నట్లు నిపుణులు అభిప్రాయపడుతున్నారు. ట్విట్టర్ పగ్గాలు చేపట్టిన వెంటనే కీలక అధికారులు సహా అనేక మంది ఉద్యోగులపై మస్క్ వేటు వేశారు. ట్విట్టర్ను మస్క్ కొనుగోలు చేయకముందు అందులో 7500 మంది ఉద్యోగులు ఉండగా.. తాజాగా ఈ సంఖ్య 2వేలకు చేరింది. అందులోని 200 మంది ఉద్యోగులను తొలగించినట్లు ఇటీవల వార్తలు వచ్చాయి. ట్విట్టర్ సబ్స్క్రిప్షన్ సేవలు ప్రారంభించడంలో కీలకంగా వ్యవహరించిన ఉన్నత ఉద్యోగిని సైతం తీసేసినట్లు సమాచారం.
