కరోనా వల్ల సరఫరా వ్యవస్థకు ఇప్పటికే తీవ్ర అంతరాయం ఏర్పడగా.. ఈజిప్టులోని సూయిజ్ కాలువలో భారీ వాణిజ్య నౌక చిక్కుకున్న కారణంగా ప్రపంచ వాణిజ్యంపై మరింత ఒత్తిడి పెరుగుతోంది.
సూయిజ్ కాలువలో అడ్డంగా ఇరక్కుపోయిన 'ఎవర్ గివెన్' నౌకను నీటిపై తేలియాడేలా చేసేందుకు.. టగ్‌బోట్లు, ఇతర సహాయక బృందాలు ఎంత ప్రయత్నిస్తున్నా.. పరిస్థితులు మళ్లీ ఎప్పుడు సాధారణ స్థితికి చేరుతాయో తెలియని పరిస్థితి.
గతంలో జపాన్కు చెందిన ఓ వాణిజ్య నౌక కూడా ఇలానే కొన్ని వారాల పాటు ఇరుక్కుపోయి సరఫరాకు తీవ్ర అంతరాయం ఏర్పడింది.
ప్రభావం కొన్ని వారాలే కానీ..
ఎవర్ గివెన్ నౌక ఇరుక్కుపోవడం వల్ల ఏర్పడిన అంతరాయం ప్రపంచ వాణిజ్యంపై కొన్ని వారాలకన్నా ఎక్కువగా ఉండకపోవచ్చని చెబుతున్నారు నిపుణులు. ఇది ప్రపంచార్థికాన్ని కూడా అంతగా ప్రభావితం చేయకపోవచ్చని అంటున్నారు. ఈ ఏడాది పెద్ద సంఖ్యలో ప్రజలు కరోనా టీకా వేయించుకోనుండటం, ఆర్థిక కార్యకలాపాలు పూర్తిగా ప్రారంభమవుతుండటం ఇందుకు కారణంగా వివరిస్తున్నారు.
అయితే కంపెనీలు సప్లయి చైన్పై మాత్రమే అధారపడితే ఇబ్బంది తప్పదనే విషయాన్ని ఈ పరిస్థితులు మరోసారి స్పష్టం చేస్తున్నాయని మిల్కెన్ ఇన్స్టిట్యూట్ ముఖ్య ఆర్థికవేత్త విలియం లీ పేర్కొన్నారు. ఫ్యాక్టరీల అడ్డాగా ఉన్న చైనాలో.. కరోనా విజృంభణ వల్ల గత ఏడాది ప్రపంచవ్యాప్తంగా చాలా దేశాలు తీవ్ర ఇబ్బందులు ఎదుర్కొన్నాయని గుర్తు చేశారాయన. సప్లయి చైన్ అంతరాయం వల్ల వివిధ అసెంబ్లీ యూనిట్ల మూసివేతకు కూడా దారితీయొచ్చని అభిప్రాయపడ్డారు.
చాలా ఓడలు ఇప్పటికే సూయిజ్ కాలువకు ప్రత్యామ్నాయ మర్గాలు వెతుక్కుంటున్నాయని విశ్లేషకులు చెబుతున్నారు. అయితే ఈ ప్రత్యామ్నాయాల వల్ల కంటైనర్లు గమ్యస్థానాలకు చేరడం, అక్కడి నుంచి మళ్లీ ఇతర ప్రాంతాలకు సరకు రవాణా చేయడంకోసం చాలా సమయం పడుతుందని.. దీనితో పాటు ఖర్చులు కూడా పెరుగుతాయని అంటున్నారు. ఫలితంగా ఆ ప్రభావం తుది వినియోగదారుడిపైనా పడుతుందని విశ్లేషిస్తున్నారు. దీని వల్ల కంటైనర్ల కొరత కూడా ఏర్పడుతుందని విశ్లేషిస్తున్నారు.
ప్రపంచవ్యాప్తంగా మొత్తం వాణిజ్యంలో ప్రస్తుతం 12 శాతం సూయిజ్ కాలువ ద్వారానే జరుగుతోంది. షిప్పింగ్ కంటైనర్ల విషయంలో 30 శాతం దీనికే వినియోగమవుతున్నాయి. ఓ అంచనా ప్రకారం.. గత ఏడాది 19000 వేల ఓడలు సూయిజ్ గుండా వాణిజ్య కార్యకలాపాలు నిర్వహించాయని తెలిసింది.
వీటిపై భారం..
సూయిజ్ కాలువలోని ఈ అంతరాయం వల్ల అంతర్జాతీయంగా దాదాపు 10 శాతం ముడి చమురు షిప్మెంట్స్, 8 శాతం లిక్విడ్ నాచురల్ గ్యాస్ సరఫరాకు ఆటంకం ఏర్పడొచ్చని అని అమెరికా ఎనర్జీ ఇన్ఫర్మేషన్ అడ్మినిస్ట్రేషన్ పేర్కొంది. పశ్చిమాసియా నుంచి ఐరోపా, అమెరికాకు.. రష్యా నుంచి ఆసియా దేశాలకు ముడి చమురు రవాణాలో ఇది చాలా కీలకమైన మార్గంగా ఉందని వెల్లడించింది.
ఐరోపాతో పోలిస్తే.. ఉత్తర, లాటిన్ అమెరికాల్లో ఈ ప్రభావం కాస్త తక్కువగా ఉంటుందని నిపుణులు చెబుతున్నారు. అమెరికా, ఆసియా మధ్య వాణిజ్య ఓడలు ఎక్కువగా పసిఫిక్ మహా సముద్రం మీదుగా ప్రయాణించడం ఇందుకు కారణంగా చెబుతున్నారు.
ఇదీ చదవండి:పెట్రోల్ రేట్లు తగ్గుదలకు అడ్డుపడిన 'రాకాసి ఓడ'!
