LIC listing price: దేశం ఆసక్తిగా ఎదురుచూసిన ఎల్ఐసీ ఐపీఓ షేర్లు.. మంగళవారం మార్కెట్లలో లిస్టయ్యాయి. జాతీయ స్టాక్ ఎక్స్ఛేంజ్‌ ఎన్ఎస్ఈలో ఎల్ఐసీ షేరు ఇష్యూ ధర రూ.949తో పోలిస్తే 8.11 శాతం రాయితీతో రూ.872 వద్ద లిస్టయ్యింది. దీంతో 15 షేర్లకు రూ.14,235 పెట్టుబడిగా పెట్టిన మదుపర్లకు రూ.1,155 లిస్టింగ్‌లాస్‌ తప్పలేదు. బీఎస్ఈలో ఒక్కో షేరు ఎల్ఐసీ ఇష్యూ ధర రూ.949తో పోలిస్తే 8.62 శాతం రాయితో రూ.867.20 పైసల వద్ద లిస్టయింది.
దేశీయ స్టాక్ మార్కెట్ చరిత్రలోనే అతిపెద్ద ఐపీఓగా నిలిచిన ఎల్ఐసీ గరిష్ఠ ధర వద్ద రూ.20,557 కోట్లు సమీకరించింది. ప్రపంచవ్యాప్తంగా ఈక్విటీ మార్కెట్లు తీవ్ర ఒడుదొడుకులు ఎదుర్కొంటున్న వేళ ఎల్ఐసీ షేర్లు లిస్టింగ్‌కు రావడం ప్రతికూలాంశంగా మారింది. ఎల్ఐసీ ఐపీఓకి దాదాపు మూడు రెట్ల స్పందన లభించింది. ముఖ్యంగా ఒక్కో షేరుపై 60 రూపాయలు రాయితీ పొందిన పాలసీదారులు వారికి కేటాయించిన విభాగంలో 6 రెట్ల షేర్లకు బిడ్లు దాఖలు చేశారు. ఉద్యోగుల విభాగంలో 1.94 రెట్లు, రిటైల్‌ విభాగంలో 1.94 రెట్లు, క్యూఐబీ 2.83 రెట్లు, ఎన్ఐఐ 2.8 రెట్ల షేర్లకు బిడ్లు దాఖలు చేశారు. రిటైల్‌, ఉద్యోగులకు ఒక్కో షేరుపై రూ.45 రాయితీ ఇచ్చారు.
ఎల్ఐసీ పబ్లిక్‌ ఇష్యూ ధరల శ్రేణిని 902-949 రూపాయలుగా ప్రకటించారు. పాలసీదార్లకు రూ.60, రిటైల్‌ మదుపర్లు, ఉద్యోగులకు రూ.45 చొప్పున రాయితీ దక్కింది. 30 కోట్ల వరకు పాలసీదార్లు, 13 లక్షల మంది ఏజెంట్లు ఉన్న ఎల్ఐసీకి మొత్తం బీమా ప్రీమియంలో 64 శాతం మార్కెట్ వాటాను కలిగి ఉంది. 2019-20లో 5.7 లక్షల కోట్ల ప్రీమియం ఆదాయంతో భారత బీమా మార్కెట్ రికార్డు సృష్టించింది. ఇందులో ఎల్ఐసీకి 3.8 లక్షల కోట్ల ఆదాయం దక్కింది. ఆర్థిక నిపుణులు, మార్కెట్ విశ్లేషకులు మాత్రం ఎల్ఐసీ దీర్ఘకాలంలో మంచి లాభాలిస్తుందని సూచిస్తున్నారు. మదుపర్లు ఏమాత్రం తొందరపడొద్దని దీర్ఘకాల వ్యూహంతో ముందుకెళ్లాలని సలహా ఇస్తున్నారు. బీమా రంగంలో ఉన్న ఇతర ప్రైవేటు సంస్థలతో పోలిస్తే ఎల్ఐసీ భవిష్యత్తులో చాలా మెరుగైన ఫలితాలను సాధిస్తుందని అంచనా వేస్తున్నారు.
జోరుగా స్టాక్ మార్కెట్లు.. మంగళవారం సెషన్లో స్టాక్మార్కెట్లు పుంజుకున్నాయి. 53,285 వద్ద ప్రారంభమైన సెన్సెక్స్ 942 పాయింట్లు లాభపడి 53,916 వద్ద ట్రేడవుతోంది. గరిష్ఠంగా 53,918ను తాకిన సెన్సెక్స్.. 53,176 కనిష్ఠాన్ని నమోదు చేసింది. టాటాస్టీల్, ఐటీసీ, హెచ్సీఎల్ టెక్, ఐసీఐసీఐ బ్యాంక్, ఎల్టీ షేర్లు లాభాల్లో కొనసాగుతున్నాయి.
మరోవైపు నిఫ్టీ సూచీలు కూడా లాభాల్లో కొనసాగుతున్నాయి. 15,912 వద్ద ప్రారంభమైన నిఫ్టీ 283 పాయింట్లు లాభపడి 16125కు చేరుకుంది. 15,900 కనిష్ఠాన్ని నమోదు చేసిన నిఫ్టీ.. ఓ దశలో అత్యధికంగా 16,132ను తాకింది. హిందాల్కో, కోల్ ఇండియా, ఓఎన్జీసీ షేర్లు లాభాల్లో ట్రేడవుతున్నాయి. మెటల్, రియల్ ఎస్టేట్, ఆటో సహా అన్ని రంగాల్లో లాభాలబాట పట్టడం.. ఎల్ఐసీ లిస్టింగ్ అవడం మార్కెట్పై ప్రభావం చూపాయి.
ఇదీ చూడండి : ఫిక్స్డ్ డిపాజిట్పై అధిక రాబడి కావాలా? ఈ ట్రిక్స్ ట్రై చేయండి!
