ద్రవ్య పరపతి విధాన కమిటీ (ఎంపీసీ)లో ప్రభుత్వం ముగ్గురు నూతన స్వతంత్ర సభ్యులను నియమించిన తర్వాత.. భారతీయ రిజర్వు బ్యాంక్(ఆర్బీఐ) సమీక్ష బుధవారం ప్రారంభమైంది. మూడు రోజుల భేటీ అనంతరం అక్టోబర్ 9న ఎంపీసీ సమీక్ష నిర్ణయాలు వెల్లడించనుంది ఆర్బీఐ.
ఈ సారి సమీక్షపై అంచనాలు..
రిటైల్ ద్రవ్యోల్బణం పెరుగుతున్న నేపథ్యంలో.. ఈ సారి రెపో రేటును యథాతథంగా ఉంచేందుకు ఎంపీసీ నిర్ణయం తీసుకోవచ్చని నిపుణులు భావిస్తున్నారు. ప్రభుత్వం, ఆర్బీఐ పెట్టుకున్న అంచనాలకు మించి రిటైల్ ద్రవ్యోల్బణం నమోదైన కారణంగా ఆగస్టు సమీక్షలోనూ కీలక వడ్డీ రేట్లను యథాతథంగా ఉంచుతూ ఎంపీసీ నిర్ణయం తీసుకోవడం గమనార్హం.
ప్రస్తుత వడ్డీ రేట్లు..
ఆర్బీఐ రెపో రేటు ప్రస్తుతం అత్యల్పంగా 4 శాతం వద్ద, రివర్స్ రెపో రేటు 3.35 శాతం వద్ద ఉన్నాయి. ఈ ఏడాది ఫిబ్రవరి నుంచి ఆగస్టు ముందు సమీక్ష వరకు 115 బేసిస్ పాయింట్ల రెపో తగ్గించింది ఆర్బీఐ. అయితే ఆగస్టులో రిటైల్ ద్రవ్యోల్బణం 6.69 శాతంగా నమోదైన కారణంగా.. కీలక వడ్డీ రేట్లలో ఈ సారీ ఎలాంటి మార్పు ఉండకపోవచ్చని ఆర్థిక నిపుణులు చెబుతున్నారు.
ఇదీ చూడండి:రోడ్డు పక్క చిరుతిళ్లు ఇకపై డోర్ డెలివరీ!
