దేశీయంగా తయారీ, ఎగుమతులను ప్రోత్సహించడమే లక్ష్యంగా కేంద్రం ఈసారి బడ్జెట్లో కీలక నిర్ణయాలు తీసుకోనున్నట్లు తెలుస్తోంది. ఇందులో భాగంగా కొన్ని రకాల ముడి పదార్థాలపై దిగుమతి సుంకాన్ని ఎత్తివేసే అవకాశాలున్నట్లు విశ్వసనీయ వర్గాలు చెబుతున్నాయి. ఫర్నీచర్‌ తయారీలో ఉపయోగించే చెక్క, స్వాన్‌ ఉడ్‌, హార్డ్‌ బోర్డ్‌ లాంటి ముడిపదార్థాలతో పాటు రాగి ఉత్పత్తులకు ఉపయోగించే ముడిసరకులపై కస్టమ్స్‌ సుంకాన్ని తొలగించనున్నట్లు తెలుస్తోంది.
"ముడి పదార్థాలపై అధిక ధరలు అంతర్జాతీయ మార్కెట్లో భారత ఉత్పత్తులపై ప్రభావం చూపుతున్నాయి. మన దేశం నుంచి ఫర్నీచర్‌ ఎగుమతులు కూడా చాలా తక్కువగా ఉంటున్నాయి. అందువల్ల ఫర్నీచర్‌ ముడి పదార్థాలపై సుంకాన్ని ఎత్తివేయాలని ప్రభుత్వం భావిస్తోంది. తారు, రాగి తుక్కు తదితర వాటిపైనా దిగుమతి సుంకాన్ని తగ్గించే అవకాశముంది" అని సదరు వర్గాలు పేర్కొన్నాయి.
దేశీయ తయారీని పెంచేందుకు ఇప్పటికే ప్రభుత్వం ఉత్పత్తి ఆధారిత ప్రోత్సాహక పథకాన్ని ప్రవేశపెట్టిన విషయం తెలిసిందే. దీనితో పాటు రానున్న బడ్జెట్లో కొన్ని ఎలక్ట్రానిక్‌ వస్తువులు, గృహోపకరణాలపై దిగుమతి సుంకాన్ని పెంచే అవకాశముంది. ఫలితంగా ఫ్రిజ్‌లు, వాషింగ్‌ మిషన్లు, క్లాత్‌ డ్రయర్లు తదితర వస్తువుల ధరలు పెరిగే సూచనలు కనిపిస్తున్నాయి.
ఇదీ చూడండి:పద్దు 2021: పన్ను రూపంలో కరోనా కాటు..!
