'విద్య, మహిళా భద్రతకు నిధులు పెంచండి'

బడ్జెట్​ ముందస్తు చర్చల్లో భాగంగా సామాజిక రంగ నిపుణులతో భేటీ అయ్యారు కేంద్ర ఆర్థిక మంత్రి నిర్మలా సీతారామన్​. విద్యా, మహిళల భద్రత, పరిశుభ్రత, శిశు పోషణ అంశాలకు బడ్జెట్​లో పెద్దమొత్తంలో నిధులు కేటాయించాలని నిపుణులు సూచించారు. విద్యారంగంలో సమూల మార్పులు చేసేందుకు చర్యలు చేపడుతున్నట్లు విత్తమంత్రి తెలిపారు.

2019-20 ఆర్థిక సంవత్సరానికి ప్రవేశపెట్టనున్న బడ్జెట్​ తయారీపై కసరత్తు ముమ్మరం చేశారు కేంద్ర ఆర్థిక మంత్రి నిర్మలా సీతారామన్​. నేడు సామాజిక రంగ నిపుణులతో భేటీ అయ్యారు. చర్చల్లో భాగంగా విద్యా, మహిళల భద్రత, పరిశుభ్రత, శిశు పోషణకు బడ్జెట్​లో భారీగా నిధులు కేటాయించాలని పలువురు సూచించారు.

ఆరోగ్య సదుపాయాల కల్పన, ఉచిత మందులు, వైద్య పరీక్షల సదుపాయాలకు నిబంధనలపై పలు సూచనలు చేశారు. వైద్య పరికరాలపై పన్నుల హేతుబద్ధీకరణ, ఆరోగ్య రంగంలో ప్రభుత్వ-ప్రైవేటు భాగస్వామ్యాభివృద్ధి, వృథా నీటి పునర్వినియోగానికి ప్రోత్సాహకాలు వంటివి అందులో ఉన్నాయి.

విద్యా ప్రమాణాల పెంపు, యువతలో నైపుణ్యాభివృద్ధి, ఉద్యోగ కల్పన, వైద్య ఖర్చుల తగ్గింపు, మహిళా సాధికారత, మానవాభివృద్ధి వంటి అంశాలపై ప్రభుత్వం కట్టుబడి ఉందని భరోసా ఇచ్చారు సీతారామన్​.

ప్రధానంగా ఆరోగ్యం, విద్యా, సామాజిక భద్రత, పింఛన్​, మానవాభివృద్ధి వంటి అంశాలపై చర్చ జరిగింది.

జాతీయ మహిళా కమిషన్​ ఛైర్​పర్సన్​​ రేఖా శర్మ, విధాన పరిశోధన కేంద్రం అధ్యక్షురాలు యామిని అయ్యర్​, హెల్పేజ్​ ఇండియా ముఖ్య కార్యనిర్వహణ అధికారి రోహిత్​ ప్రసాద్​, జాతీయ బాలల హక్కుల కమిషన్​ ఛైర్​పర్సన్​ ప్రియాంక కనూంగో హాజరయ్యారు.

ఇదీ చూడండి: నష్టాలు మిగిల్చిన 'చమురు' భయాలు