భారత ఆర్థిక వృద్ధిరేటు ఈ ఏడాది ఏకంగా 12 శాతంగా నమోదవుతుందని ప్రముఖ రేటింగ్ ఏజెన్సీ మూడీస్ అంచనా వేసింది. రానున్న రోజుల్లో పరిస్థితులు భారత్కు మరింత మారనుండటమే ఇందుకు కారణంగా పేర్కొంది. అయితే 2020 వృద్ధి రేటు మాత్రం -7.1 శాతంగా ఉంటుందని వెల్లడించింది.
కరోనా సంక్షోభం నుంచి భారత ఆర్థిక వ్యవస్థ ఆశించినదానికన్నా వేగంగా కోలుకుంటున్నట్లు మూడీస్ వివరించింది. 2020 ఆక్టోబర్-డిసెంబర్లో వృద్ధి రేటు అంతకుముందు త్రైమాసికంతో పోలిస్తే ఏకంగా -7.5 శాతం నుంచి 0.4 శాతానికి పెరగటం ఇందుకు ఉదాహరణగా పేర్కొంది.
అన్లాక్ తర్వాత దేశంలో డిమాండ్ పుంజుకుంటోందని ఫలితంగా.. ఇటీవలి నెలల్లో తయారీ రంగం వృద్ధిని నమోదు చేసినట్లు మూడీస్ తెలిపింది.
ఆర్బీఐ ద్రవ్యపరపతి నిర్ణయాలు, కేంద్ర ఆర్థిక విధానాలు వృద్ధి రేటుకు కీలకంగా మారనున్నట్లు మూడీస్ వివరించింది. అయితే కీలక వడ్డీ రేట్లలో ఈ ఏడాది తగ్గింపు ఉండకపోవచ్చని అంచనా వేసింది.
ఇదీ చదవండి:ఈ టిప్స్ ఫాలో అయితే మీ మొబైల్ డేటా ఆదా!
