వచ్చే వారం 5 మేజర్​ IPOలు- రూ.7,300 కోట్లు సమీకరణ!- మీరు ఎందులో ఇన్వెస్ట్ చేస్తారు?

IPOs In November 2023 In Telugu : వచ్చే వారం 5 మేజర్​ ఐపీఓలు వస్తున్నాయి. వీటిలో టాటా టెక్నాలజీస్​, IREDAలతోపాటు, తొలిసారిగా ఐపీఓకు వస్తున్న ఫెడ్​బ్యాంక్​ ఫైనాన్సియల్​ సర్వీసెస్​, ఫ్లేర్​ రైటింగ్​ ఇండస్ట్రీస్​, గాంధార్​ ఆయిల్​ రిఫైనరీ ఇండియా కూడా ఉన్నాయి. ఇవన్నీ కలిసి ఉమ్మడిగా ఐపీఓల ద్వారా దాదాపు రూ.7,300 కోట్లు సమీకరించే అవకాశం ఉంది. పూర్తి వివరాలు మీ కోసం..

IPOs In November 2023 : వచ్చే వారం 5 భారీ ఐపీఓ (Initial Public Offering)లు మన ముందుకు వస్తున్నాయి. ముఖ్యంగా వీటిలో టాటా టెక్నాలజీస్​, ఇండియన్​ రెన్యూవబుల్​ ఎనర్జీ డెవలప్​మెంట్​ ఏజెన్సీ లిమిటెడ్​లకు సంబంధించిన మేజర్​ ఐపీఓలు ఉన్నాయి. వీటితోపాటు ఫెడ్​బ్యాంక్​ ఫైనాన్సియల్​ సర్వీసెస్​, ఫ్లేర్​ రైటింగ్​ ఇండస్ట్రీస్​, గాంధార్​ ఆయిల్​ రిఫైనరీ ఇండియాలకు చెందిన ఐపీఓలు కూడా ఈ నవంబర్​లోనే వస్తున్నాయి. ఇవన్నీ కలిసి సుమారుగా రూ.7,300 కోట్లను ఐపీఓల ద్వారా సమీకరించాలని లక్ష్యంగా పెట్టుకున్నాయి.

ఐపీఓ తేదీలు
IPO Dates In November 2023 :

• కేంద్ర ప్రభుత్వ సంస్థ అయిన ఇండియన్​ రెన్యూవబుల్ ఎనర్జీ డెవలప్​మెంట్​ ఏజెన్సీ (IREDA) ఐపీఓ సబ్​స్క్రిప్షన్​ నవంబర్​ 21న ఓపెన్ అయ్యి నవంబర్​ 23తో ముగియనుంది.
• మిగతా 4 సంస్థల ఐపీఓ సబ్​స్క్రిప్షన్​ నవంబర్​ 22 నుంచి నవంబర్​ 24 వరకు అందుబాటులో ఉంటుంది.

Upcoming IPOs 2023 :

1. Tata Technologies IPO : టాటా కంపెనీ నుంచి దాదాపు 20 ఏళ్ల తరువాత వచ్చిన మొదటి ఐపీఓ ఇది. అయితే ఇది పూర్తిగా ఆఫర్​ ఫర్ సేల్​ (OFS) మాత్రమే అని ఇన్వెస్టర్లు గుర్తించుకోవాలి. ఈ ఐపీఓలో మొత్తం 6.08 కోట్ల ఈక్విటీ షేర్లు అందుబాటులో ఉండనున్నాయి. టాటా కంపెనీ షేర్​ ప్రైస్ బ్యాండ్​ రూ.475- రూ.500 వరకు నిర్ణయించింది. ఈ ఐపీఓలో అప్పర్ ప్రైస్​ బ్యాండ్​ వద్ద మొత్తంగా రూ.3,042 కోట్లు సమీకరించాలని కంపెనీ లక్ష్యంగా పెట్టుకుంది.
2. IREDA IPO : ఇండియన్​ రెన్యూవబుల్ ఎనర్జీ డెవలప్​మెంట్ ఏజెన్సీ ఈ ఐపీఓ ద్వారా రూ.2,150 కోట్లు సమీకరించాలని భావిస్తోంది. ఇందుకోసం షేర్ ప్రైస్ బ్యాండ్​ రూ.30 - రూ.32గా నిర్ణయించింది. IREDAలోని నూటికి 100 శాతం షేర్లు భారత ప్రభుత్వం చేతిలోనే ఉన్నాయి. అందుకే ఐఆర్​ఈడీఏ 40.31 కోట్ల ఫ్రెష్ షేర్లను ఈ ఐపీఓ ద్వారా అందుబాటులోకి తెచ్చింది. మరోవైపు గవర్నమెంట్ ఆఫ్ ఇండియా 26.88 కోట్ల షేర్లను ఆఫర్​ ఫర్ సేల్​కు ఉంచి రూ.860 కోట్లు సమీకరించాలని భావిస్తోంది.
3. Fedbank Financial Services : ఫెడరల్ బ్యాంక్ అనుబంధ సంస్థ అయిన ఫెడ్​బ్యాంక్ ఫైనాన్సియల్ సర్వీసెస్​.. తొలిసారిగా ఐపీఓకు వచ్చింది. ఈ నాన్​-బ్యాంకింగ్ ఫైనాన్స్ కంపెనీ (NBFC).. ఫ్రెష్ ఇష్యూ ద్వారా రూ.1,092 కోట్లు, OFS ద్వారా రూ.492 కోట్లు సమీకరించాలని లక్ష్యంగా పెట్టుకుంది. ఫెడ్​బ్యాంక్​ ఫైనాన్సియల్ సర్వీసెస్​ ఈ ఐపీఓలో షేర్​ ప్రైస్ బ్యాండ్​ను రూ.133-140గా నిర్ణయించింది.
4. Flair Writing Industries : పెన్నుల తయారీ సంస్థ అయిన ఫ్లేర్ రైటింగ్ ఇండస్ట్రీస్​ ఈ ఐపీఓ ద్వారా మొత్తం రూ.593 కోట్లు సమీకరించాలని భావిస్తోంది. వీటిలో ఫ్రెష్ షేర్స్ ద్వారా రూ.292 కోట్లు, OFS ద్వారా రూ.301 కోట్లు సమీకరించాలని నిర్ణయించుకుంది. ఇందుకోసం షేర్ ప్రైస్ బ్యాండ్​ను రూ.288 - రూ.304గా నిర్ణయించింది.
5. Gandhar Oil Refinery : గాంధార్​ ఆయిర్ రిఫైనరీ 1.79 కోట్ల ఫ్రెష్ షేర్స్ ఇష్యూ చేసి రూ.302 కోట్లు, OFS ద్వారా 1.18 కోట్లు అందించి రూ.198.69 కోట్లు సమీకరించాలని లక్ష్యంగా పెట్టుకుంది. ఇందుకోసం షేర్ ప్రైస్​ బ్యాండ్​ను రూ.160-169గా నిర్ణయించింది.