Stock Market Today: దేశీయ స్టాక్ మార్కెట్లు సోమవారం భారీ నష్టాలతో ముగిశాయి. అంతర్జాతీయ మార్కెట్‌లో మరోసారి చమురు ధరలు పెరుగుతుండడం మదుపర్లను కలవరపెడుతోంది. గతవారం 99 డాలర్ల వద్ద ఉన్న బ్యారెల్‌ చమురు ధర ఇప్పుడు 110 డాలర్లకు చేరింది. దీంతో పాటు స్వల్పకాలంలో రష్యా-ఉక్రెయిన్‌ యుద్ధ పరిణామాలు, పలు దేశాల్లో కొవిడ్‌ కొత్త వేరియంట్‌ వ్యాప్తి, లాక్‌డౌన్‌ల విధింపు వంటి అంశాలు మార్కెట్లను ప్రభావితం చేశాయి. దీంతో దేశీయ స్టాక్ మార్కెట్ నష్టాలను ఎదుర్కోవాల్సి వచ్చింది.
- బీఎస్ఈ సెన్సెక్స్ 571 నష్టంతో 57,292 వద్ద ముగిసింది.
58,030 వద్ద ప్రారంభమై స్వల్ప లాభాలు నమోదు చేసిన సెన్సెక్స్ ఆ తర్వాత ఒడుదొడుకులకు లోనైంది. ఒక దశలో 58, 127 గరిష్ఠానికి తాకిన సెన్సెక్స్ ఆ తర్వాత 57,229 కనిష్ఠానికి చేరింది.
- జాతీయ స్టాక్ ఎక్స్ఛేంజి సూచీ నిఫ్టీ 169 పాయింట్ల నష్టంతో 17,117 వద్ద స్థిరపడింది.
నిఫ్టీ.. 17,329 పాయింట్ల వద్ద ప్రారంభమవగా.. 17,353 పాయింట్ల గరిష్ఠాన్ని తాకి.. మళ్లీ డీలా పడిపోయింది. నిఫ్టీ.. ఓ దశలో కనిష్ఠంగా 17,096 పాయింట్లకు చేరింది.
బ్యాంకింగ్, క్యాపిటల్ గూడ్స్, ఎఫ్ఎంసీజీ, చమురు, విద్యుత్ రంగాల షేర్లు నష్టాల బాట పట్టడం మార్కెట్పై ప్రభావం చూపించింది. మరోవైపు ఫార్మా, స్టీల్ రంగాల షేర్లు కొనుగోలు చేసేందుకు మదుపర్లు ఆసక్తి చూపారు.
లాభనష్టాల్లోనివి...
కోల్ఇండియా, హిందాల్కో, యూపీఎల్, ఓఎన్జీసీ, హెచ్డీఎఫ్సీ బ్యాంక్ షేర్లు లాభాలు నమోదు చేశాయి.
బ్రిటానియా, గ్రాసిమ్, పవర్గ్రిడ్, ఎస్బీఐ లైఫ్, టాటా కంజ్యూమర్ షేర్లు నష్టాలు చవిచూశాయి.
ఇదీ చూడండి : క్లోవియాలో 89శాతం వాటాను కొనుగోలు చేసిన రిలయన్స్‌ రిటైల్‌
