ఆర్థిక మందగమనం నేపథ్యంలో భారత్.. కొన్ని ప్రాథమిక అంశాల పరిష్కరానికి కృషి చేసిందని అంతర్జాతీయ ద్రవ్యనిధి సంస్థ (ఐఎంఎఫ్) పేర్కొంది. అయినప్పటికీ భారత్ ముందు ఇంకా అనేక సవాళ్లు ఉన్నాయని వెల్లడించింది. ఐఎంఎఫ్ ఇటీవలే భారత వృద్ధి అంచనాను 90 బేసిస్ పాయింట్లు తగ్గించి.. 6.1 శాతానికే పరిమితం చేయడం గమనార్హం.
పరిష్కారం లభించని వాటిలో ముఖ్యంగా బ్యాంకింగేతర ఆర్థిక రంగాలు ఉన్నట్లు ఐఎంఎఫ్ తెలిపింది. అయితే భారత్ తీసుకున్న బ్యాంకుల విలీనం వంటి నిర్ణయాలతో ఈ సమస్యలు పరిష్కారమయ్యే అవకాశముందని ఐఎంఎఫ్ మేనేజింగ్ డైరెక్టర్ క్రిస్టలినా జార్జియెవా అన్నారు. ప్రస్తుతం వృద్ధికి ఊతమందించే ధీర్ఘకాలిక అంశాలపై భారత్ దృష్టి సారించాలని పేర్కొన్నారు. మానవ వనరులపై పెట్టుబడులు ఎంతో అవసరమన్నారు.
ప్రతిభ గల మహిళలు ఇంట్లోనే ఉంటున్నారు...
శ్రామిక రంగాల్లోకి మహిళలను తీసుకురావాలని క్రిస్టలినా సూచించారు. భారత్లో ప్రతిభ గల మహిళలు ఎంతో మంది ఉన్నా.. వారు ఇళ్లకే పరిమితమవుతున్నారని విచారం వ్యక్తం చేశారు.
గత కొన్నేళ్లుగా భారత్ వృద్ధి గణనీయంగా ఉందని.. భవిష్యత్లోనూ వృద్ధి కొనసాగుతుందని అశిస్తున్నట్లు క్రిస్టలినా పేర్కొన్నారు. వృద్ధి కొనసాగించేందుకు నిర్మాణాత్మక సంస్కరణలు అవసరమని.. భవిష్యత్లో భారత్ వాటిని పాటిస్తుందని ఐఎంఎఫ్ ఆశాభావం వ్యక్తం చేసింది.
ఇదీ చూడండి: రిలయన్స్ రికార్డ్... రూ.9 లక్షల కోట్లకు ఎం-క్యాప్
