భారత్... 2030లో 5.8 శాతం ఉత్పాదకతను నష్టపోతుందని ఓ సర్వే అంచనా వేసింది. ఐరాస పరిధిలోని అంతర్జాతీయ కార్మిక సంస్థ-ఐఎల్ఓ చేసిన ఈ సర్వేలో మరికొన్ని ఆసక్తికర అంశాలు వెల్లడయ్యాయి.
భారత్ కోల్పోయే ఉత్పాదకత... దాదాపు 3 కోట్ల 40 లక్షల ఉద్యోగాలకు సమానమని పేర్కొంది సర్వే. ఇదే సమయంలో ప్రపంచవ్యాప్తంగా 2.2 శాతం ఉత్పాదకత తగ్గొచ్చని.. ఇది 8 కోట్ల ఉద్యోగుల శ్రమతో సమానమని లెక్కగట్టింది ఐఎల్ఓ.
ఇదీ కారణం...
ఉత్పాదకత కోల్పోవడానికి భూతాపమే ప్రధాన కారణమని తెలిపింది అంతర్జాతీయ కార్మిక సంస్థ. 21వ శతాబ్దం ముగిసే నాటికి 1.5 డిగ్రీ సెల్సియస్ ఉష్ణోగ్రత పెరగవచ్చన్న అంచనాలను పరిగణనలోకి తీసుకుని ఈ నివేదిక రూపొందించింది.
కార్మికులు సాధారణ వాతావరణంలో పనిచేసేందుకు ఇష్టపడతారని, పెరుగుతున్న వేడి కారణంగా పని చేసే వేళలు తగ్గుతాయని ఐఎల్ఓ వివరించింది. ఉత్పాదకత తగ్గడం వల్ల ప్రపంచవ్యాప్తంగా 2030 నాటికి 2,400 బిలియన్ డాలర్ల నష్టం వాటిల్లుతుందని లెక్కగట్టింది.
వేడి కారణంగా భారత్ 1995లో 4.3 శాతం ఉత్పాదకత నష్టపోగా.. 2030లో 5.8 శాతం ఉత్పాదకత కోల్పోయే ప్రమాదం ఉందని తెలిపింది.
భూతాపాన్ని తగ్గించడానికి చర్యలు తీసుకోకపోతే పరిస్థితి మరింత దారుణంగా తయారవుతుందని ప్రపంచ దేశాలను హెచ్చరించింది ఐఎల్ఓ.
ఇదీ చూడండి: బఫెట్ ఔదార్యం... 360 కోట్ల డాలర్ల విరాళం
