ప్రభుత్వం జీడీపీ వృద్ధి రేటును ముందుకు నెట్టాలంటే డిమాండ్‌ను పెంచాల్సిందే. ఈ నేపథ్యంలో ఆదాయపు పన్ను మినహాయింపుపై మధ్యతరగతి జీవి ఎన్నో ఆశలు పెట్టుకొన్నాడు. కానీ, పన్ను ఆదాయం తగ్గిన సమయంలో మళ్లీ ఆదాయపు పన్ను ఉపశమనం ప్రకటిస్తుందా అనే అంశంపై సందిగ్ధం నెలకొంది. ఇప్పటికే కార్పొరేట్‌ పన్ను తగ్గించడం కారణంగా భారీగా ఆదాయాన్ని కోల్పోయింది. ఈ నేపథ్యంలో మరోసారి పన్ను ఉపశమనం ప్రకటించడం సాహసమే అవుతుంది. ప్రభుత్వం ఈ సాహసం చేయడానికి ఉన్న అవకాశాలను పరిశీలిద్దాం.
- ప్రభుత్వం ఆదాయపు పన్ను శ్లాబుల్లో మార్పులు చేయవచ్చు. చట్టంలోని 80సీ పరిధిని పెంచవచ్చు.
- గృహరుణాల వడ్డీపై మినహాయింపును పెంచే అవకాశాలు దండిగా ఉన్నాయి. ఇది రెండువైపులా ప్రయోజనాలు ఉన్న నిర్ణయంగా నిలుస్తుంది. ఇది కొనుగోళ్లను పెంచి గృహ నిర్మాణ రంగంలో, రియల్‌ ఎస్టేట్‌ రంగానికి మంచి ప్రోత్సాహాన్ని ఇచ్చే అవకాశం ఉంది. దీంతోపాటు ప్రజల వద్ద నగదు మిగులు కూడా పెరుగుతుంది.
- ఆదాయపు పన్ను మినహాయింపుల పెంపుతో ఏర్పడ్డ లోటును ప్రభుత్వం పరోక్ష పన్నుల పెంపుతో తీర్చుకోవచ్చు. జీఎస్టీ శ్లాబుల్లో స్వల్ప మార్పులతో దీనిని పూరించుకొనే అవకాశం ఉంది. ప్రభుత్వం ఇచ్చే మినహాయింపుల మొత్తం జీఎస్టీ రూపంలో వెనక్కి వస్తుంది.
ఆదాయం లక్ష్యాలు గాడితప్పాయి..
ప్రభుత్వ ఆదాయ పన్ను ఉపశమనాలు పెద్దగా కల్పించకపోవచ్చు అన్న వాదన కూడా బలంగానే ఉంది. ఇప్పటికే ప్రభుత్వం ప్రస్తుత ఆర్థిక సంవత్సరంలో రూ.6.6లక్షల కోట్లను ఆదాయపన్ను రూపంలో, రూ.13.35లక్షల కోట్లను జీఎస్టీ రూపంలో వసూలు చేయాలని లక్ష్యంగా పెట్టుకుంది. కానీ, రెవెన్యూ లక్ష్యాలు రెండూ గాడితప్పాయి.
మరోపక్క కార్పొరేట్‌ పన్నురేట్లను తగ్గించి 15శాతం, 22శాతంగా నిర్ణయించాయి. దీంతో రూ.1.45లక్షల కోట్ల ఆదాయానికి గండిపడింది. ఈ నేపథ్యంలో ఆర్థిక మంత్రి మరోసారి ప్రభుత్వ ఆదాయంలో కోత విధించడానికి సిద్ధపడకపోవచ్చనే అభిప్రాయాలు వినిపిస్తున్నాయి.
