SBI Revised Locker Charges : స్టేట్ బ్యాంక్ ఆఫ్ ఇండియా (ఎస్బీఐ) కస్టమర్లకు అలర్ట్. ఆర్బీఐ నిర్దేశం మేరకు.. ఎస్బీఐ ఇటీవల లాకర్ నిబంధనల్లో మార్పులు చేసింది. అందువల్ల లాకర్ హోల్డర్లు.. తమ బ్రాంచ్లకు వెళ్లి, న్యూ లాకర్ అగ్రిమెంట్పై సంతకాలు చేయాలని కొద్దిరోజుల క్రితం ఎస్బీఐ సూచించింది.
డిసెంబర్ ఆఖరులోగా..
దేశంలోని బ్యాంకులు అన్నీ తమ లాకర్ అగ్రిమెంట్ను అప్డేట్ చేయాలని రిజర్వ్ బ్యాంక్ ఆఫ్ ఇండియా ఇటీవల ఆదేశించింది. సెప్టెంబర్ 30 నాటికి 75 శాతం మంది, డిసెంబర్ 31లోగా పూర్తిగా 100 శాతం లాకర్ హోల్డర్లు ఈ రివెజ్డ్/ సంప్లిమెంట్ లాకర్ అగ్రిమెంట్పై సంతకాలు చేసి తీరాలని ఆర్బీఐ స్పష్టం చేసింది.
లాకర్ ఛార్జీలు ఎలా ఉన్నాయంటే?
SBI New Locker Charges : లాకర్ సైజు, అది ఉన్న ప్రదేశం ఆధారంగా ఛార్జీలు మారుతూ ఉంటాయని ఎస్బీఐ కస్టమర్లు గుర్తించాలి. చిన్న, మధ్య స్థాయి లాకర్లపై జీఎస్టీతో సహా రూ.500 వరకు రుసుము వసూలు చేస్తారు. పెద్ద లాకర్ల విషయంలో రూ.1000 రిజిస్ట్రేషన్ ఛార్జ్ సహా జీఎస్టీ చెల్లించాల్సి ఉంటుంది.
ప్రదేశం, సైజును అనుసరించి లాకర్ రెంట్ ఛార్జీలు
- అర్బన్, మెట్రో నగరాల్లోని ఎస్బీఐ కస్టమర్లు చిన్న లాకర్ల అద్దె కింద రూ.2000 తోపాటు జీఎస్టీ చెల్లించాలి.
- చిన్న నగరాలు, గ్రామీణ ప్రాంతాల్లో చిన్న లాకర్కు రూ.1500తో పాటు జీఎస్టీ కూడా చెల్లించాలి.
- మీడియం సైజు లాకర్ల విషయానికి వస్తే అర్బన్, మెట్రో నగరాల్లో రూ.4000 + జీఎస్టీ చెల్లించాలి.
- చిన్న పట్టణాలు, గ్రామీణ ప్రాంతాల్లో మీడియం సైజు లాకర్లకు రూ.3000, అదనంగా జీఎస్టీ కట్టాలి.
- ప్రధాన నగరాల్లో పెద్ద సైజు లాకర్లు తీసుకునే వారు రూ.8000+ జీఎస్టీ చెల్లించాలి.
- చిన్న పట్టణాలు, గ్రామీణ ప్రాంతాల్లో పెద్ద సైజు లాకర్ల అద్దె కింద రూ.6000+ జీఎస్టీ చెల్లించాల్సి ఉంటుంది.
- మెట్రో నగరాలు, పెద్ద పట్టణాల్లో చాలా పెద్ద లాకర్ సదుపాయం వాడుకునేవారు రూ.12,000తోపాటు జీఎస్టీ చెల్లించాలి.
- చిన్న పట్టణాలు, గ్రామీణ ప్రాంతాల్లో చాలా పెద్ద లాకర్ను తీసుకుంటే రూ.9000తో పాటు జీఎస్టీ కట్టాల్సి ఉంటుంది.
