తరచూ ప్రయాణాలు చేస్తుంటారా? ట్రావెల్ ఇన్సూరెన్స్​ తప్పనిసరి - ఎందుకంటే?

Travel Insurance Benefits In Telugu : మీరు దేశ, విదేశీ పర్యటనలు చేస్తుంటారా? లేదా చేయాలని అనుకుంటున్నారా? అయితే ఇది మీ కోసమే. మనం ప్రయాణాలు చేసేటప్పుడు అనుకోని ప్రమాదం జరిగినా, వస్తువులు పోగొట్టుకున్నా చాలా ఇబ్బంది పడాల్సి ఉంటుంది. ఇలాంటి సమయంలో మనల్ని ఆదుకునేదే ప్రయాణ బీమా. అందుకే దాని గురించి ఇప్పుడు వివరంగా తెలుసుకుందాం.

Travel Insurance Benefits : నేటి కాలంలో విద్య, ఉపాధి, వ్యాపారాల నిమిత్తం ప్రతి ఒక్కరూ దూర ప్రయాణాలు చేయాల్సి వస్తోంది. అలాగే సమయం దొరికినప్పుడు కుటుంబ సభ్యులతో కలిసి, సరదాగా విహారయాత్రలకు వెళ్లడమూ తప్పనిసరి అవుతోంది. అందుకే ప్రయాణాలు చేసే ప్రతి ఒక్కరూ కచ్చితంగా ట్రావెల్ ఇన్సూరెన్స్ చేయించుకోవాల్సిన అవసరం ఉంది.

ఆపదలో అండగా..
Key Benefits Of Travel Insurance : ప్రయాణాలు చేసేటప్పుడు.. అన్నీ మనం అనుకున్నట్లుగా జరగకపోవచ్చు. కొన్ని సార్లు వైద్య అత్యవసరాలు ఏర్పడవచ్చు. మరికొన్ని సార్లు మన విలువైన సామగ్రి పోవచ్చు. ఇలాంటి క్లిష్ట పరిస్థితుల్లో మనల్ని ఆర్థికంగా ఆదుకుంటుంది.. ప్రయాణ బీమా.

పలు నివేదికల ప్రకారం, డిసెంబర్​ - జనవరి నెలల్లో ఈ ప్రయాణ బీమా అవసరం అధికంగా ఉంటుంది. అందుకే కొన్ని దేశాలు పర్యటకులకు ట్రావెల్ ఇన్సూరెన్స్ తప్పనిసరి చేశాయి కూడా.

ఊహించని ఖర్చులు
ఊహించని ఖర్చులు మన ప్రయాణంపై తీవ్రమైన ప్రభావం చూపిస్తాయి. మనం చాలా సందర్భాల్లో ఇలాంటి ఊహించని ఖర్చులకు సిద్ధంగా ఉండకపోవచ్చు. ఇలాంటి సందర్భాల్లో.. ప్రయాణ బీమా మనకు మంచి భరోసా ఇస్తుంది. అందుకే ఈ ట్రావెల్ ఇన్సూరెన్స్​ పాలసీలను ఎంచుకునేటప్పుడు ఏయే అంశాలు పరిశీలించాలో ఇప్పుడు తెలుసుకుందాం.

ఆరోగ్య అవసరాలకు తగినట్లుగా..
Travel Insurance Medical Coverage : మన దేశం నుంచి ఏటా వేలాది మంది విద్యార్థులు, వ్యాపారవేత్తలు, పర్యటకులు విదేశాలకు పయనిస్తూ ఉంటారు. అందుకే ఇలాంటివారు తమ అవసరాలకు అనుగుణంగా ప్రయాణ బీమా పాలసీని ఎంచుకోవాలి.

ముఖ్యంగా ఆరోగ్య అత్యవసర పరిస్థితి ఎప్పుడైనా ఏర్పడవచ్చు. అలాంటి పరిస్థితుల్లో పూర్తి వైద్య చికిత్సకు అయ్యే ఖర్చులు అందించే.. మంచి ప్రయాణ బీమా తీసుకోవాలి. మరీ ముఖ్యంగా ఎలాంటి షరతులూ, నిబంధనలు లేకుండా.. అన్ని రకాల వైద్య ఖర్చులను చెల్లించే పాలసీని ఎంచుకోవాలి.

ప్రీమియం తక్కువే!
Travel Insurance Premium : ప్రయాణ బీమా పాలసీలు సాధారణంగా తక్కువ ప్రీమియానికే లభిస్తాయి. అందుకే ఒకేసారి కుటుంబం మొత్తానికి పాలసీ తీసుకోవడం మంచిది. ఈ విధంగా ఒకసారి ట్రావెల్ ఇన్సూరెన్స్ పాలసీ తీసుకుంటే.. అది ఎన్నో ప్రయాణాలకు ఉపయోగపడుతుంది. తరచూ ప్రయాణాలు చేసేవారికి ఇది బాగా ప్రయోజనకరంగా ఉంటుంది.

చాలా దేశాలు ప్రయాణించేవారు.. ఆయా దేశాలన్నింటికి వర్తించేలా ఒకే ట్రావెల్ ఇన్సూరెన్స్ పాలసీని తీసుకోవచ్చు. ఉదాహరణకు యూరప్​లోని 26 దేశాలకు కలిపి.. ఒకే గ్రూపు పాలసీని తీసుకోవచ్చు. ఈ బీమా ప్రీమియం విమాన టిక్కెట్​ ధరతో పోలిస్తే చాలా తక్కువగానే ఉంటుంది. ఉదాహరణకు అమెరికాలో 7 రోజుల పర్యటనకు.. ట్రావెల్ ఇన్సూరెన్స్ ప్రీమియం సుమారుగా రూ.672 వరకు ఉంటుంది.

సామగ్రి పోతే..
Travel Insurance Lost Luggage : ప్రయాణాలు చేస్తున్నప్పుడు.. కొన్ని సార్లు మన సామగ్రిని పోగొట్టుకుంటూ ఉంటాం. మరికొన్ని సందర్భాల్లో సరైన సమయానికి సామగ్రి అందదు. ఇలాంటి సందర్భాల్లో ట్రావెల్ ఇన్సూరెన్స్ కంపెనీ మనకు జరిగిన నష్టానికి తగిన పరిహారం అందించి ఆదుకుంటుంది. అందుకే దేశ, విదేశ పర్యటనలు చేసేటప్పుడు కచ్చితంగా ప్రయాణ బీమా చేయించుకోవడం మంచిది.

ఈ జాగ్రత్తలు తప్పనిసరి!
నేటి కాలంలో ఆన్‌లైన్​లోనే చాలా సులభంగా ప్రయాణ బీమా పాలసీలను కొనుగోలు చేసుకోవడానికి వీలవుతోంది. అయితే ఈ బీమా తీసుకునేటప్పుడు.. ప్రయాణ వ్యవధి, ప్రయాణం రద్దు, ఆరోగ్య అవసరాలు మొదలైనవన్నీ కవరయ్యేలా చూసుకోవాలి. అలాగే, క్లెయిమ్ సెటిల్​మెంట్​ రేషియో, నెట్​వర్క్ ఆసుపత్రుల వివరాలను కూడా కచ్చితంగా తెలుసుకోవాలి.

గుర్తుంచుకోండి!
Key Features Of Travel Insurance Policy : ట్రావెల్ ఇన్సూరెన్స్​ పాలసీ తీసుకునేటప్పుడు.. మీ పర్యటన మొత్తానికి బీమా వర్తించేలా చూసుకోవాలి. అంటే ప్రయాణం ప్రారంభమై, తిరిగి ఇంటికి వచ్చేదాకా ప్రయాణ బీమా కవరేజీ ఉండేలా ప్లాన్ చేసుకోవాలి.

ట్రావెల్ ఇన్సూరెన్స్ తీసుకునేటప్పుడు.. మినహాయింపులు, పరిమితులు గురించి కూడా ముందే తెలుసుకోండి. ముందస్తు వ్యాధుల చికిత్సకు కూడా బీమా వర్తిస్తుందా? లేదా? చెక్ చేసుకోండి. కొన్ని కొన్ని ప్రాంతాలకు వెళ్లినప్పుడు ప్రత్యేక అవసరాలు ఉండవచ్చు. వాటికి కూడా పాలసీ వర్తించేలా చూసుకోండి.