భారత్-చైనా సరిహద్దుల వెంబడి నెలకొన్న ఉద్రిక్త పరిస్థితుల ప్రభావం ఇరు దేశాల వాణిజ్య ద్వైపాక్షిక సంబంధాలపై తక్షణమే ఉండకపోవచ్చని విశ్లేషకులు అభిప్రాయపడుతున్నారు. ఉద్రిక్తతలు మరింత పెరిగితే మాత్రం ఆ ప్రభావం కచ్చితంగా ఉంటుందని అంటున్నారు. వాణిజ్య పరంగా పరస్పర అవసరం ఎంతైనా ఉందని చెబుతున్నారు.
అలా చేస్తే ఎగుమతులపైనా ప్రభావం..
'భారత ఎగుమతులకు చైనా పెద్ద మార్కెట్గా ఉంది. వాణిజ్య లోటును తగ్గించుకునేందుకు ఇరు సరిహద్దు దేశాలకు ఎగుమతులు పెంచేందుకు కావాల్సిన మార్గాలను అన్వేశించాల్సిన అవసరం ఉంది.' అని హ్యాండ్ టూల్స్ అసోసియేషన్ అధ్యక్షుడు సుభాశ్ చందర్ రల్హాన్ అన్నారు. అయితే ప్రస్తుత పరిస్థితుల్లో చైనా దిగుమతులపై అంక్షలు విధిస్తే.. ఆ ప్రభావం ఎగుమతులపైనా పడుతుందని పేర్కొన్నారు. ఇది కాకుండా ఇరు దేశాల మధ్య ఉద్రిక్తతలు పెరిగితే మాత్రం వాణిజ్య ద్వైపాక్షిక సంబంధాలు దెబ్బతినే ప్రమాదం ఉందని అన్నారు.
ఈ సమస్యకు ఇరు దేశాలు వీలైనంత త్వరగా తెరదించకుంటే.. వాణిజ్య పరంగా ఇబ్బందులు తప్పకపోవచ్చని నిపుణులు హెచ్చరిస్తున్నారు.
భారత్-చైనా వాణిజ్యం ఇలా..
2019-20 (ఏప్రిల్-ఫిబ్రవరి) మధ్య భారత్ నుంచి చైనాకు 15.54 బిలియన్ డాలర్ల విలువైన ఎగుమతులు జరిగాయి. ఇదే సమయంలో చైనా నుంచి భారత్కు 62.38 బిలియన్ డాలర్ల విలువైన దిగుమతులు జరిగాయి.
2018-19లో 16.75 బిలియన్ డాలర్ల ఎగుమతులు, 70.32 బిలియన్ డాలర్ల దిగుమతులు జరిగాయి.
