Married Couple Money Management : సాధారణంగా మహిళలు, పురుషులు వైవాహిక జీవితానికి ముందు ఆర్థిక వ్యవహారాలను చూసుకోవడం వారి వ్యక్తిగతం. ఇలాంటి సందర్భంలో ఇద్దరికీ స్వాతంత్ర్యం ఎక్కువే ఉంటుంది. కానీ, వివాహం తర్వాత ఇద్దరూ ఆర్థిక వ్యవహారాలను కలిపి నిర్వహించడం మంచిదని.. దీనివల్ల ఆర్థిక లక్ష్యాలను సులభంగా చేరుకోవడానికి అవకాశం ఉంటుందని ఆర్థిక నిపుణులు చెబుతున్నారు. అయితే, ఉత్తమ భార్యాభర్తలకు కూడా మనీ మేనేజ్మెంట్ ఒక సవాల్. అలాంటి జంటలకు వారి వ్యక్తిగత, భాగస్వామ్య లక్ష్యాలను తప్పనిసరిగా అంచనా వేసుకుని మసులుకోవాలి. వివాహిత జంటలు ఆర్థిక వ్యవహారాలను ఎలా చక్కదిద్దుకోవాలో తెలుసుకుందాం.
ఉమ్మడి నిర్ణయాలు ఉత్తమం..
పెళ్లి అనేది ఇద్దరు వ్యక్తుల మధ్య వాగ్దానం మాత్రమే కాదు.. బాధ్యతలు, అలవాట్లు, ప్రాధాన్యతలతో పాటు ముఖ్యంగా పెద్ద ఆర్థిక మార్పు కూడా. పెళ్లైన తర్వాత ఇద్దరి ఆర్థిక అలవాట్లలో చాలా మార్పులు వస్తాయి. ఎందుకంటే పెళ్లి తర్వాతే ఇంటి కొనుగోలు, భవిష్యత్‌ ప్రణాళికలు, పెట్టుబడులు, పిల్లలు చదువులు వంటివి మదిలో మెదులుతుంటాయి. ఇలాంటివన్నీ భాగస్వాముల జీవనశైలిలో చాలా మార్పులు తీసుకొస్తాయి. మీరు మీ జీవిత భాగస్వామితో కలిసి భవిష్యత్‌ను ప్రారంభించడానికి వ్యవస్థీకృత ఆర్థిక ప్రణాళిక అవసరం. అందుకోసం కొత్తగా విహాహం అయినవారు ఆర్థిక నిర్వహణ గురించి విడిగా కాకుండా.. భార్యాభర్తలిద్దరూ కలిపే నిర్ణయాలు తీసుకోవాలి.
ఖర్చులు ప్లాన్ చేయాలి..
భాగస్వాములిద్దరిలో.. ఎవరికైనా ఎక్కువ ఖర్చు చేసే అలవాటు ఉంటే ఆ విషయంపై చర్చించండి. భార్యాభర్తలిద్దరూ నిర్ణీత నెలవారీ మొత్తాన్ని నిర్ణయించుకోవాలి. రెంట్/మెయింటెనెన్స్‌, కిరాణా సామగ్రి, యుటిలిటీలు, ముఖ్యంగా పిల్లల చదువు మొదలైన వాటికి చెల్లించడానికి జాయింట్ ఖాతాను నిర్వహించొచ్చు. మీ కుటుంబానికి తగిన జీవిత బీమా, ఆరోగ్య బీమా తప్పనిసరిగా ఉండేలా జగ్రత్త పడాలి.
భార్యభర్తలు ఉద్యోగులైతే.. తమ ఆదాయం ప్రకారం ఇంటి ఖర్చులను, భవిష్యత్‌ పొదుపులను డివైడ్ చేసుకోవచ్చు. ఇంటి ఖర్చులు, పిల్లల చదువులతో సహా లెక్కవేసి.. ఇద్దరి ఆదాయంలో చెరో 50 శాతం ఖర్చు చేయొచ్చు. ఒకవేళ దంపతులిద్దరిలో ఎవరైనా ఎక్కువ సంపాదిస్తే.. వారు ఖర్చులలో తమ వాటాను పెంచుకోవచ్చు. ఈ ఖర్చులను ట్రాక్‌ చేయడానికి స్పార్ట్ ఫోన్ సాయం తీసుకోవచ్చు. దీనికోసం ఇప్పటికే వివిధ మొబైల్‌ యాప్లు ప్రస్తుతం అందుబాటులో ఉన్నాయి. వీటిని ఉపయోగించి తగిన విధంగా ప్లాన్ చేసుకోవచ్చు.
జాయింట్ ఖాతా అవసరం..
భార్యాభర్తలకు విడివిడి బ్యాంకు ఖాతాలు ఉన్నా... ఇంటి ఖర్చుల నిమిత్తం డబ్బులు డిపాజిట్‌/విత్‌డ్రా చేసుకోవడానికి ఒక జాయింట్ బ్యాంకు అకౌంట్ను తీసుకోవడం మంచిది. బ్యాంకు డిపాజిట్లలో కొన్ని ట్యాక్స్ సబ్సిడీలు లభిస్తాయి. ఇద్దరిలో ఎవరు తక్కువ పన్ను శ్లాబ్‌లో ఉంటే.. వారి పేరు మీద ఫిక్స్‌డ్‌ డిపాజిట్లు వేసుకోవచ్చు. ఇలా ప్రణాళిక చేసుకుంటే పన్ను ఆదా అవుతుంది.
ఆస్తులు కొనాలంటే అలా చేయాలి!
ఇల్లు వంటి ఆస్తులను కొనాలనుకున్నప్పుడు ఇద్దరూ ప్రయత్నించాల్సివస్తుంది. ఉదాహరణకు, ఇల్లు కొనాలని చూస్తున్నప్పుడు తక్కువ ఆదాయం గల దంపతులు లేదా తక్కువ క్రెడిట్‌ స్కోరు భార్యాభర్తలు లోన్ కోసం ఉమ్మడిగా దరఖాస్తు చేసుకోవచ్చు. సంపన్న కుటుంబాల విషయంలో కూడా పెద్ద ఇంటికి అప్‌గ్రేడ్‌ అవ్వాలన్న వారు.. ఇద్దరి భాగస్వామ్యంతో ఎక్కువ మొత్తంలో రుణం పొందొచ్చు. కేవలం ఇల్లు మాత్రమే కాకుండా కారు, విద్యా రుణం వంటి వాటిని జాయింట్గా తీసుకోవచ్చు. ఎమర్జెన్సీ ఫండ్ను కూడా కలిపి సమకూర్చుకోవచ్చు.
జాయింట్ ఓనర్షిప్..
జాయింట్ ఓనర్షిప్ వల్ల ఊహించని పరిస్థితుల్లో ఇబ్బంది లేకుండా వేగంగా బయటపడొచ్చని నిపుణులు చెబుతున్నారు. ఉదాహరణకు.. భార్య కేవలం నామినీ మాత్రమే కాకుండా భర్త ఆస్తులకు జాయింట్ ఓనర్ అయితే.. భర్త మరణం తర్వాత ఆమె ఆ ఆస్తులు ఆటోమేటిక్‌గా ఆమె చేతికి వస్తాయి. ఒకవేళ భార్యను జాయింట్ ఓనర్‌గా చేయడంలో ఏవైనా ఇబ్బందులుంటే, ఆమెను లబ్ధిదారు (beneficiary)గా ఉద్దేశించి వీలునామా రాయాలి. దీనివల్ల భర్త చనిపోతే ఆస్తులు సజావుగా భార్యకు బదిలీ అవుతాయి.
మహిళల పేరుపై ఇంటి కొనుగోలు..
చాలా రాష్ట్రాల్లో మహిళలకు స్టాంప్‌ డ్యూటీ తక్కువ ఉంటుంది. కాబట్టి, ఖర్చును ఆదా చేయడానికి భార్య పేరు మీద రిజిస్ట్రేషన్‌ చేయవచ్చు ఉని నిపుణులు చెబుతున్నారు. అయితే, ఇలాంటి సందర్భాల్లో ఇల్లు భార్య ఆస్తిగానే ఉంటుంది. ఏవైనా అనుకోని సందర్భంలో విడాకులు లాంటివి జరిగితే భర్త దాన్ని క్లెయిం చేస్తే, అది చట్టపరమైన వివాదానికి దారి తీసే అవకాశం ఉంది. చట్ట ప్రకారం ఒక మహిళ భరణానికి అర్హురాలు. ఇందులో నివాస హక్కు ఉంటుంది. భార్యకు తన భర్త ఆస్తులలో సగం కాకపోయినా న్యాయస్థానాలు సహేతుకమైన నిర్వహణ మొత్తాన్ని మంజూరు చేస్తాయి. వివాదంలో ఇంటిని కోర్టులు విభజించాలని నిర్ణయించే అవకాశం ఉంది. ఆ సందర్భంలో భర్త సంపాదించినా భార్య పేరు మీద ఇల్లుంటే, ఆ ఇంటిని పాక్షికంగా అతడికి ఇచ్చే అవకాశం ఉంది.
ప్రొత్సాహకాలు పొందవచ్చు..
ఉద్యోగం చేసే దంపతులు తమ సంపాదనపై స్వయం ప్రతిపత్తిని కోరుతున్నా, కొన్ని ముఖ్యమైన విషయాలలో ఫైనాన్స్‌ను కలపడం వల్ల ట్యాక్స్ ఇన్సెంటీవ్స్ లభిస్తాయి. ఇవి ఉమ్మడి లక్ష్యాలను మెరుగ్గా సాధించడంలో సహాయపడతాయని ఆర్థిక నిపుణులు అంటున్నారు. పెళ్లైన జంట పొందగల ప్రయోజనంలో ఉమ్మడి ఇంటి రుణం ప్రధానమైంది. హౌస్ లోన్ తీసుకున్న జంట ఇన్కం ట్యాక్స్ నియమాల ప్రకారం విడివిడిగా రూ.2 లక్షల వరకు మినహాయింపును క్లెయిమ్ చేసుకునే అవకాశం ఉంది. అలాగే, సెక్షన్‌ 80సి కింద అసలు మొత్తంపై ఇద్దరూ రూ.1.50 లక్షల వరకు క్లెయిం చేసుకోవచ్చు.
చిక్కుల్లేకుండా బీమా పరిహారం పొందాలంటే - ఈ జాగ్రత్తలు తప్పనిసరి!
లాకర్లో విలువైన వస్తువులు పోతే బ్యాంకులు బాధ్యత వహించవని తెలుసా?
