Six Airbags Mandatory : కార్లలో ఆరు ఎయిర్బ్యాగులను తప్పనిసరి చేయాలనే ప్రతిపాదనపై కేంద్రం వెనక్కి తగ్గింది. ఈ నిర్ణయాన్ని ఒక సంవత్సరంపాటు వాయిదా వేస్తున్నామని కేంద్ర రవాణా శాఖ మంత్రి నితిన్ గడ్కరీ తెలిపారు. 2023 అక్టోబరు 1 నుంచి అమలు చేస్తామని ప్రకటించారు. ఆటోమొబైల్ రంగం ఎదుర్కొంటున్న ఆర్థిక ఇబ్బందులను దృష్టిలో ఉంచుకుని ఆరు ఎయిర్బ్యాగుల తప్పనిసరి నిర్ణయాన్ని వాయిదా వేశామని గడ్కరీ అన్నారు. ధర, వేరియంట్లతో సంబంధం లేకుండా ఎయిర్ బ్యాగుల నిబంధన అమలు చేయాలని, మోటారు వాహనాల్లో ప్రయాణించే వారి భద్రతే తమకు ప్రాధాన్యమని ఆయన పేర్కొన్నారు.
ఈ ఏడాది అక్టోబరు 1 నుంచి ప్రయాణికుల భద్రత కోసం ఎనిమిది సీట్ల కార్లలో ఆరు ఎయిర్బ్యాగులను తప్పనిసరి చేయాలని కేంద్రం తొలుత భావించింది. అయితే తాజాగా మరో సంవత్సరంపాటు ఈ ప్రతిపాదన అమలును వాయిదా వేసింది. నేషనల్ క్రైమ్‌ రికార్డ్స్‌ బ్యూరో (ఎన్సీఆర్బీ) నివేదిక ప్రకారం .. 2021వ సంవత్సరంలో దేశంలో రోడ్డు ప్రమాదాల వల్ల 1.55 లక్షల మంది ప్రాణాలు కోల్పోయారు. అంటే సగటున ప్రతి గంటకు 18 మంది మరణించారు. ఈ నేపథ్యంలో కార్లలో ఆరు ఎయిర్బ్యాగుల తప్పనిసరి చేసేందుకు కేంద్రం సిద్ధమైంది.
'ఎక్కువగా దిగువ మధ్యతరగతి ప్రజలు తక్కువ ధర కార్లు కొనుగోలు చేస్తారు. అయితే వాటిలోనూ ఆరు ఎయిర్బ్యాగులు ఉండాలి. లేదంటే ప్రమాదాలకు గురై.. మరణాలు సంభవిస్తాయి.' అని నితిన్ గడ్కరీ గతంలో వ్యాఖ్యానించారు.
ఇవీ చదవండి: అమ్మో విదేశీ విద్యా? రూపాయి మారకపు విలువతో తల్లిదండ్రులపై భారం
కట్టిన ప్రీమియం మొత్తం వాపస్.. జీరో-కాస్ట్ టర్మ్ ఇన్సూరెన్స్తో లాభమదే!
