న్యూ డెవలప్మెంట్ బ్యాంక్(ఎన్డీబీ) ప్రపంచ స్థాయి సంస్థగా ఎదగాల్సిన అవసరం ఉందని కేంద్ర ఆర్థికమంత్రి నిర్మలా సీతారామన్ ఉద్ఘాటించారు. బ్రిక్స్ విలువలను పరిరక్షిస్తునే అభివృద్ధి చెందాలని ఆకాంక్షించారు. ఎన్డీబీ బోర్డు గవర్నర్లతో వీడియో కాన్ఫరెన్స్ ద్వారా జరిగిన ప్రత్యేక సమావేశంలో ఈ మేరకు వ్యాఖ్యానించారు నిర్మలా. ఇందులో బ్యాంక్ ఉపాధ్యక్షుడు, చీఫ్ రిస్క్ అఫీసర్గా అనిల్ కిషోరాను నియమించేందుకు ఆమోదం లభించింది.
ఈ సమావేశంలో న్యూ డెవలప్మెంట్ బ్యాంక్కు అధ్యక్షుడిగా సేవలందిస్తున్న భారతీయ బ్యాంకర్ కె.వి. కామత్పైనా నిర్మలా ప్రశంసల వర్షం కురిపించారు. 2014లో బ్రిక్స్ నేతలు నిర్దేశించిన స్థాయికి ఎన్డీబీను అతి త్వరగా తీసుకెళ్లారని కొనియాడారు. కరోనా సంక్షోభం నేపథ్యంలో వేగంగా స్పందించి.. కోవిడ్-19 అత్యవసర రుణ సదుపాయాన్ని ప్రారంభించడం ఆయన సేవల్లో గుర్తుండిపోయే కార్యక్రమమని సీతారామన్ చెప్పుకొచ్చారు.
త్వరలోనే ఐదేళ్ల పదవీ కాలం ముగించుకుని ఎన్డీబీ అధ్యక్ష బాధ్యతల నుంచి తప్పుకోనున్నారు కామత్. 2015లో ఆయన ఎన్డీబీ అధ్యక్షుడిగా బాధ్యతలు స్వీకరించారు. కామత్ అనంతరం బ్రెజిల్కు చెందిన మార్కోస్ ట్రోయ్జో ఆ పగ్గాలు చేపట్టనున్నారు.
ఇదీ చూడండి:దేశంలో నిరుద్యోగ రేటు 24.3 శాతం!
