Stock Market Closing: దేశీయ స్టాక్ మార్కెట్ సూచీలు భారీ నష్టాల్లో ముగిశాయి. బొంబాయి స్టాక్ ఎక్స్చేంజి సూచీ సెన్సెక్స్ 704 పాయింట్లు కోల్పోయి.. 56 వేల 463 వద్ద స్థిరపడింది. జాతీయ స్టాక్ ఎక్స్చేంజి సూచీ నిఫ్టీ 215 పాయింట్ల నష్టంతో 16 వేల 959 వద్ద సెషన్ను ముగించింది. ఐటీ, ఎఫ్ఎంసీజీ, విద్యుత్, రియాల్టీ రంగాల షేర్లు కుదేలయ్యాయి. మొత్తంగా 2216 షేర్లు డీలాపడ్డాయి. 1111 షేర్లు రాణించాయి. 118 షేర్లలో ఎలాంటి మార్పూ లేదు.
దేశీయంగా ద్రవ్యోల్బణం, అమెరికాలో వడ్డీరేట్ల పెంపు, ఉక్రెయిన్‌- రష్యా యుద్ధ భయాలు, విదేశీ సంస్థాగత పెట్టుబడిదారుల నిష్క్రమణ, బాండ్ల రాబడుల పెరుగుదల, చమురు ధరలు ఎగబాకడం వంటి అంశాలు మార్కెట్ల సెంటిమెంటును దెబ్బతీశాయి. కిందటి సెషన్లో భారీ పతనాన్ని చవిచూసిన ఐటీ షేర్లు నేడు కూడా అదే బాటలో పయనించాయి. ఇంధన రంగ షేర్లు ఈరోజు భారీగా లాభపడ్డాయి.
తొలుత దాదాపు 200 పాయింట్లకుపైగా లాభంతో సెన్సెక్స్ దాదాపు సెషన్ మొత్తం సానుకూలంగానే ట్రేడయింది. 300 పాయింట్ల లాభంతో 57 వేల 464 పాయింట్ల వద్ద సెషన్ గరిష్ఠాన్ని తాకింది. ఆఖరి అరగంటలో అమ్మకాల ఒత్తిడితో సూచీలు తీవ్ర ఒడుదొడుకులకు లోనయ్యాయి. ఓ దశలో 1100 పాయింట్లకుపైగా కోల్పోయి.. 56 వేల 9 వద్ద సెషన్ కనిష్ఠాన్ని నమోదుచేసింది. చివరకు 704 పాయింట్ల నష్టంతో ముగించింది. గత సెషన్లోనూ సూచీలు భారీగా పడిపోయాయి. సెన్సెక్స్ 1172, నిఫ్టీ 302 పాయింట్లు పతనమైంది.
లాభనష్టాల్లో ఇవే: హెచ్డీఎఫ్సీ ట్విన్స్ అత్యధికంగా నష్టపోయాయి. హెచ్డీఎఫ్సీ 5.45 శాతం, హెచ్డీఎఫ్సీ లైఫ్ 4.81 శాతం పడిపోయాయి. ఎస్బీఐ లైఫ్ ఇన్సూరెన్స్, హెచ్డీఎఫ్సీ బ్యాంక్, ఇన్ఫోసిస్, టెక్ మహీంద్రా పతనమయ్యాయి. అపోల్ హాస్పిటల్స్ 5.75 శాతం దూసుకెళ్లింది. కోల్ ఇండియా, రిలయన్స్, ఐసీఐసీఐ బ్యాంక్, బీపీసీఎల్, ఎస్బీఐ లాభపడ్డాయి. బీఎస్ఈ మిడ్, స్మాల్ క్యాప్ సూచీలు ఒక శాతం మేర పడిపోయాయి. ఆయిల్ అండ్ గ్యాస్ సెక్టార్ సానుకూలంగా ట్రేడయింది.
ఇవీ చూడండి: బ్యాడ్ న్యూస్.. వడ్డీ రేట్లు పెంచిన ఎస్బీఐ.. ఈఎంఐలు మరింత భారం
