Multibagger stocks: కరోనా సంక్షోభం కారణంగా గత ఏడాది తీవ్రంగా పతనమైన స్టాక్ మార్కెట్లు ఈ సంవత్సరం భారీగా పుంజుకొన్నాయి. కొన్ని కంపెనీలు మదుపర్లకు మంచి లాభాల్ని తెచ్చి పెట్టాయి. గత ఆరు నెలల్లో అనేక కంపెనీలు మల్టీబ్యాగర్‌ స్టాక్స్(అనేక రెట్లు రాబడినిచ్చే స్టాక్స్)గా మారాయి. అందులో ఒకటి రఘువీర్ సింథటిక్స్. ఈ టెక్స్‌టైల్‌ కంపెనీ షేరు విలువ గత ఆరు నెలల్లో రూ.20 నుంచి రూ.600కు పెరిగింది. అంటే దాదాపు 30 రెట్ల రిటర్న్స్‌ ఇచ్చింది.
గతవారం రోజుల్లో ఈ స్టాక్ రూ.494 నుంచి రూ.600కు ఎగబాకింది. అంటే 21.5 శాతం రిటర్న్స్‌ ఇచ్చింది. పైగా ఈ వారంలో ప్రతి ట్రేడింగ్‌ సెషన్‌లో 5శాతం అప్పర్‌ సర్క్యూట్‌ను తాకింది. ఇక గత నెల వ్యవధిలో ఈ స్టాక్ విలువ రూ.216 నుంచి రూ.600కు పెరిగింది. అంటే 175 శాతం లాభాన్నిచ్చింది. అలాగే గత ఆరు నెలల వ్యవధిలో రూ.20 నుంచి రూ.600కు పెరిగి 2900 శాతం రాబడినిచ్చింది.
ఈ లెక్కన వారం క్రితం ఈ కంపెనీలో రూ.లక్ష పెట్టుబడిగా పెట్టి ఉంటే.. అది రూ.1.21లక్షలకు పెరిగి ఉండేది. ఒకవేళ నెల క్రితం ఇదే మొత్తంతో ఈ కంపెనీ స్టాక్స్ కొని ఉంటే అది ఇప్పటికి రూ.2.75 లక్షలకు ఎగబాకేది. అదే ఆరు నెలల క్రితం రూ.లక్ష విలువ చేసే రఘువీర్ సింథటిక్స్ షేర్లు కొని ఉంటే.. ఇప్పటికి రూ.30 లక్షలు ఆర్జించి ఉండేవారు.
ఇదే సమయంలో నిఫ్టీ 50 సూచీ 11 శాతం రిటర్న్స్‌ ఇచ్చింది. సెన్సెక్స్‌ 12 శాతం ఎగబాకింది. ఈ నేపథ్యంలో రఘువీర్ టెక్స్‌టైల్‌ ఈ ఏడాది ఆల్ఫా స్టాక్‌గా నిలిచింది. ఎన్‌ఎస్‌ఈ, బీఎస్‌ఈ కంటే కూడా అధిక రాబడినిచ్చి మదుపర్లను లాభాల్లో ముంచెత్తింది.
(గమనిక: స్టాక్ మార్కెట్లో పెట్టుబడి పూర్తిగా నష్టభయంతో కూడుకున్న అంశం. మల్టీబ్యాగర్‌ స్టాక్స్‌ని గుర్తించడానికి చాలా నైపుణ్యం కావాలి. పై సమాచారం కేవలం అవగాహన కోసం మాత్రమే)
ఇదీ చూడండి: అప్పు చేసి మదుపు చేస్తే.. మొదటికే మోసం!
