PAN Aadhaar Link: పాన్ కార్డును ఆధార్తో లింక్ చేసుకోవడానికి మార్చి 31(గురువారం) చివరితేదీ. రెండింటినీ అనుసంధానం చేసుకోని వినియోగదారులు, పన్ను చెల్లింపుదారులు త్వరగా ఆ పని పూర్తిచేసుకోవాలని స్పష్టం చేసింది ఆదాయపు పన్ను శాఖ. నిర్ణీత గడువులోగా పాన్- ఆధార్ లింక్ చేయకుంటే.. ఆలస్య రుసుము కింద రూ. 500 నుంచి రూ. 1000 వరకు జరినామా చెల్లించాల్సి ఉంటుందని ఓ ప్రకటనలో తెలిపింది. ఇంకా.. పాన్ కార్డు (ఇనాక్టివ్) పనిచేయదని స్పష్టం చేసింది. 2022 జూన్ 22లోగా ఈ ప్రక్రియ పూర్తిచేసినట్లయితే ఫైన్ కింద రూ. 500 వసూలు చేయనున్నట్లు పేర్కొంది కేంద్ర ప్రత్యక్ష పన్నుల బోర్డు(సీబీడీటీ). ఆ తర్వాత జరిమానా మరింత పెరగనున్నట్లు తెలిపింది.
''2022, మార్చి 31లోగా ఆధార్తో పాన్ కార్డును అనుసంధానం చేయకుంటే.. అది పనిచేయకుండా పోతుంది. పెనాల్టీ కట్టిన తర్వాత మళ్లీ పనిచేస్తుంది.'' అని సీబీడీటీ మార్చి 29న ఓ ప్రకటన విడుదల చేసింది. ఆధార్-పాన్ అనుసంధానం కోసం కేంద్రం పలుమార్లు గడువు పొడిగిస్తూ వచ్చిందని, ఇప్పుడు తొలిసారి ఆలస్య రుసుముకు సంబంధించి ప్రకటన వెలువరిచిందని అన్నారు ఏకేఎం గ్లోబల్, ట్యాక్స్ పార్ట్నర్ అమిత్ మహేశ్వరి. మొదటి 3 నెలల వరకు అంటే ఏప్రిల్ 1 నుంచి జూన్ 30 వరకు రూ. 500, ఆ తర్వాత రూ. 1000 చొప్పున ఫైన్ ఉంటుందని ఆయన తెలిపారు.
ఈ సేవలు పొందాలంటే?: బ్యాంకింగ్‌ సేవలను పొందడం, డెబిట్‌, క్రెడిట్‌ కార్డులను వాడడం, ఆన్‌లైన్‌ చెల్లింపులు, యూపీఐ, మొబైల్‌ బ్యాంకింగ్‌ ఇలాంటి సేవలన్నీ ఎలాంటి అవాంతరం లేకుండా పొందాలంటే.. మీ పాన్‌ను ఆధార్‌ను తప్పనిసరిగా అనుసంధానం చేయాలి. లేదంటే ఈ సేవలకు విఘాతం కలిగే ఆస్కారం ఉంది. దీంతోపాటు.. మీకు బ్యాంకులు, ఆర్థిక సంస్థల నుంచి వచ్చే వడ్డీ, డివిడెండు, ఇతర ఆదాయాలపైనా అధిక మొత్తంలో పన్ను కోత విధించే అవకాశం ఉంది. ఒకసారి ఇలా విధించిన పన్నును తిరిగి వెనక్కి తీసుకునే అవకాశమూ ఉండదు.
పాన్‌తో ఆధార్ అనుసంధానం ఇలా..
1. ఆదాయపు పన్ను ఇ-ఫైలింగ్ పోర్టల్ తెరవండి.
2. మొద‌టిసారి లాగిన్ అయ్యే వారు రిజిస్ట‌ర్ చేసుకోవాలి. మీ పాన్ నెంబరే(శాశ్వత ఖాతా సంఖ్య) మీ యూజర్ ఐడీ అవుతుంది.3. యూజర్ ఐడీ, పాస్‌వర్డ్, పుట్టిన తేదీని నమోదు చేసి లాగిన్ అవ్వండి.
4. ఆధార్-పాన్ లింక్ కోసం ఒక పాప్-అప్ విండో ఓపెన్ అవుతుంది.
5. పాన్ కార్డులోని వివరాల ప్రకారం పేరు, పుట్టిన తేదీ వంటి స‌మాచారం క‌నిపిస్తుంది.
6. స్క్రీన్‌పై క‌నిపిస్తున్న పాన్ కార్డు వివ‌రాల‌ను ఆధార్‌లో పేర్కొన్న వివరాల‌తో ధ్రువీకరించుకోవాలి. ఒకవేళ వివ‌రాల‌లో ఏమైనా తేడాలు ఉంటే రెండింటిలో ఒకే విధంగా ఉండేలా సరి చేసుకోవాలి.
7. వివరాలు సరిపోలితే, మీ ఆధార్ నంబర్‌ను ఎంటర్ చేసి 'లింక్ నౌ' బటన్ పై క్లిక్ చేయండి.
8. మీ ఆధార్, పాన్‌తో విజ‌య‌వంతంగా లింక్ అయిన‌ట్లు పాప్-అప్ విండోతో సందేశం వ‌స్తుంది.
9. ఆదాయపు పన్ను ఇ-ఫైలింగ్ పోర్టల్ హోమ్ పేజీలో క‌నిపిస్తున్న'లింక్ ఆధార్'పై క్లిక్ చేయడం ద్వారా కూడా నేరుగా అనుసంధానించ‌వ‌చ్చు.
10. https://www.utiitsl.com/ లేదా https://www.egov-nsdl.co.in/ వెబ్‌సైట్‌ల ద్వారా కూడా ఆధార్, పాన్‌ల‌ను లింక్ చేసుకోవ‌చ్చు.
పీఎఫ్లో రెండూ: ఈపీఎఫ్ ఖాతాలను నుంచి వచ్చే వడ్డీపై ఆదాయపు పన్ను విధించేందుకు కేంద్రం సిద్ధమైంది. ఇందుకు తగ్గట్టుగా పీఎఫ్ నిబంధనల్లో కొన్ని మార్పులు చేసింది. ఏడాదికి రూ. 2.5 లక్షలకు మించి పీఎఫ్ ఖాతాల్లో జమ చేసే వారికి ఆదాయపు పన్ను విధించాలని నిర్ణయం తీసుకుంది. దీని ప్రకారం ప్రస్తుతం ఉన్న ఈపీఎఫ్ ఖాతాలను (EPFO) రెండుగా విభజిస్తారు. ఒకటి పన్ను వేయదగిన ఖాతా.. రెండోది పన్ను మినహాయింపు ఖాతాగా పేర్కొంటారు. 2021 మార్చి 31 నుంచి ఈ నిబంధనలు వర్తిస్తాయి.
ఆదాయపు పన్ను నిబంధనల్లోనూ కొత్త ఆర్థిక సంవత్సరం నుంచి పలు మార్పులు జరగనున్నాయి. క్రిప్టో ఆస్తులపై ఆదాయపు పన్ను, అప్డేటెడ్ రిటర్న్స్ దాఖలు, ఈపీఎఫ్ వడ్డీపై కొత్త పన్ను నియమాలు, కొవిడ్-19 చికిత్సపై పన్ను ఉపశమనం వంటివి 2022 ఏప్రిల్ 1న అమల్లోకి వచ్చే ప్రధాన మార్పులు. ఇన్కం ట్యాక్స్ రిటర్న్స్లో తప్పులు ఉంటే.. మళ్లీ అప్డేటెడ్ రిటర్న్స్ దాఖలు చేసే వెసులుబాటు కల్పించింది. గరిష్ఠంగా 2 సంవత్సరాల వరకు ఇందుకు అవకాశం ఉంది. వికలాంగులకు పన్ను చెల్లింపు నుంచి ఉపశమనం కల్పించింది.
ఇవీ చూడండి: ఆధార్‌కార్డుపై మీ ఫొటో మార్చాలనుకుంటున్నారా? ఇలా చేయండి..
ఓటర్ కార్డును ఆధార్తో అనుసంధానించమంటున్నారా.. తస్మాత్ జాగ్రత్త!
