New IMPS Online Money Transfer Rule : అకౌంట్ నంబర్​ లేకుండా మనీ ట్రాన్స్​ఫర్​.. గరిష్ఠంగా రూ.5 లక్షల వరకు.. IMPS న్యూ రూల్స్!

New IMPS Online Money Transfer Rule In Telugu : మీరు ఆన్​లైన్​లో మనీ ట్రాన్స్​ఫర్​ చేయాలా? అది కూడా గరిష్ఠంగా రూ.5 లక్షల వరకు పంపించాలా? అయితే ఇది మీ కోసమే. ఇప్పుడు IMPS విధానం ద్వారా కేవలం మొబైల్ నంబర్​, బ్యాంక్ పేరుతో డబ్బులు పంపించవచ్చు. ఇందుకోసం లబ్ధిదారుని పేరు, అకౌంట్​ నంబర్​, ఐఎఫ్​ఎస్​సీ కోడ్ వివరాలు నమోదు చేయాల్సిన అవసరం లేదు. మరి అది ఎలాగో ఇప్పుడు తెలుసుకుందాం.

New IMPS Online Money Transfer Rule : నేడు ఆన్​లైన్ ఆర్థిక లావాదేవీలు చాలా సులభం అయిపోయాయి. ఎక్కడికైనా, ఎవరికైనా చాలా సులువుగా మనీని ట్రాన్స్​ఫర్ చేయగలుగుతున్నాం. వాస్తవానికి ఆన్​లైన్లో డబ్బులు పంపించడానికి వివిధ పద్ధతులు అందుబాటులో ఉన్నాయి. అవి:

1. నేషనల్​ ఎలక్ట్రానిక్​ ఫండ్ ట్రాన్స్​ఫర్​ (NEFT)
2. రియల్​ టైమ్​ గ్రాస్​ సెటిల్​మెంట్ (RTGS)
3. ఇమ్మీడియెట్​ పేమెంట్ సర్వీస్​ (IMPS)

వీటిలో ఐఎంపీఎస్​ పద్ధతిని చాలా ఎక్కువగా వాడుతూ ఉంటాం. దీని ద్వారా చాలా సులువుగా, త్వరగా డబ్బులు ట్రాన్స్​ఫర్ చేయగలుగుతాం.

మరింత సులువుగా!
ఇప్పటి వరకు ఎవరైనా ఐఎంపీఎస్​ పద్ధతిలో డబ్బులు పంపించాలంటే.. లబ్ధిదారుని పేరు, అతని బ్యాంక్ ఖాతా నంబర్​, ఇండియన్​ ఫైనాన్సియల్ సిస్టమ్​ కోడ్​ (IFSC)లను కచ్చితంగా నమోదు చేయాల్సి ఉండేది. ఇకపై వీటి అవసరం ఉండదు. కేవలం లబ్ధిదారుని ఫోన్ నంబర్​, అతని బ్యాంక్ పేరు నమోదు చేస్తే సరిపోతుంది.

ఇంతకీ ఐఎంపీఎస్​ అంటే ఏమిటి?
What is Immediate Payment Service : నేషనల్ పేమెంట్స్ కార్పొరేషన్ ఆఫ్ ఇండియా (NPCI) తక్షణ దేశీయ నిధుల బదిలీల కోసం IMPS విధానాన్ని అమలు చేస్తోంది. ఈ ఐఎంపీఎస్​ విధానం ద్వారా ఇంటర్నెట్ బ్యాంకింగ్ చేసుకోవచ్చు. అలాగే మొబైల్ బ్యాంకింగ్ యాప్స్​ ద్వారానూ మనీ ట్రాన్స్​ఫర్ చేయవచ్చు. ఏటీఎం, ఐవీఆర్​ఎస్​, ఎస్​ఎంఎస్​ విధానంలోనూ డబ్బులు పంపించుకోవచ్చు.

IMPS Features

• ఐఎంపీఎస్ ద్వారా ఒక బ్యాంకు నుంచి మరో బ్యాంక్​కు చాలా సులువుగా, ఇన్​స్టాంట్​గా డబ్బులు ట్రాన్స్​ఫర్ చేసుకోవచ్చు.
• సమయం, ప్రాంతంతో సంబంధం లేకుండా.. ఎక్కడి నుంచి అయినా, ఏ సమయంలోనైనా డబ్బులు పంపించుకోవచ్చు.
• ఐఎంపీఎస్​ విధానంలో రోజుకు గరిష్ఠంగా రూ.5 లక్షల వరకు పంపించుకోవచ్చు.
• ఐఎంపీఎస్ విధానంలో చేసే ఆర్థిక లావాదేవీలకు.. వాటి విలువను అనుసరించి రూ.5 నుంచి రూ.15 వరకు రుసుము వసూలు చేస్తారు. దీనితో పాటు సర్వీస్​ టాక్స్ కూడా వసూలు చేసే అవకాశం ఉంటుంది.

ఐఎంపీఎస్ ద్వారా డబ్బులు ట్రాన్స్​ఫర్ చేయడం ఎలా?
How to transfer money through IMPS :

• ముందుగా మీ మొబైల్ బ్యాంకింగ్ యాప్​ను ఓపెన్ చేయండి
• మెయిన్​ పేజీలోని Fund Transfer ఆప్షన్​పై క్లిక్​ చేయండి.
• IMPS ఫండ్ ట్రాన్స్​ఫర్​ ఆప్షన్​పై క్లిక్ చేయండి.
• మీరు ఎవరికైతే డబ్బులు పంపించాలని అనుకుంటున్నారో.. అతని/ఆమెకు చెందిన MMID (మొబైల్ మనీ ఐడెంటిఫైయర్​), MPIN (మొబైల్ పర్సనల్​ ఐడెంటిఫికేషన్ నంబర్​)ను ఎంటర్ చేయండి.
• సింపుల్​గా చెప్పాలంటే.. లబ్ధిదారుని బ్యాంక్​ పేరు, అతని మొబైల్ నంబర్​ను ఎంటర్ చేయండి. తరువాత..
• మీరు పంపించాల్సిన అమౌంట్​ను ఎంటర్ చేసి.. మనీ ట్రాన్స్​ఫర్​ను Confirm చేయండి.
• మీ రిజిస్టర్ మొబైల్​కు ఒక ఓటీపీ వస్తుంది. దానిని ఎంటర్ చేయండి. దీనితో మీ ట్రాన్సాక్షన్​ సక్సెస్​ఫుల్ అవుతుంది.