వ్యక్తిగత గుర్తింపు ధ్రువీకరణలను తస్కరించి, వాటితో యాప్‌లు, రుణ సంస్థల నుంచి మోసపూరింతంగా అప్పులు తీసుకుంటున్న సంఘటనలు ఎన్నో వింటున్నాం. పేరు మీది.. చిరునామా మీది. డబ్బు మాత్రం వేరే వ్యక్తుల చేతుల్లోకి వెళ్తుంది. క్రెడిట్‌ నివేదికలు చూస్తే తప్ప మీరు బాకీ పడ్డారన్న సంగతి తెలియదు. బ్యాంకులు/ఎన్‌బీఎఫ్‌సీలు ప్రతి రుణ ఖాతా గురించి, సిబిల్‌, ఎక్స్‌పీరియన్‌లాంటి క్రెడిట్‌ బ్యూరోలకు సమాచారం ఇస్తుంటాయి. రుణ వాయిదాల చెల్లింపు తీరును బట్టి, ఆయా సంస్థలు క్రెడిట్‌ స్కోరును ఇస్తుంటాయి. మోసపూరితంగా మీకు తెలియకుండా రుణం తీసుకున్న సందర్భాల్లో వాయిదాలు చెల్లించరు కాబట్టి, క్రెడిట్‌ స్కోరు తగ్గిపోతుంది. నిజానికి వేరే వ్యక్తులు ఇతరుల గుర్తింపును ఎలా వాడుకుంటారన్నది చాలామందికి చిక్కు ప్రశ్నే.
తెలిసి ఇచ్చినప్పుడు.. కొన్నిసార్లు పాన్‌ ఇతర వ్యక్తుల రుణానికి అనుసంధానం అవుతుంటుంది. ఇది తెలిసే జరుగుతుంది. ఉదాహరణకు ఉమ్మడి రుణం తీసుకున్న సందర్భంలో. జీవిత భాగస్వాములిద్దరూ కలిసి రుణం తీసుకుంటారు. కానీ, చెల్లింపులు ఒకరి ఖాతా నుంచే వెళ్తుంటాయి అనుకుందాం. వాయిదాలు సరిగ్గా చెల్లించకపోతే ఇద్దరి క్రెడిట్‌ స్కోరుపైనా ఇది ప్రభావం చూపిస్తుంది. వేరే వ్యక్తులు తీసుకున్న రుణానికి హామీ సంతకం చేసినప్పుడూ పాన్‌ వారి రుణ ఖాతాకు జత అవుతుంది. వారు బాకీ తీర్చకపోతే.. ఆ విషయం మీ క్రెడిట్‌ నివేదికలోనూ పేర్కొంటారు. ఫలితంగా క్రెడిట్‌ స్కోరు దెబ్బతింటుంది. కాబట్టి, మీ క్రెడిట్‌ నివేదికను పరిశీలించి, ఇలాంటివేమైనా ఉన్నాయా చూసుకోవడం మంచిది.
మోసపూరితంగా.. మీ ప్రమేయం లేకుండా కొన్ని సందర్భాల్లో వేరే వ్యక్తులు అనధికారికంగా పాన్‌ను వాడే ఆస్కారం ఉంది. దురదృష్టవశాత్తూ కొన్ని రుణ సంస్థలు పాన్‌ వివరాలను తనిఖీ చేయకుండానే అప్పులు మంజూరు చేస్తాయి. ఇదే సమస్యలకు కారణం అవుతోంది. తనిఖీ చేస్తే అక్కడే సమస్య పరిష్కారం అవుతుంది. పాన్‌ అసలు యజమాని ఫిర్యాదు చేస్తే తప్ప దీని గురించి పట్టించుకోవు. అప్పటికే నష్టం వాటిల్లుతుంది.
ఏం చేయాలి? మీ పేరుతో ఎవరో మోసపూరితంగా అప్పు తీసుకున్నారన్న సంగతి క్రెడిట్‌ నివేదిక చూస్తే తప్ప అర్థం కాదు. అందుకే, క్రమం తప్పకుండా ఈ నివేదికలను పరిశీలిస్తుండాలి. దీనివల్ల వ్యక్తిగత క్రెడిట్‌ స్కోరుకు వచ్చే ఇబ్బందేమీ ఉండదు. ఇప్పటికే అప్పులు తీసుకున్న వారు ఈ విషయంలో మరింత అప్రమత్తంగా ఉండాలి. నెలకోసారైనా వీటిని చూడాలి. ఇప్పుడు ఎన్నో సంస్థలు ఈ క్రెడిట్‌ నివేదికలను ఉచితంగానే అందిస్తున్నాయి. ఇలా ఎప్పటికప్పుడు తనిఖీ చేసుకోవడం ద్వారా మోసపూరిత రుణాలపై అప్రమత్తంగా ఉండేందుకు వీలవుతుంది. సమస్య వచ్చినా వెంటనే పరిష్కరించుకోవచ్చు.
సమస్యను గుర్తించగానే.. రుణ సంస్థకు, క్రెడిట్‌ బ్యూరోలకు ఆ విషయాన్ని తెలియజేయాలి. మీ అనుమతి లేకుండానే ఏదైనా రుణానికి మీ పాన్‌కార్డును అనుసంధానం చేస్తే దాన్ని తొలగించాల్సిందిగా అడిగే హక్కు మీకుంది. మీ ఫిర్యాదుపై రుణ సంస్థ తప్పనిసరిగా స్పందించాల్సి ఉంటుంది. బ్యూరోలకు ఆన్‌లైన్‌లోనే ఫిర్యాదు చేయొచ్చు. ఇక్కడ ఒక విషయం మర్చిపోకూడదు. రుణ సంస్థ ఇచ్చిన వివరాల ఆధారంగానే క్రెడిట్‌ బ్యూరోలు మీ నివేదికలో మార్పులు చేర్పులు చేస్తాయి. ఒకవేళ రుణదాత మీ ఫిర్యాదును పరిగణనలోకి తీసుకోకుండా.. వివాదం కొనసాగిస్తే.. నివేదికలో మార్పు చేయడం సాధ్యం కాదు. మీ పాన్‌ను మీ ప్రమేయం లేకుండా వాడుకున్నారనే విషయాన్ని రుజువు చేయాల్సి ఉంటుంది. క్రెడిట్‌ స్కోరు దెబ్బతింటే.. కొత్త రుణాలు రావడం కష్టమవుతుంది. వడ్డీ అధికంగా విధించే వీలుంది. కొన్నిసార్లు రుణ దరఖాస్తును తిరస్కరించొచ్చు. అందుకే సాధ్యమైనంత వరకూ జాగ్రత్తగా ఉండటానికి ప్రయత్నిస్తూ.. ఎప్పుటికప్పుడు మన ఆర్థిక వివరాలను పరిశీలించుకుంటూ ఉండటమే దీనికి పరిష్కారం. - అధిల్‌ శెట్టి, సీఈఓ, బ్యాంక్‌బజార్‌
ఇదీ చదవండి: ఫ్లాట్గా ముగిసిన మార్కెట్లు.. భారీగా పెరిగిన పేటీఎం షేరు
