Toll Gate Gps Navigation System: దేశవ్యాప్తంగా ప్రస్తుతం అమలవుతున్న టోల్ పాలసీలో పెను మార్పులు తీసుకువచ్చేందుకు కేంద్ర ప్రభుత్వం సన్నాహాలు చేస్తోంది. దశాబ్దాల కాలంగా ఉన్న టోల్‌ప్లాజాల వ్యవస్థకు మంగళం పలికేందుకు చకచకా ఏర్పాట్లు చేస్తోంది. జాతీయ రహదారులపై ఉన్న టోల్‌ప్లాజాలను పూర్తిగా తొలగించి, వాటి స్థానంలో జీపీఎస్ వ్యవస్థను ప్రవేశపెట్టేందుకు గత ఏడాది నిర్ణయం తీసుకున్న కేంద్రం.. కొత్త పాలసీని సాధ్యమైనంత త్వరగా అమలుచేసే దిశగా చర్యలు చేపట్టింది. ఇప్పటివరకు జాతీయ రహదారులపై నిర్ణీత దూరం పరిధిలో టోల్ ప్లాజాలు ఏర్పాటు చేసి.. రహదారుల అభివృద్ధి, మౌలిక సదుపాయాల కల్పనకు వాహనదారుల నుంచి ట్యాక్స్‌ వసూలు చేస్తూ వస్తోంది.
అయితే ఇటీవల కాలంలో టోల్‌ప్లాజాల వద్ద రద్దీని నియంత్రించేందుకు ఫాస్టాగ్ విధానాన్ని అమలు చేస్తున్నారు. ఈ విధానం వల్ల అన్ని టోల్‌ప్లాజాల వద్ద రద్దీ పూర్తిగా తగ్గి వాహనదారుల ప్రయాణం సులువుగా మారింది. ఇప్పుడు జాతీయ రహదారులపై ప్రయాణం మరింత సులువుగా మార్చేందుకు కేంద్ర ఉపరితల రవాణా శాఖ టోల్‌ప్లాజాలు లేని వ్యవస్థకు శ్రీకారం చుట్టాలని నిర్ణయం తీసుకుంది. శాటిలైట్ ఆధారిత జీపీఎస్ ట్రాకింగ్ విధానం అమలుకు చకచకా ఏర్పాట్లు చేస్తోంది. అందులో భాగంగా కేంద్ర ప్రభుత్వం.. 1.37 లక్షల కార్లపై ఈ పైలట్ ప్రాజెక్ట్‌ను ప్రారంభించింది.
కార్ల గమనం ప్రభుత్వానికి ఎలా తెలుస్తుంది?
ప్రస్తుతం మన రోడ్లపై ప్రయాణించే 97 శాతం వాహనాలకు ఫాస్టాగ్ ద్వారా టోల్ వసూలు చేస్తున్నారు. కాబట్టి, ఖాతా నుంచి సేకరణ వంటి మౌలిక సదుపాయాలు దాదాపు సిద్ధంగా ఉన్నాయి. ప్రభుత్వానికి ఇప్పుడు కావలసిందల్లా ఈ కార్లు ఎప్పుడు, ఎక్కడ ఉన్నాయో తెలుసుకోవడమే. అందుకు జీపీఎస్ వ్యవస్థను ఉపయోగిస్తారు. జీపీఎస్ ట్రాకింగ్ విధానం ద్వారా టోల్ రోడ్లపై కార్లు ప్రయాణించే కిలోమీటర్లను లెక్కిస్తారు.
ఎంత వసూలు చేస్తారు?
కారు టోల్ రోడ్డు పైకి వచ్చిన వెంటనే ప్రభుత్వం టోల్ టాక్స్ వసూలునూ ప్రారంభిస్తుంది. కారు ప్రయాణించే కిలోమీటర్లపై ఛార్జీ ఆధారపడి ఉంటుంది. కాబట్టి, ఎక్కువ కిలోమీటర్లు ప్రయాణిస్తే ఎక్కువ ఛార్జీ వసూలు చేస్తారు.
ప్రస్తుతం ఈ వ్యవస్థ మన దేశంలో అమల్లో ఉందా?
జీపీఎస్ నేవిగేషన్ పరికరాలతో ప్రస్తుతం 1.37 లక్షల కార్లపై ఈ విధానాన్ని ప్రయోగాత్మకంగా చేపడుతున్నారు. దానిపై రష్యా, దక్షిణ కొరియా నిపుణులు నివేదిక తయారు చేస్తున్నారు. అమలులో ఎదురైన లోటుపాట్లు, తీసుకోవాల్సిన ఇతర చర్యలపై పూర్తిస్థాయిలో అధ్యయనం చేసి కొత్త పాలసీని దేశవ్యాప్తంగా విడతల వారీగా అమలుచేయాలని భావిస్తోంది కేంద్రం. మరోవైపు, రవాణా మంత్రిత్వ శాఖ అధికారులు కూడా ఈ వ్యవస్థ అమలు కోసం కొత్త మార్గదర్శకాలను రూపొందిస్తున్నారు. త్వరలో ప్రకటించనున్నారు.
కచ్చితంగా ఫాస్టాగ్లో డబ్బులు ఉండాల్సిందేనా?
అయితే కొన్ని సార్లు కార్ల యజమానులు.. తమ ఫాస్టాగ్ ఖాతాలో డబ్బులు ఉన్నాయో లేదో చూసుకోకుండా ప్రయాణాల్ని మొదలుపెడుతుంటారు. అయితే అటువంటి వారి కోసం ఓ అవకాశం ఉంది. ప్రయాణం పూర్తైన కొన్ని రోజుల తర్వాత రికవరీ చేసుకుంటుంది ప్రభుత్వం.
ఈ కొత్త వ్యవస్థ ద్వారా ప్రభుత్వానికి లాభమేనా?
ఈ సరికొత్త వ్యవస్థ.. కారు ప్రయాణించిన ప్రతి కిలోమీటరుకు వసూలు చేస్తుంది. కాబట్టి ప్రభుత్వానికి టోల్ ఆదాయం అనేక రెట్లు పెరుగుతుందని నిపుణులు భావిస్తున్నారు. ప్రస్తుతం చాలా మంది టోల్ ప్లాజాను తప్పించుకోవడానికి వేరే మార్గాల ద్వారా ప్రయాణాల్ని చేస్తున్నారు. వాటిని అడ్డుకట్ట వేయడానికి ఇది సరైన మార్గమని నిపుణులు అంటున్నారు
కార్ల యజమానులకు లాభమా? నష్టమా?
ఈ వ్యవస్థ వల్ల కొన్ని సందర్భాల్లో కార్ల యజమానులకు కూడా లాభమే అని అంటున్నారు. కొన్ని సార్లు ప్రయాణించే దూరం తక్కువే అయినా టోల్ ఛార్జీ ఎక్కువగా కట్టాల్సి వస్తుంటుంది. కాబట్టి ప్రయాణించిన కిలోమీటర్లకు మాత్రమే ఈ వ్యవస్థ వసూలు చేయనుండడం వల్ల వాహనాదారులకు లాభమే అని నిపుణులు అభిప్రాయపడుతున్నారు.
కొత్త కార్లకు ఓకే.. మరి పాత కార్ల సంగతేంటి?
కొత్తగా వచ్చే వాహనాల్లో జీపీఎస్‌ను అమర్చేందుకు ఇప్పటికే ఆదేశాలు జారీ చేసింది. అలాగే పాత వాహనాలకు కూడా జీపీఎస్ పరికరాలు అమర్చేందుకు ప్రత్యేక కార్యాచరణను రూపొందిస్తోంది. ప్రస్తుతం జాతీయ రహదారుల్లో ప్రయాణించే వాహనాలకు ఫాస్టాగ్‌ను ఏవిధంగా అమలు చేస్తున్నారో అదే తరహాలో ప్రతి వాహనానికి జీపీఎస్ పరికరాలు ఉండే విధంగా ప్రణాళికలు సిద్ధం చేస్తోంది ప్రభుత్వం.
వేరే దేశాల్లో ఎక్కడైనా అమల్లో ఉందా?
అనేక ఐరోపా దేశాలలో ఈ వ్యవస్థ విజయవంతంగా అమలవుతోంది. జర్మనీలో, దాదాపు 98.8 శాతం కార్లలో శాటిలైట్ నావిగేషన్ సిస్టమ్‌లు ఇన్‌స్టాల్ చేసి ఉంటాయి. కారు టోల్ రహదారిలోకి ప్రవేశించిన వెంటనే పన్ను లెక్కింపు ప్రారంభమవుతుంది. అది హైవే నుంచి ఊరిలోకి వచ్చిన వెంటనే, ఎన్ని కిలోమీటర్లు ప్రయాణించారో అంత టాక్స్.. ఫాస్టాగ్ ఖాతా నుంచి వసూలు చేస్తారు.
ఇదీ చదవండి: ఆర్బీఐ షాక్.. వడ్డీ రేట్లు పెంపు.. ఈఎంఐలు మరింత భారం
