రిజర్వు బ్యాంకు కీలక వడ్డీ రేట్లను యథాతథంగా ఉంచినా... భవిష్యత్లో తగ్గిస్తుందన్న అంచనాలు స్టాక్ మార్కెట్లపై సానుకూల ప్రభావం చూపాయి. ఫలితంగా సూచీలు వరుసగా నాలుగో రోజు లాభాల్లో దూసుకెళ్లాయి.
బొంబాయి స్టాక్ ఎక్స్చేంజి సూచీ-సెన్సెక్స్ 163 పాయింట్లు పెరిగి 41 వేల 306 వద్ద ముగిసింది. జాతీయ స్టాక్ ఎక్స్చేంజి సూచీ-నిఫ్టీ 45 పాయింట్ల వృద్ధితో 12 వేల 134 వద్ద స్థిరపడింది.
"ఆర్బీఐ ప్రకటన ఊహించినదే. ద్రవ్యోల్బణం బాగా పెరిగింది. ఈ పరిస్థితుల్లో వడ్డీ రేట్లను సమీక్షించేందుకు మరింత సమయం పడుతుంది. ఆర్థిక వ్యవస్థకు ఊతమిచ్చేందుకు ఆర్బీఐ 'అకోమొడేటివ్ స్టాన్స్'ను కొనసాగించింది. అంటే ద్రవ్యోల్బం అదుపులోకి వచ్చాక వడ్డీ రేట్లు తగ్గించే అవకాశం ఉంది. ఇది నేటి లాభాలకు ప్రధాన కారణం."
-దీప్తి మేరీ మాథ్యూ, ఆర్థికవేత్త-జియోజిత్ ఫైనాన్షియల్ సర్వీసెస్
ఇంట్రాడే సాగిందిలా...
ఉదయం 41 వేల 209 వద్ద ప్రారంభమైన సెన్సెక్స్... మొదట్లో హెచ్చుతగ్గులకు గురైంది. 41 వేల 113 పాయింట్ల కనిష్ఠస్థాయికి పతనమైంది. ఆర్బీఐ ప్రకటన తర్వాత పుంజుకుని 41 వేల 405 పాయింట్ల గరిష్ఠస్థాయికి చేరింది.
నిఫ్టీ 12 వేల 120 వద్ద ప్రారంభమైంది. 12 వేల 85 పాయింట్ల కనిష్ఠస్థాయి, 12 వేల 160 పాయింట్ల గరిష్ఠస్థాయిని నమోదుచేసింది.
లాభనష్టాల్లో...
ఇండస్ఇండ్ బ్యాంక్ అత్యధికంగా 4శాతానికిపైగా వృద్ధిచెందింది. ఎస్బీఐ, బజాజ్ ఫైనాన్స్, భారతీ ఎయిర్టెల్, యాక్సిస్ బ్యాంక్, సన్ ఫార్మా, హెచ్డీఎఫ్సీ, పవర్గ్రిడ్ లాభాల్లో ముగిశాయి.
టైటాన్, ఇన్ఫోసిస్, ఐటీసీ, కోటక్ బ్యాంక్, ఏషియన్ పెయింట్స్ నష్టపోయాయి.
అంతర్జాతీయ మార్కెట్లు...
ఆసియా మార్కెట్లు దాదాపు 2.88శాతం లాభపడ్డాయి. ఐరోపా మార్కెట్లు సానుకూలంగా ప్రారంభమయ్యాయి.
