సొంత వాహనంలో ప్రయాణించడం ఎప్పుడూ సరదాగానే ఉంటుంది. ముఖ్యంగా పండగల వేళ సొంతూర్లకు వెళ్లడం ఒక మధురానుభూతిని మిగులుస్తుంది. వాహనాన్ని ఎప్పుడూ సమగ్ర బీమా పాలసీ, అనుబంధ పాలసీల (యాడ్‌-ఆన్‌)తో సిద్ధంగా ఉంచుకోవాలి. దురదృష్టవశాత్తూ జరిగే ప్రమాదాలు లేదా కారు పాడవటం వంటి సమయాల్లో ఆర్థిక రక్షణ కల్పించేలా ఇవి ఉపయోగపడతాయి.
ఇంజిన్‌ రక్షణ కవచం: కారు ఇంజిన్‌ ఎప్పుడైనా మొరాయించవచ్చు. కారులో ఇదే ఖరీదైన భాగమనే సంగతి తెలిసిందే. ఇంజిన్‌ వైఫల్యం సంభవించినప్పుడు దానికి పరిహారం ఇచ్చేలా 'ఇంజిన్‌ ప్రొటెక్షన్‌ కవర్‌' ఉపయోగపడుతుంది. మీ పర్యటనల్లోనే కాకుండా ఏడాది మొత్తంలో ఎప్పుడు ఇంజిన్‌ ఫెయిల్‌ అయినా ఈ అనుబంధ పాలసీ సహాయపడుతుంది. ఇంజిన్‌ మరమ్మతు లేదా కొత్త ఇంజిన్‌ను బిగించుకునే ఖర్చును చెల్లిస్తుంది.
టైర్‌ ప్రొటెక్టర్‌ కవర్‌: సుదీర్ఘక ప్రయాణాలు చేసేటప్పుడు వాహనం టైర్లు మంచి స్థితిలో ఉండాలి. ఎక్కువ గంటలు ఆగకుండా కారును నడిపినప్పుడు టైర్లు దెబ్బతినే ఆస్కారం ఉంది. రోడ్లు సరిగా లేకపోతే టైర్లు తొందరగా పాడవుతాయి. ఈ యాడ్‌ ఆన్‌ కవర్‌ ఉంటే.. టైర్లు పాడైనప్పుడు, కొత్త వాటిని కొనే ఖర్చును తిరిగి పొందవచ్చు.
వాహనం మధ్యలో ఆగిపోతే: ప్రయాణం మధ్యలో వాహనం చెడిపోతే వాహనాన్ని సమీపంలో ఉన్న మరమ్మతు కేంద్రానికి తరలించేందుకు బీమా సంస్థ సహాయం చేస్తుంది. దీనికోసం '24 గంటల రోడ్‌సైడ్‌ అసిస్టెన్స్‌ కవర్‌'ను తీసుకోవాలి.
బస ఏర్పాటు: వాహనం పాడవటం, అనుకోని ప్రమాదం వల్ల ప్రయాణం మధ్యలోనే ఆగిపోయిన సందర్భంలో అత్యవసర బస అవసరం అవుతుంది. ఇలాంటి సమయంలో 'ఎమర్జెన్సీ హోటల్‌ అకామ్‌డేషన్‌ కవర్‌' ఉపయోగపడుతుంది. హోటల్‌ గదికి చెల్లించిన మొత్తాన్ని ఈ కవర్‌ చెల్లిస్తుంది.
ఆహ్లాదకరమైన ప్రయాణాన్ని ప్రారంభించే ముందు వాహనాన్నీ ఒకసారి తనిఖీ చేసుకోండి. ఇంజిన్‌, టైర్లు, లైట్లు అన్నీ సరిగా ఉన్నాయా లేదా పరిశీలించండి. అవసరమైతే స్థానిక మెకానిక్‌ను సంప్రదించి కారును ఒకసారి తనిఖీ చేయించుకోండి. టోల్‌ గేట్ల దగ్గర ఇబ్బంది లేకుండా మీ ఫాస్ట్‌ట్యాగ్‌లో డబ్బులు ఉండేలా చూసుకోండి. కారులో ఉన్నవారందరూ సీటు బెల్టులు ధరించడం మర్చిపోవద్దు.
-రాకేష్‌ జైన్‌, సీఈఓ, రిలయన్స్‌ జనరల్‌ ఇన్సూరెన్స్‌
