స్టాక్ మార్కెట్లను ఈ వారం స్థూల ఆర్థిక గణాంకాలు, కొవిడ్ వ్యాక్సినేషన్ అప్డేట్స్, అంతర్జాతీయ పరిణామాలు ముందుకు నడిపించనున్నాయంటున్నారు విశ్లేషకులు. రుతుపవనాల వార్తలు కూడా మార్కెట్లను ప్రభావితం చేయొచ్చని చెబుతున్నారు. ఈ వారంలోనే జూన్ నెలకు సంబంధించి వాహన విక్రయాల గణాంకాలు, తయారీ రంగ పీఎంఐ డేటా విడుదల కానున్నాయి. ఈ గణాంకాల ప్రభావం మార్కెట్లపై కీలకంగా ఉండనున్నట్లు విశ్లేషకులు అభిప్రాయపడుతున్నారు.
'వ్యాక్సినేషన్ సానుకూలతలు సహా మరిన్ని రాష్ట్రాల్లో సడలింపులు ఇచ్చేందుకు దోహదం చేయొచ్చు. అయితే పెరుగుతున్న కొత్త వేరియంట్ కేసులు ఇందుకు సవాలుగా మారొచ్చు.' అని రెలిగేర్ బ్రోకింగ్ పరిశోధనా విభాగం ఉపాధ్యక్షుడు అజిత్ మిశ్రా పేర్కొన్నారు.
ఈ వారం మధ్యలో విడుదల కానున్న వాహన విక్రయాల గణాంకాలపై మదుపరుల సెంటిమెంట్ ఆధారపడి ఉంటుందని మార్కెట్ బ్రోకర్లు చెబుతున్నారు. వాహన సహా పలు ఇతర రంగాలకు ఇది కీలకమైన అంశమని చెబుతున్నారు. మదుపరులు రోజువారీ కరోనా కేసులు, వ్యాక్సినేషన్, రుతుపవనాల అప్డేట్స్పై దృష్టి సారించే వీలుందని అంటున్నారు.
వీటన్నింటితో పాటు ముడి చమురు ధరలు, రూపాయి మారకం విలువలో హెచ్చుతగ్గులు కూడా మార్కెట్లను ప్రభావితం చేసే సాధారణ అంశాలుగా ఉండనున్నాయి.
లిస్టింగ్కు కొత్త కంపెనీలు..
హైదరాబాద్ కేంద్రంగా పని చేస్తున్న క్రిష్ణ ఇన్స్స్టిట్యూట్ ఆఫ్ మెడికల్ సైన్సెస్ లిమిటెడ్ (కిమ్స్), దొడ్ల డెయిరీ సంస్థలు బీఎస్ఈ, ఎన్ఎస్ఈల్లో సోమవారమే లిస్టింగ్కు రానున్నాయి. ఈ నెల 16-18 మధ్యే ఇరు సంస్థలు ఐపీఓకు వచ్చాయి.
ఇదీ చదవండి:అదనపు డీఏ చెల్లింపులపై ప్రభుత్వం క్లారిటీ
