Fixed Deposit Interest Rates : మార్కెట్లో ఇన్వెస్ట్ చేయ‌డానికి నేడు అనేక పెట్టుబడి అవ‌కాశాలున్నాయి. అయిన‌ప్ప‌టికీ ప్ర‌జ‌లు మాత్రం ఫిక్స్డ్ డిపాజిట్ (ఎఫ్డీ)లో పెట్టుబడి పెట్టేందుకు ఆసక్తి చూపిస్తారు. చాలా మంది సీనియ‌ర్ సిటిజ‌న్లు, ప‌ద‌వీ విర‌మ‌ణ చేసిన వారు ఇదే బెస్ట్ చాయిస్ అని పరిగ‌ణిస్తున్నారు. ముఖ్యంగా రిటైర్ అయిన వారు త‌మ ప‌దవి విర‌మ‌ణ అనంత‌రం నిధుల‌ను ఎఫ్డీలో జ‌మ చేయ‌డానికి ఇష్ట‌ప‌డుతున్నారు. అయితే ఎఫ్డీకి ఏది అయితే బెట‌ర్ అని ఆలోచిస్తారు. ఫిక్స్డ్ డిపాజిట్ చేయ‌డానికి బ్యాంకు అయితే బెట‌రని కొంద‌రు, పోస్టాఫీసు మంచి ఎంపిక అని మ‌రికొంద‌రు.. ఇలా ఎవ‌రికి తోచింది వాళ్లు చెబుతారు. అయితే.. మీరు గనుక స్టేట్ బ్యాంకు ఆఫ్ ఇండియా (ఎస్బీఐ) ఎఫ్డీ స్కీమ్లో లేదా పోస్టాఫీసు ట‌ర్మ్ డిపాజిట్ స్కీమ్లో పెట్టుబడి పెట్టాల‌ని అనుకుంటున్నారా? అయితే వాటికి సంబంధించిన వడ్డీ రేట్లు, ఇత‌ర ప్ర‌యోజ‌నాల గురించి తెలుసుకుందాం.
ఆగ‌స్టు 15 వరకే..
SBI Fixed Deposit Rates : స్టేట్ బ్యాంకు ఆఫ్ ఇండియా త‌మ సాధార‌ణ వినియోగదారులకు అందించే ఎఫ్డీ ప‌థ‌కాల వ్య‌వ‌ధి 7 రోజుల నుంచి 10 సంవ్స‌త‌రాల వరకు ఉంటుంది. వీటిపై వడ్డీ రేట్లు 3 నుంచి 6.5 శాతం వరకు ఉంటాయి. అదే సీనియ‌ర్ సిటిజ‌న్లు వీటిపై అధిక వడ్డీ పొందుతారు. వారికి వడ్డీ 3.5 నుంచి 7.5 శాతం వరకు వ‌స్తుంది. ఎస్బీఐ త‌మ ప్ర‌త్యేక ఎఫ్డీ పథకం అమృత్ క‌లశ్ (444 రోజుల ఎఫ్డీ) పై సాధార‌ణ క‌స్ట‌మ‌ర్ల‌కు 7.1 శాతం, సీనియ‌ర్ సిటిజ‌న్ వినియోగదారులకు 7.6 శాతం వడ్డీ అందిస్తుంది. కానీ ఈ పథకం ఈ ఏడాది ఆగ‌స్టు 15 వరకే అందుబాటులో ఉంటుంది.
పన్ను మినహాయింపు..
Fixed Deposit Tax Exemption : ఇక పోస్టాఫీసు ఫిక్స్డ్ డిపాజిట్ ప‌థ‌కాలు ఏడాది నుంచి ప్రారంభ‌మై 5 ఏళ్ల వరకు ఉంటాయి. వినియోగ‌దారులు త‌మ ఏడాది ట‌ర్మ్ ప‌థ‌కంపై 6.9 శాతం వడ్డీ రేట్లు పొందుతారు. రెండు, మూడేళ్ల పథకాలపై 7 శాతం, అయిదేళ్ల ఎఫ్డీలపై 7.5 శాతం వడ్డీ ల‌భిస్తుంది. ఎస్బీఐ, పోస్టాఫీసుల్లో 5 సంవత్స‌రాల కంటే ఎక్కువ వ్య‌వ‌ధి ఉన్న ఫిక్స్డ్ డిపాజిట్ పథకాలపై టాక్స్ మినహాయింపు ఉంటుంది. ఇన్క‌మ్ ట్యాక్స్ చ‌ట్టంలోని సెక్ష‌న్ 80C కింద సుమారు రూ.1.50 ల‌క్ష‌ల వరకు రిబేటును పొంద‌వ‌చ్చు.
దీంట్లో ఇన్వెస్ట్ చేయండి..
Post Office Fixed Deposit : 5 ఏళ్ల పెట్టుబడి కాలాన్ని దృష్టిలో పెట్టుకుంటే మాత్రం ఎస్బీఐ క‌న్నా పోస్టాఫీసు ట‌ర్మ్ పథకం ఉత్త‌మం. ఇన్వెస్ట‌ర్లు 5 సంవత్స‌రాల స్కీమ్లో జాయిన్ అవ్వాల‌నుకుంటే పోస్టాఫీసులో ఫిక్స్డ్ డిపాజిట్ చేయండి. ఎందుకంటే ఇందులో సాధార‌ణ వినియోగ‌దారులు సైతం 7.5 శాతం వడ్డీ రేటు పొంద‌వ‌చ్చు. అదే ఎస్బీఐలో అయితే సీనియ‌ర్ సిటిజ‌న్లకు మాత్ర‌మే వ‌స్తుంది.
అన్నీ తెలుసుకొని..
Fixed Deposit Details In Post Office SBI : పెట్టుబ‌డిదారులు ఇన్వెస్ట్ చేసే ముందు త‌మ ఆర్థిక ల‌క్ష్యాల‌కు అనుగుణంగా నిర్ణ‌యం తీసుకోవాలి. అందుబాటులో ఉన్న ఆప్ష‌న్లు, రిస్క్, రిట‌ర్న్, వడ్డీ రేట్లు త‌దిత‌ర అంశాల‌ను ప‌రిగ‌ణ‌లోకి తీసుకుని విశ్లేషించుకోవాలి. వీటిపై స‌రైన అవ‌గాహ‌న లేక‌పోతే ఎవ‌రైనా ఆర్థిక నిపుణుల్ని సంప్ర‌దించండి. వారి సూచ‌న‌ల్ని బ‌ట్టి త‌గిన నిర్ణ‌యం తీసుకుంటే మంచి ఫ‌లితాలుంటాయి.
