CNG price in India: దేశీయ క్షేత్రాల నుంచి సిటీ గ్యాస్ పంపిణీ విభాగాలకు డిమాండ్కు తగినట్లుగా కొత్త కేటాయింపులు చేయకపోవటం వల్ల కంప్రెస్డ్ నేచురల్ గ్యాస్ (సీఎన్జీ), పైప్డ్ కుకింగ్ గ్యాస్(పీఎన్జీ) ధరలు ఆకాశాన్నంటుతున్నాయి. పెట్రోల్, డీజిల్ ధరలతో పాటు సీఎన్జీ ధరలు పెరగటం ఆందోళన కలిగిస్తోంది. సిటీ గ్యాస్ పంపిణీ(సీజీడీ) విభాగాలకు ఎలాంటి అవాంతరాలు లేకుండా 100 శాతం గ్యాస్ సరఫరా చేయాలన్న కేంద్ర కేబినేట్ నిర్ణయానికి విరుద్ధంగా ప్రస్తుత పరిస్థితులు ఉన్నాయి. ప్రస్తుతం 2021, మార్చి నాటి డిమాండ్కు తగినట్లుగా గ్యాస్ సరఫరా జరుగుతోంది. దీంతో ఇప్పటి డిమాండ్ను చేరుకునేందుకు సిటీ గ్యాస్ ఆపరేటర్లు అధిక ధరకు దిగుమతి చేసుకున్న ఎల్ఎన్జీని కొనుగోలు చేయాల్సి వస్తోంది. ఇది గ్యాస్ ధరలు రికార్డు స్థాయికి చేరుకునేలా చేస్తోందని సంబంధిత వర్గాలు ఆందోళన వ్యక్తం చేస్తున్నాయి.
ఏటా ఆరు నెలలకోసారి డిమాండ్కు తగినట్లుగా నేచురల్ గ్యాస్ కేటాయింపులు సవరిస్తుంది కేంద్రం. గత ఆరు నెలల్లో ఉన్న డిమాండ్ను బట్టి ప్రతి సంవత్సరం ఏప్రిల్, అక్టోబర్లో ఈ కేటాయింపులు ఉంటాయి. అయితే.. 2021, మార్చి నుంచి ఇప్పటి వరకు ఎలాంటి కొత్త కేటాయింపులు చేయకపోవటం గమనార్హం. అయితే.. పంపిణీ కేంద్రాలకు గ్యాస్ సరఫరా నిలిపివేయలేదని, అదనంగా కేటాయింపులు చేస్తే విద్యుత్తు, ఎరువులు వంటి కీలక పరిశ్రమలకు సరఫరాలో కోత పడుతుందని ఇంధన మంత్రిత్వ శాఖ పేర్కొంది. డిమాండ్కు సంబంధించి కొత్త డేటా కోసం చూస్తున్నట్లు పేర్కొంది.
" 2022, ఏప్రిల్లో గ్యాస్ కేటాయింపుల కోసం సీజీడీల నుంచి 2021, అక్టోబర్ నుంచి 2022, మార్చి వ్యవధిలో డిమాండ్, సరఫరాకు సంబంధించిన అప్డేటెడ్ డేటా కోసం వేచి ఉన్నాం. ఇప్పటి వరకు మాకు ఎలాంటి సమాచారం అందించలేదు. 2020 అక్టోబర్ నుంచి 2021, మార్చి వరకు ఉన్న డేటా ప్రకారం 2021 ఏప్రిల్- అక్టోబర్ కేటాయింపులు జరిగాయి."
- ఇంధన మంత్రిత్వ శాఖ, కేంద్ర ప్రభుత్వం.
మూడు నెలలకోసారి సవరించాలి: సీఎన్జీ, పీఎన్జీ డిమాండ్ను అందుకునేందుకు ప్రతి మూడు నెలలకోసారి గ్యాస్ కేటాయింపులు సవరించాలని, గడిచిన రెండు నెలల డిమాండ్ను పరిగణనలోకి తీసుకోవాలని సీజీడీ ఆపరేటర్లు కేంద్రాన్ని కోరుతున్నారు. వారి వినతులను పట్టించుకోని కేంద్రం ఏడాదిగా ఎలాంటి కొత్త కేటాయింపులు చేయలేదని పంపిణీ సంస్థలు ఆందోళన వ్యక్తం చేశాయి. అయితే.. అలా చేస్తే కీలక పరిశ్రమలకు కోత విధించాల్సి వస్తుందని ఇంధన శాఖ ప్రతినిధి పేర్కొన్నారు.
110 శాతం పెరిగిన ధరలు: డిమాండ్కు తగినంతగా కేటాయింపులు లేకపోవటం వల్ల సీఎన్జీ, పీఎన్జీ గ్యాస్ ధరలు 110 శాతం పెరిగాయి. ధరల మార్పు విధానం(ఏపీఎం) ప్రకారం సీఎన్జీ, పీఎన్జీ ధరలు మిలియన్ బ్రిటీష్ థర్మల్ యూనిట్కు 2.90 అమెరికా డాలర్ల నుంచి 6.10 డాలర్లకు చేరుకున్నాయి. సరిపడా కేటాయింపులు లేకపోవటం వల్ల దేశీయ ధరలకు ఆరు రెట్లు అధికంగా ఉన్న ఇంపోర్టెడ్ లిక్విఫైడ్ నేచురల్ గ్యాస్ (ఎల్ఎన్జీ)ను కొనుగోలు చేయాల్సి వస్తొంది. దీని వల్ల ఏడాదిలో సీఎన్జీ, పీఎన్జీ కిలో ధర 60 శాతం లేదా రూ.28 పెరిగింది. ఇది గ్యాస్ పంపిణీ సంస్థల నిర్వహణకు ప్రశ్నార్థకంగా మారిందని సంబంధిత వర్గాలు తెలిపాయి. మరోవైపు.. కొత్త నగరాలకు గ్యాస్ సరఫరా చేసేందుకు రూ.2 లక్షల కోట్ల పెట్టుబడులన్న లక్ష్యాన్ని వెనక్కి నెడుతోందన్నారు. పర్యావరణ హిత నేచురల్ గ్యాస్ వినియోగాన్ని 2030 నాటికి 15 శాతానికి పెంచాలన్న ప్రభుత్వ లక్ష్యానికి కేటాయింపులు ముఖ్యమన్నారు.
ఏప్రిల్ 14న సీఎన్జీ, పీఎన్జీ గ్యాస్ ధరలను పెంచుతూ నిర్ణయం తీసుకుంది కేంద్రం. దిల్లీలో కిలో సీఎన్జీపై రూ.2.50, పీఎన్జీపై రూ.4.25 పెంచింది. దీంతో ప్రస్తుతం దేశంలో సీఎన్జీ గ్యాస్ ధర కిలోకు దిల్లీలో రూ.71.61, ముంబయిలో రూ.72గా ఉంది. డిమాండ్ను చేరుకునేందుకు ఎల్ఎన్జీని కొనుగోలు చేస్తే వాటి ధరలు రూ.100-105కు చేరుకుంటాయి.
ఇదీ చూడండి: దేశంలో భారీగా తగ్గిన పెట్రో వాడకం.. ధరల మంటే కారణమా?
