హిండెన్బర్గ్ నివేదికతో అతలాకుతలమవుతున్న అదానీ గ్రూప్.. కీలక నిర్ణయం తీసుకుంది. కంపెనీ షేర్లను తాకట్టు పెట్టి తెచ్చుకున్న రుణాలను ముందుగానే చెల్లించేందుకు సిద్ధమైంది. వాస్తవానికి 2024 సెప్టెంబర్ వరకు గడువు ఉన్నా ప్రస్తుతం మార్కెట్లో నెలకొన్న అనిశ్చితి దృష్ట్యా సంస్థ ఈ నిర్ణయం తీసుకున్నట్లు ఓ ప్రకటనలో తెలిపింది. సుమారు 1,114 మిలియన్ డాలర్లను చెల్లిస్తామని సంస్థ వెల్లడించింది. తాకట్టు పెట్టిన వాటిలో అదానీ పోర్ట్స్కు సంబంధించిన 168.27 మిలియన్ షేర్లు, అదానీ గ్రీన్లో 27.56 మిలియన్ షేర్లు, అదానీ ట్రాన్స్మిషన్లో 11.77 షేర్లు ఉన్నాయని సంస్థ ప్రకటనలో పేర్కొంది.
అదానీ గ్రూప్ మార్కెట్ విలువ సగానికి పతనం
మరోవైపు హిండెన్బర్గ్ ఇచ్చిన నివేదికతో అదానీ గ్రూప్ మార్కెట్ విలువ భారీగా నష్టపోయింది. షేర్ మార్కెట్లో సంస్థ విలువ సగానికి పైగా పతనమైంది. జాతీయ స్టాక్ ఎక్స్చేంజీని గత ఏడు సెషన్లలో పరిశీలిస్తే.. అదానీ ఎంటర్ప్రైజైస్ షేరు విలువ సుమారు 54 శాతం నష్టపోయింది.
నష్టాల్లో ముగిసిన మార్కెట్లు
మెటల్, విద్యుత్ రంగ షేర్ల అమ్మకాలకు మదుపరులు మొగ్గు చూపడం.. అంతర్జాతీయ మార్కెట్లలోని ప్రతికూల సంకేతాల నేపథ్యంలో దేశీయ స్టాక్ మార్కెట్ సూచీలు సోమవారం నష్టాల్లో ముగిశాయి. ఒకానొక దశలో 60,345 పాయింట్ల కనిష్ఠానికి చేరుకున్న బొంబాయి స్టాక్ ఎక్స్చేంజీ సూచీ సెన్సెక్స్.. అనంతరం 330 పాయింట్లు నష్టపోయి 60,500 వద్ద ఉంది. జాతీయ స్టాక్ ఎక్స్చేంజీ సూచీ నిఫ్టీ 90 పాయింట్లకు పైగా నష్టపోయి 17,800 దిగువకు చేరుకుంది. సెన్సెక్స్ 30 సూచీలో ఇండస్ఇండ్ బ్యాంక్, బజాబ్ ఫినాన్స్, పవర్ గ్రిడ్, ఐటీసీ, ఎన్టీపీసీ, బజాజ్ ఫిన్సర్వ్ షేర్లు లాభాల్లో ఉన్నాయి. యాక్సిస్ బ్యాంక్, హెచ్సీఎల్ టెక్, ఏషియన్ పెయింట్స్, సన్ ఫార్మా షేర్లు నష్టాల్లో ఉన్నాయి.
ఇవీ చదవండి: డెల్ ఉద్యోగులకు షాక్.. 6,650 మందికి లేఆఫ్.. ఇన్ఫోసిస్లోనూ..
'అదానీ షేర్ల పతనం కంపెనీ సమస్య.. దేశ ప్రతిష్ఠతో సంబంధం లేదు'
