Stock market: అంతర్జాతీయంగా డాలర్ ఇండెక్స్ 100కుపైగా చేరుకోవటం వల్ల మార్కెట్లపై ప్రతికూల ప్రభావం పడింది. మరోవైపు.. ఉక్రెయిన్-రష్యా యుద్ధం కారణంగా ప్రపంచ ఆర్థిక వ్యవస్థలు కుదేలయ్యే ప్రమాదం ఉందని మదుపరులు ఆందోళన చెందుతున్నారు. దీంతో ప్రపంచ మార్కెట్ల నుంచి ప్రతికూల సంకేతలతో దేశీయ మార్కెట్లు కుప్పకూలాయి. దేశీయ ఐటీ సెక్టార్ ఏకంగా 4 శాతం, బ్యాంకు ఇండెక్స్ 2 శాతం మేర నష్టపోవటమూ ప్రధాన కారణంగా తెలుస్తోంది.
- ముంబయి స్టాక్ ఎక్స్ఛేంజీ సూచీ- సెన్సెక్స్ 1172 పాయింట్ల నష్టంతో 57,167 వద్ద స్థిరపడింది. ఇంట్రాడేలో 57,338 వద్ద నష్టాల్లో ప్రారంభమైన సూచీ ఏ దశలోనూ కోలుకోలేదు. తీవ్ర అమ్మకాల ఒత్తిడితో ఒక దశలో 56,842 స్థాయికి పడిపోయింది. ఆ తర్వాత కాస్త కోలుకున్న సూచీ చివరకు 57, 167 వద్ద స్థిరపడింది.
- జాతీయ స్టాక్ ఎక్స్ఛేంజీ సూచీ- నిఫ్టీ 302 పాయింట్లు కోల్పోయి 17,173 వద్ద ముగిసింది. ఇంట్రాడేలో.. 17,183 పాయింట్ల వద్ద ప్రారంభమైన సూచీ.. ఓ దశలో 17,067 పాయింట్ల కనిష్ఠ, 17,238 పాయింట్ల గరిష్ఠ స్థాయిలను తాకింది. చివరకు.. 17,173 వద్ద ముగిసింది.
లాభనష్టాల్లోనివి: ఎన్టీపీసీ, టాటాస్టీల్, నెస్లే, టైటాన్, హిందూస్థాన్ యూనిలివర్, మారుతి, పవర్ గ్రిడ్, యాక్సిస్ బ్యాంక్, ఐటీసీ లాభాల్లో ముగిశాయి. మరోవైపు.. ఇన్ఫోసిస్, హెచ్డీఎఫ్సీ బ్యాంక్, టీసీఎస్, రిలయన్స్, డాక్టర్ రెడ్డీస్, ఇండస్ఇండ్ బ్యాంక్, సన్ఫార్మా, ఐసీఐసీఐ బ్యాంక్, బజాజ్ ఫినాన్స్, ఎస్బీఐ నష్టాలను మూటగట్టుకున్నాయి.
మార్కెట్ల నష్టాలకు ప్రధాన కారణాలు: భారత్లో ద్రవ్యోల్బణం: ఈ ఏడాది మార్చిలో రిటైల్ ద్రవ్యోల్బణం 6.95 శాతం మేర నమోదైంది. రానున్న రోజుల్లో మరింత పెరిగే అవకాశం ఉందని పలువురు ఆర్థికవేత్తలు అంచనా వేస్తున్నారు. జూన్లో ఆర్బీఐ ద్రవ్యపరపతి విధాన సమీక్షా సమావేశంలో వడ్డీ రేట్ల పెంపునకు ఆస్కారం ఉందని పేర్కొంటున్నారు. 2023 ఏప్రిల్ నాటికి రెపోరేటు 5.5 శాతానికి చేరుకుంటుందని హెచ్ఎస్బీసీ అంచనా వేసింది.
4 శాతం పడిపోయిన ఐటీ ఇండెక్స్: దిగ్గజ ఐటీ సంస్థ ఇన్ఫోసిస్ షేర్లు ఏకంగా 6 శాతం మేర పడిపోవటం వల్ల ఐటీ ఇండెక్స్ 4 శాతం మేర నష్టపోయింది. 2020, మార్చి 23 తర్వాత ఇన్పోసిస్ ఈ మేర దిగజారటం ఇదే తొలిసారి. మార్చితో ముగిసిన త్రైమాసికంలో ఆశించిన దాని కంటే ఆదాయం తగ్గిపోవటం వల్ల ఇన్ఫోసిస్ మార్జిన్ అంచనాలను విశ్లేషకులు తగ్గించారు. ఇన్ఫోసిస్ తర్వాత ఎంఫాసిస్, టెక్ మహీంద్రా, మైండ్ట్రీ, టీసీఎస్ భారీగా నష్టాల్లోకి జారుకోవటమూ నష్టాలకు కారణమే.
ముడి చమురు ధరలు: రష్యాపై ఆంక్షలు తీవ్రతరం చేస్తున్న క్రమంలో అంతర్జాతీయంగా సరఫరా తగ్గిపోవటం వల్ల సోమవారం ముడి చమురు ధరలు భారీగా పెరిగాయి. బ్రెంట్ క్రూడ్ ధర 1.50 డాలర్లు లేదా 1.3 శాతం మేర పెరిగింది. ప్రసుతం బ్యారెల్ ధర 113.20 డాలర్లుగా ఉంది. ఆంక్షల కారణంగా సోమవారం నుంచి రష్యా నుంచి రావాల్సిన రోజుకు 3 మిలియన్ బ్యారెల్స్ నిలిచిపోయినట్లు అంతర్జాతీయ ఎనర్జీ ఏజెన్సీ పేర్కొంది.
అంతర్జాతీయ మార్కెట్ల పతనం: ప్రపంచవ్యాప్తంగా ఇతర కేంద్ర బ్యాంకుల ప్రాబల్యాన్ని తగ్గించే ఉద్దేశంతో అమెరికా పాలసీని కఠినతరం చేయటం మదుపరులను ఆందోళనకు గురిచేసింది. దీంతో ఆ దేశ మార్కెట్లపై ప్రతికూల ప్రభావం పడింది. ఆసియా మార్కెట్లలో నిక్కీ ఒక శాతం మేర నష్టపోగా.. హంగ్సెంగ్ 0.5 శాతం మేర పడిపోయింది.
చైనా జీడీపీ వృద్ధి రేటు: 2022 తొలి త్రైమాసికంలో చైనా జీడీపీ వృద్ధి రేటు 4.8 శాతంగా నమోదైంది. అంతకుముందు త్రైమాసికం 4శాతంతో పోల్చితే ఎక్కువే ఉన్నా.. షాంఘై వంటి పెద్ద నగరాల్లో కొవిడ్ కేసులు పెరుగుతుండటం, కఠిన లాక్డౌన్ అమలు చేస్తుండటం ఆందోళన కలిగిస్తోంది. రానున్న రోజుల్లో ఈ ప్రభావం ఆర్థిక వ్యవస్థపై మరింత పడనుందని నిపుణులు అంచనా వేస్తున్నారు.
ఇదీ చూడండి: Inflation: నాలుగు నెలల గరిష్ఠానికి టోకు ధరల ద్రవ్యోల్బణం
