2020-21 ఆర్థిక ఏడాది రెండో భాగంలో.. రూ. 4.34లక్షల కోట్ల రుణాలు తీసుకోనున్నట్టు కేంద్ర ఆర్థిక శాఖ వెల్లడించింది. కరోనా సంక్షోభం నేపథ్యంలో అవసరాల కోసమే ఈ చర్యల చేపట్టనున్నట్టు స్పష్టం చేసింది.
2020-21 బడ్జెట్లో ఆమోదించిన రూ. 7.8లక్షల కోట్ల రుణాల లక్ష్యాన్ని.. 12లక్షల కోట్లకు సవరిస్తూ మే నెలలో కేంద్రం నిర్ణయం తీసుకుంది. తాజా ప్రకటనతో సవరించిన లక్ష్యాన్ని కేంద్రం చేరుకోనుంది.
"రూ. 12లక్షల కోట్లల్లో.. ఇప్పటికే రూ. 7.66 లక్షల కోట్ల రుణాలు తీసుకున్నాం. ఆర్థిక ఏడాది ఆరంభంలో అనుకున్న పూర్తిస్థాయి రుణాల్లో ఇది 63.83శాతం. అన్నిటిని దృష్టిలో పెట్టుకుని.. ఈ ఏడాది పూర్తి రుణాలను రూ. 12 లక్షల కోట్లుగానే ఉంచాలని కేంద్రం నిర్ణయించింది. అంటే ఈ ఆర్థిక సంవత్సరం రెండో భాగంలో రూ. 4.3లక్షల కోట్ల రుణాలు తీసుకుంటున్నట్టు అర్థం."
--- తరుణ్ బజాజ్, ఆర్థిక వ్యవహారాల కార్యదర్శి.
ఈ ఆర్థిక ఏడాది ప్రథమార్థం అంతా లాక్డౌన్లోనే గడిచిపోవడం వల్ల ఆదాయానికి గండిపడిందని తరుణ్ వెల్లడించారు. అందుకే మే నెలలో.. రుణాల పరిమితిని పెంచినట్టు స్పష్టం చేశారు. అయితే జూన్ నుంచి ఆర్థిక కార్యకలాపాలు సాగుతుండటం వల్ల ఆదాయం పెరిగిందన్నారు.
ఇదీ చూడండి:- బ్యాంకులకు రుణ పరిమితిని పొడిగించిన ఆర్బీఐ
