మే నెలలో జీఎస్టీ వసూళ్లు రూ. లక్ష కోట్ల దాటాయి. మొత్తంగా రూ.1,02,709 కోట్లు వసూలైనట్లు కేంద్ర ఆర్థిక శాఖ వెల్లడించింది. ఇందులో సీజీఎస్టీ రూ.17,592 కోట్లు ఉన్నట్లు తెలిపింది. ఎస్జీఎస్టీ రూ.22,653, ఐజీఎస్టీ రూ.53,199 కోట్లు వసులైనట్లు వివరించింది.
తాజా వసూళ్లతో వరుసగా ఎనిమిదో నెలలో లక్ష కోట్ల జీఎస్టీ లభించినట్లైంది. గతేడాది మేతో పోలిస్తే ఈ సారి వసూలైన జీఎస్టీ 65 శాతం అధికమని తెలుస్తోంది. అయితే ఈ ఏడాది ఏప్రిల్ నెలతో పోలిస్తే ఈ వసూళ్లు గణనీయంగా తగ్గిపోయినట్లు స్పష్టమవుతోంది. ఏప్రిల్లో రూ.1,41,384 కోట్లు జీఎస్టీ రూపంలో వచ్చాయి. మార్చిలో జీఎస్టీ వసూళ్లు రూ.1.23 లక్షల కోట్లుగా ఉన్నాయి.
మరోవైపు, సెస్సుల రూపంలో కేంద్రానికి మే నెలలో రూ.9,265 కోట్ల ఆదాయం లభించింది. ఇందులో రూ.868 కోట్లు దిగుమతులపై విధించిన పన్నుల ద్వారా వసూలైంది. అనేక రాష్ట్రాలు లాక్డౌన్ ప్రకటించినప్పటికీ రూ. లక్ష కోట్ల జీఎస్టీ వసూలైందని కేంద్ర ఆర్థిక శాఖ పేర్కొంది. మే నెలకు సంబంధించిన మరిన్ని రిటర్నులు జూన్లో దాఖలయ్యే అవకాశం ఉన్న నేపథ్యంలో.. జీఎస్టీ మరింత పెరుగుతుందని తెలిపింది.
ఇదీ చదవండి- బంగారం మీద రుణాల వ‌డ్డీ రేట్లు- ఏ బ్యాంక్‌లో ఎంత?
